ЙАЖВИ ЙУЫСКВИ ХIЫЗГIАНИЖЬТI

ГІвычІвгІвысипхьадза йбзазара аурала пхарала дзырчвуа уагІа гІайынйитІ. Азаджв ауат йрапшу ауагІаква апхьарта даныцІу йгІайауитІ, датша заджвгьи – рыцІа йнаскІьата аинститут даныцІалра йджьащахъву астудент сквшква анджвыквылра агІан. Ауаса хІайхІарагІв хІакъыль анчІвара акІвпІ йангІахІгвынгІвыхуа уагІа бзи гІауынйарныс упхыцIа йгІаунатыз шсогІу. ЪачІвагІа уаута нхагІвчва гвыпкІ уанрылалра датша заджвы ймагІну узыщаквыргылуа уцитІ, ауи йгвы узыхътІума момкІва йузыхьшвашвума, ажва пхата йгІауайхІвуа агвы йгIатыцIума момкIва ахъаз чвалатшычпарума узалыргитІ. Йуызгвапу агІвычІвгІвыс уйыртынчитІ. Ауаса ауи хвы анаквуымцІауа айхІарапІ. ГвасрапІ ауи кІьасата йъагІахІгвынгІвуа… СквшыкІ цІуата ауи йапш гІвычІвгІвыс бзикІ адуней йхІваджьтІ – йцІабыргыз анбжьагІв, зъанатІа ззынкъвгуз аунашвачпагІв, йызквгвыгъуз апа, аба йгьи аща, йхІальальыз абаду, рыцхІагІа йалашваз йрызгвалымсмыз, зынхара йазъазаз… Ужвыгьи ажва пха щарда дызцынхаз, йъахІыльчва, йцриква рпны йуагІуштІ ЭРКЕНОВ Сагит Шабаган йпа йыхъазла. ЙыквлагІвчва зымгІва рапшта ауыгьи совет заман дгІадзыннаргылтІ. Акъарчаква ъатыргаз Къазахстан, Джамбул область, Луговой кыт дйытІ. АуагІахъа рцри шта йангІахъынхІвых, ЭркеновргIа ртгIачва Привольна кыт рбзазартахатI, уацIыхъван Кисловодск йцахын, Сагит ауаъа й-3-хауа аквтанай апхьарта йжвабахауа акласс дгIалгатI. Ауи Ленинград кытмлыкврхІара институт дапхьатІ. Диплом къапщыла дгІалган, Къарча-Черкес дгІахъынхІвыхтІ. – Эркенов Сагит йбзазара сыла йыцІата йакІвшатІ. АгІвыджьгьи Привольна кыт хІгІадзынгылтІ. Апхьара сквшква рагІангьи ауи дапхъагылагІвта тшгІайырбун. Сагит тгІачва ду дгІарылцІтІ, даншІаз угІалагата акыт нхараква дырзычпан. Ленинград кытмлыкврхІара институт дангІалга хІрайон дгІахъынхІвыхтІ, – йхІвитІ Прикубань райком йасекретарьта, 10 сквша райхІа арайон исполком дапредседательта, Прикубань район администрация дахъадата йынхаз акъральыгІва йгьи ажвлара уыснкъвгагІв АЛИЕВ Мхвтар Шогай йпа. – Ауи йщаквгылра статистикала райисполком ахъвшара даунашвачпагІвта йджвыквицІан, апартия арайком акытмлыкврхІара хъвшара даинструкторхатІ. Ласыла йызквгвыгъуз аъачІвагІагІв шІа арайком агІаджвыквцІарала «Родниковский» совхоз экономист хъадата дырщтитІ, ауи амщтахь «Холоднородниковский» совхоз даунашвачпагІвхатІ. Ауи нхарипхьадза ршІыйарала акІвын дшадгылуаз, датша аштаква ршвапха тшахайыргІвазун, ашІыцраква гІайрысабапуан. Алиев Мхвтар йшгІаликІгІазла, Сагит анхагІвчва гвыпква рпны хвы йыквырцІун. – ДъанхалакІгьи апсахра йгьи ацІыхъвагІарбара бзиква урыквшахІатхун. Арайон аунашвачпагІвчва экономикала, гІайыра рхарджьрала, акыт млыкврхІара нархараквала йъачІвагІадырра хІагІа гІалыркІгІун. Ауи ахъазла акІвпІ Прикубань районла акыт млыкврхІарала а-УнашвахъцІарта зинапІыцІарцІазгьи, – йхІвитІ Алиев Мхвтар. – Ауи дшунашвачпагІв бзийыз йапшдзата йгьи дынбжьагІв цІабыргын, тгІачвала дшвапхан. ЙанакІвызлакІгьи шІыцракІ гІайхъвыцуан. ГвасрапІ, Анчва нцІрата йгІайыйтыз ъашысхаз… Эркенов Сагит йынхара сквшква райхІара Прикубань район йгьи акыт млыкврхІара йырпщылан. Апартия йгьи амлыкврхІара рпны ъанатІа нкъвгарала йшвапха ЭркеншахІар фачыгІв завод адиректор данизаместительхагьи, Прикубань район ахъада дицхърагІагІвта, акыт млыкврхІарала КЧР аминистр дицхърагІагІвта дандыргылгьи йынхара йащатахатІ. – Эркенов Сагит Прикубань районла збаргвыракви збжаракви йымдыруаз кыт млыкврхІартакІгьи гьаъамызтІ. Ауи акытквала йаъаз асоциальна уыс щарда рырхъйара шгІайдахІвуаз джьасщун. Сагит Шабаган йпа пхьадзара щарда гвникІылуан, зынзамызагьи ауи йхъа астатистика гІарбараква зту миникомпьютер дзысщун, – йгІайгвалашвахитІ асквшква 1999–2003 рагІан Прикубань район знапІыцІаз ЧОТЧАЕВ Исмаил АлимхІамат йпа. – Йапшым анхара уысквала акытква хІангІархъыкІвшуз ауагІа гІайпшІалуан. Ауат ргвбжараква ъайырхъйуз, архъа нхараква радгалра дъацхърагІуз, техника ъарзалихуаз, датшагьи рпсы дызлапылуаз ауысква рыхъазла квырмыш ду йзырчпун. Йзыразыз ауагІа КЧР АуагІа Айззара (а-Парламент) йапхъахауа азддара адепутатква аналырхуаз Сагит Шабаган йпа напІы йызщтІырхтІ. Ауаъагьи алхыгIвчва разхъацІара гІайырцІабыргуа йхъвдаквцІараква йырхъйатІ. Асквш 2010 мартІ агІан Эркенов Сагит «Россельхозцентр» федеральна къральыгІва нхарта КЧР-ла ахъвшара даунашвачпагIвхатІ. АунашвачпагІв шІыц зынла йхІагІу афинанс-экономика гІарбараква рзынадзарала, ахъвшара анархараква йрылархІарала, афермаква, акыт млыкврхІартакви артелькви методика йгьи практика цхърагІара драдзарала ахачІвква йынхагІвчва гвып йрызйыргылтІ. – Сагит Шабаган йпа йгІаджвыквцІарала асквш 2011 угІалагата хІхъвшара апны микроэлементла йбайу «Гумат» пкъыгІва агІацІщтра джвыквхІцІатІ. Ауи апкъыгІва Иркутск йгІацІырхуа ахІахъврачва йгІалырхитІ. АгІархарджьра апны йгІадрысабапуа ауи адгьылрбзига агІацІщтрала хІынхарта апхъагылагІвхатІ, – лхІвитІ «Россельхозцентр» КЧР-ла ахъвшара аунашвачпагІв дизаместительта жвасквшапхьадзара йынхаз ПОПОВА Лидия Иван йпхІа. – Ауи дъадзанхаз асквшква руацІа аэкология агІайыраква рхчарала хъгалра зму нархарахатІ. АгІайыраква йрызарархауа ахІапшхвыпшква рабакІрала хІынхара анадзара щтІыцІтІ. ХІъачІвагІагІвчва агІайыраква йрызарархауа ахимия хъвшвква йыркъвыцІын, ахІапшхвыпшква зкІынхалуа акІыгаква ргІарысабапра йазгылтІ. Ауи йахъазымкІва знадзара хІагІу «Удача» йгьи «Ред Скарлетт» кІартІоф лацІачІвква ргІарийра тшазыгІбжьатІ. Эркенов Сагит «апхъагылагIв»-хІва йыпхьун. Ахъвшара аъачІвагІагІвчва ажвлаква дырхъвыхуата архъаква йцалун. АмлыкврхІартаква аргваныта йрабадырра ахъазла «Вестник Россельхозцентра КЧР» газет хмызкІипхьадза йгІацІырщтырныс ажванахъа гІайгын, абар йыгьсквшыкІым ауи апны агІайыраква рхчарала ауыжвгІанчІви амальква ацагІвыршауа аъачІвагІагІвчва ршвапха амырдауищтара, дасугьи атехнология йгьи атехника шІыцраква ауыла тшрыхадыргІвазитІ. – Эркенов Сагити сари асквш 1995 агІан хІабадыртІ. Ауи агІан Невинномысск апны гІайыра масла ъагІадырхарджьуаз азавод апны арыхІазырра хъвшара саунашвачпагІвта сынхун. Сагит ауи асквш рхъвыхра сортта йладйырцІаз асемчкІа тшыгІвра бажв гІарнатын, азавод йхІызнайгтІ. Ауаъа йгІашІарышвта сквш 25 руацІа аселекция уысквала, агІайыраква рхчарала, архъакви ащтІацІартакви хъвшвыла рыдынхалрала хІацынхатІ, – йгІайгвалашвахитІ «Ашба» фермер млыкврхІарта аунашвачпагІв АШВАА Роберт Щамсадин йпа. – Ауи агІвычІвгІвыс гвымчІва йгІаджвыквцІарала акытмлыкврхІара гІархарджьыгІвчва рыхъазла ачхъа йгьи атехника гІайыраква ргІарийрала асеминарква акІвдыршауа йалагатІ. Ауат рпны йапхъагылаз афирмаква «Пионер», «Майсадор», «Краснодарские семена», «Лимагрейн» рцхърагІара йгьи ркьангьашраква гІахІдрадзун. Агербицидква, апестицидква йгьи йбгІадзу адгьылрбзигаква гІазырхарджьуаз «Август» фирма агІайыраква ргІахчарала аргваныта хІацынхун. Грузия йакІвшаз адуней семинар ащтала Эркенов Сагит Къарча-Черкес афермерква злаз анйара ду адигалтІ. Ауи йъачІвагІадырра ушазынамдзуш, агІайыраква ргІархарджьра адуней гІарбараква йыршІырпшыта йщтІихра шитахъу ужвыгьи зны сатаквшахІатхатІ. Акыт млыкврхІарала КЧР а-Министерства йаднагалуаз айззараква зымгІва рпны хІазцIгІараква рджьауап ауи йпны йхІауан. Эркенов Сагит хІреспубликала пІатІу зквырцІуз ауагІаква дрыуан. Ауи Предгорна, Кочубеевск, датшагьи Ставрополь край арайонква ргІархарджьыгІвчва дрыцынхун, йъакІвызлакІгьи йажва хвы азырбун. УахъынлазтІ, тшынлазтІ, ауи телефон сизаста сазцІгІара дазымдзыргІвуата йыгьнымшатІ. Ауи агІвычІвгІвыс дъахІпхаз сара сыхъазла лдзгІара дупІ. Сагит Шабаган йпа данынхуз угІалагата «СтопАмброзия» нхара сквшигІадза йакІвшауа акцияхатІ. Ауи йахъазымкІва, «Россельхозцентр» КЧР-ла ахъвшара йгьи Черкесск город амэрия рангІалра апкъ йтата амзагІв цІлаква, акаштанква згІва гІармахврала гІашІакІра нхарата щарда адыргалтІ. Азаман тшгІахьызмыршвуз Эркенов Сагит йгІаджвыквцІарала ашвыр йгьи акыб цІлаква, ауатралыцІ гІайыраква, ахІврапшдзаква йгьи аунагІва ауацІа йгІадырйуа рхчарала цхърагІара ъаддрадзауа кьангьашырта Квта гІахъыртІытІ. Ауи тшазынадырхитІ дача, цІлауатра, уатра зму. АъачІвагІагІвчва ауат агІайыраква зхчауа хъвшвыта йгІалырхуашлагьи йырцхърагІитІ. Сагит Шабаган йпа йдахІвраква гІарпхьадзауата «Россия агропромышленна комплекс ачІахІра зму анхагІвы» хьзы, «Россия агропромышленна комплекс къару ъалайцІаз ахъазла» рызна медаль, акыт млыкврхІарала РФ а-Министерства артшхъвага гІайквдыргатІ. Арынок экономика атахъыраква архъйауата «Россельхозцентр» КЧР-ла а-УнашвахъцІарта уахьчІвала акъральла йаъу ахъвшара 78 руацІала йагІбахауа агыларта акІитІ. Ауи адахІвра аунашвачпагІв гвыбзыгъа йликъьаз амгІва йабзирапІ. Ауи ужвыгьи мурад бзи щарда йыман, ауаса дгьахамдзатІ… Сквш 30 руацІа йанбжьагІвта йацгІамгІвайстІ Эркенов Сагит йгьи Болатчиев Добай. Азаджв йынцІра шабгаз акыт млыкврхІара йайттІ, анахьани – ауыхвара бизнес. Ауаса ауат агІвыджь апызщылыз ахац зынгьи йгьапымшвттІ. – ХІыуа дасугьи агвыргъьара хІыман, азаджв азаджв йцхърагІара хІаназыбжахузгьи гІаншун. СынбжьагІв йанакІвызлакІгьи дсыдзхъагылан, – йгІайгвалашвахитІ БОЛАТЧИЕВ Добай АхІмад йпа. – Сагит йгвалымсмыз дгІвычІвгІвысын. Заджвы йгвыргІва йаргьи йчІвыта йпхьадзун, йдахІвраквагьи швабыжта драйгвыргъьун. Ауи сара сыхъазла дынбжьагІвын, дкьангьашагІвын, дащан. Спачва швапхата йдсырбуз дхъацІан. Йара уахьчІвагьи ауи сгвыла сйайкьангьашитІ. Сара сыхъазла ауи дбзапІ, сыдзхъа зджьара даъапІ… АцІыхъвадза йымблыз ачвамза апшта ауи йыйачIва ычвтІ. Сквш 63 рахІа дыртамкІва абзазара далцІтІ йуасаражвыз, закъыль цІараз, згІахъвыцраква джьащахъваз, йынбжьагІв цІабыргыз, згIвычIвгIвысагIара дууыз апа, аба, пщгІвы рабаду, ЭркеновргІа рткъвым атурых зхчуз агІвычІвгІвыс. Ауи йынцІра айшыс апны йсабапу уыс щарда дрыхадзатІ. Йара дгьаъахым, ауаса йцІыхъвала йажваква, йуысква, йайрыпхьаз, агIагвалашвара пхаква гІанижьтІ.