ХІЫШТА ГIАЦIЩТРАКВА ГІАЛЫРКIГIАТІ

Лагъь йгьи ГIвадахь КIавкIазла йакІвшаз «Искра Юга» журналист анкъвакъвра апны йагъьу проектта йгІалыркІгІатІ Къарча-Черкес ареспублика газетква – «День республики», «Къарачай», «Черкес хэку», «Абазашта» йгьи «Ногай давысы» рредакцияква хвысквша руацIа абзазара йаларжьуа апроект. «Къвнакъра» зхьзыта мызкІы апны ареспублика газетква рредакцияква йадыргаллауа анапаква апхьагІвчва азыгІальаматра рзырбауа йцатІ. АхвредакциякІ ржурналистква ргІвыраква амырдауата дасу йыбызшвала йапшым ахабарква ажвлара йрыларгитI. ЦІаста йщаквгылыз «Къвнакъра» проект хвысквша цІуата Къарча-Черкес абзазагІвчва – аурышвква, акъарчаква, абазаква, ачеркесква, анагІвайква, аосетинква, аурымква, датшагьи ауагІахъаква йгІарыквчважвитІ. Ари апхъалагьи ауи апроект Россия ажурналистква рдиплом йгьи Лагъь-КІавкІаз Федеральна округ ажурналистква райззара адиплом гІаквнадыргатІ. «Искра Юга» журналист анкъвакъвра адиплом ГІвадахь Россия йаланакІуа ажвыхв субъекткІ ржурналистика адызкІылуа йхІаракІу согІапІ. Ауи анкъвакъвра хачІвыта йаму ЮФО йгьи СКФО ржурналистква ръачІвагІадырра йалархІара, ацынхара рызбжьата йыргІапсра, зуыс йазъазу, ршІыйара злу рынхара хвы аквцІара. ЙагІвсыз амшква «День республики», «Абазашта», «Къарачай», «Черкес хэку», «Ногай давысы» республика газетква рредактор хъадаква – Кратов Евгений, Къвыл Фардауыс, Узденов Альберт, Абидокъва Люсана йгьи Атуова Алтынай «Искра Юга» артшхъвагаква гІаддрадзахтІ. Аредакцияква рунашвачпагІвчва апхъахьылагьи йырхауа ауыс афайда ажвлара йрыквшвауа, азаман йацчІвырхъауа рхъвдаквцІараква шдырхъйуш дрыбагъьатІ. Рынхара хвду аквызцІаз «Искра Юга» анкъвакъвра адгалагІвчва йшырзыразу, ауи рыцІагьи ргвышхвагата йшырзалыз гІалыркІгІатІ.