ЗЫМГIВА ЙРАПХЪАТА ЙАЪАН АЖВА

Апхъапхъа йаъан Ажва. Ауи Ажва зчIвызгьи Анчва йакIвын, йгIаныцIуазгьи ауи йыхьыз акIвын… Йапшым ауагIахъаква разхъацIараква гьацапшым, дасугьи динкI нкъвигитI. Адин рыцIа йхIаракIу дунейпшыщата йырпхьадзитI. АзхъацIарипхьадзагьи агIвычIвгIвыс адуней ахъахь абзазара ззыгIаншаз йзыгIахънатIитI. АгIвычIвгIвара агIаншара йапхъахуз ашвхIаусыгIва йазыпшгIауата йгIаншатI адинквагьи. Ауат Нчвата йаъу рпхьадзара йгIаквхта адунейла йбергьльу йгьи йбергьльым адинквала йалырхитI. Йхъаду дуней динта йщаквгылтI акьристанра, амсылманра йгьи абуддизм. Ауат къраль щарда гIарыцIаркIитI, дасугьи йпхатшу йгьи рыцIа йхвыцу акъвадамаква гIарылцIитI. ЙашIамсуата агвып шIыцква ъагIаншауа ашвхIаусыгIвала адуней ауацIала динта, азхъацIара йгьи хъвыцра квпшырата йаъу ухIварныс баргвыпI. Апхьахьаква хIзаман апны дин нархарата йгIарпхьадзаз зкьпхьадзара йнадзитI. Акьристанра сквш 2000-ла утхъахта Палестина йгIаншаз динпI. Ауи йазхъазцIауа 2,3 миллиардыгIв гIарыцIаркIитI. Йжвизхауа асквшышв агIан акьристан дин гIвкъвадамакIла тшагIвнашатI: католицизм йгьи православие, йжвицхауа асквшышв агIан акатолицизм йгIалцIтI протестанцизм. Акьристанра лкIгIара хъадата йаму дгIвычIвгIвыста й-Анчвахаз Иисус Христос йпщылу агвынгIвыраква ракIвпI. Аправослав гвынгIвыраквала Иисус йгьи дабапI, йгьи дпапI, гвчIагIв ззырчпауа д-АнчвапI. Акьристан дин йаланакIуа рахIа йпхатшу акатолицизм Европа, Латин Америка йгьи США рпны акIвпI йалкIгIата тшауацIыхра ъаму. Ауи аправослав дин щардала йашIырпшызтIхIва, йызлапшым аъапI: акьльиса хъада знапIыцIу Папа Римский тгIачва гIанйыршарныс дгьахвитым, адин кьтапгьи датшапI. Адуней динква йрыуу Исльам йазхъазцIауа 1,5 миллиардыгIв йнадзитI. Ауи гIанзыршаз апигIамбар МухIаммад йакIвпI, кьтапта йгIадрысабапитI а-Къвыръан. Амсылманква рыхъазла йхъаду – а-Къвыръан йану ахабзаква дырхъйарныс: амш ауацIа хвын намаз чпара, урычра, садакъа тира, Макьа апны хIаджь акIвыршара ракIвпI. Буддизм – Анчва даъата йзымуа дуней маджьуси динпI. Ауи йацта Индия апны йапшым датша динквагьи нкъвыргитI: индуизм, ведизм, брахманизм, джайнизм, шиваизм. Дунейпшыща зигIва йгьи философия хъвыцща щарда сквшышвпхьадзарала агIвычIвгIвара ргватра азынадырхитI. Йапшым тлаханипхьадза адинквала амакIыракви апшIагылракви гIазлыцIуа ахъвыцраква гIаншитI. АгвынгIвыра рыцIа йанщаквгыл й-XXIхауа асквшышв апны апхьахьа-теологкви афилософкви ауагIахъаква адызкIылуаш, адинква азраргвануаш агвбайаракви ахъвыцщакви йырзынхитI. АзаргванчIвра уыс ахатI аланацIауата йпхьадза ауаштI адинква ртурыхла агIвыраква зыншвалыз абаза бызшвала йгIацIцIыз «Араса йаъан» книгагьи. Ауи уапхьара йахъазымкIва, йазалху а-QRкодла аудио гIвыраквагьи узаздзыргIвитI. Акнига атираж экземпляр 1000 йнадзитI, СанктПетербург йаъу «Миссия переводчиков Библии» жвлара организация ацхърагIарала йгIацIцIтI. Ауи гьыртиуам, хвыдъа абиблиотекаква, арыпхьара нхартаква, ажвлара организацияква йрыртитI. Акнига йадынхалтI Россияла йбергьльу аволонтер, арыпхьагIв Светличный Родион унашва зхъицIауа агвып. Хвысквша цIуата ауи ачкIвын дхъызхуа абаза бызшва ййырдыритI, ауи ахчарала абаргвыраква дрыдынхалитI. ЙгIаджвыквцIарала йыгьпроекткIым абзазара йаларжьхьаз. «Араса йаъан» книга агIацIщтрагьи ауи йгIахъвыцрапI, йцIыхъвахауа ахвысквша ауи йаквирыдзтI. Къарча-Черкес йауу аволонтерква рцхърагIарала ауи хIыбызшвала йатаркIхтI. Щарда мцIуата Светличный Родион йгвып йыцта хIреспублика йгIайтI, «Къарча-Черкес» ГТРК ажурналистква йрынйатI, Псыжв кыт йаныргIалу Абаза район амодельна библиотека анхагIвчва, «Алашара» адкIылара Черкесскла ахъвшара аунашвачпагIвчва, Красна Восток кыт абзазагIвчва, аъачIвагIа гIацIгартаква рапхьагIвчва йрызцатI. Ауат зымгIвагьи акнигаква аудиола йзаздзыргIвра ахъазла GR-код зну абгъьыцквагьи согIата йрырттI. Акнига йану агIвыраква йгьи аудиотурыхква Интернет апны https://www. myethnos.ru сайтла йрауаштI. «Абазашта» газет аредакция апны асасчва согIата йрыхIттI ауагIахъа уысквала, ажвлара коммуникацияквала йгьи печатьла КЧР а-Министерства йгIацIнащтыз «Сказки народов Карачаево-Черкесии» книга. АршIыйара гвып йалу ачкIвынчви ахIвсси абаза чкIвыныргIа руагIахъа турыхи рыбызшви йрызрыму азыгIальаматра тшауацIнарыхрала рхъвыцраква йрыхахIыргIвазатI. ХIажванахъаква йрыуата йыргвапхаз йащтагIайуа рпроектква йрыщатахушта хIгвыгъитI.