АУАГIАХЪАКВА ЙШРЫЦЫРКIУА РЫЛАРХIВИТI

Февраль а 4 угIалагата а 20-дза Китай, Пекин город йакIвшуш й-XXIV-хауа агъын олимп хъвмарраква йрылазлуш Россия аспортсменква йрыцыркIуата Черкесск апны айззара адыргалтI. «АдзыгIвбжьа ЙачIва» культура-тшпсщара парк йаныргIалу «Юбилейный» спорт Дворец апахь «Единая Россия» аволонтер квта йалу чкIвыныргIа, Черкесск город аспорт апхьартаква ргIащтийыгIвчва, абжьагIвчва аолимп хъвмарраква рдамыгъа гIадырбауата йгIалагылтI, ахIбачва метр гIважва зыуру Россия а-Баракъ ауацIырхтI. ЙгIалкIгIара атахъыпI, хIспортсменква адуней анкъвакъвраква рпны хIкъраль абаракъ щтIырхырныс йадымрыхвитуищтара йагIвсхьу йшсквшыкIым. ХIспортсменква Китай апынгьи Россия акъральыгIва дамыгъаква гIадрысабапырныс йгьадымрыхвиттI. Ауи акIвымкIвагьи, коронавирус йгIалцIла, аолимп хъвмарраква йрылазлуш хIкъраль ащтийыгIвчва йрыцызкIуа ауагIа Китай йцарныс гьрылымшатI. Россия ахьыз дыргарныс Китай йцаз аспортсменква рнашх гIащтIырхра ахъазла хIкъральла йапшым ашIыпIаква рпны афлешмобква акIвдыршитI. Черкесск йадыргалыз йалаз наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель ГАНШИН Алексей йшихIвазла, Россия акъару йъалахIауа йамыртынчуа къральквакI хIспортсменква йызларызарархуш швхIаусыгIва гIархъвыцтI. – ХIспортсменква Россия а-Баракъ щтIырхырныс йадымрыхвитуазтынгьи, ауат хIкъраль ахьыз дыргауата ркъаругьи рызгIвадарагьи йыгьрайгьдзум. Пекин йцаз Россия азкIкIра команда йрыцыркIуата уахьчIва араъа йгIайтI асабиквагьи ахIбачвагьи. ХIспортсменква къару, чхIара гIадырбарныс, амедальква гIатыргарныс рзыхIтахъпI, – йгIаликIгIатI Ганшин Алексей. Пекин апны апхын олимп хъвмарраква зны йакIвшахьатI (2008). Й-XXIV-хауа агъын олимп хъвмарраквагьи Китай апны йшакIвдыршуш асквш 2015, июль а 31 Адуней олимп комитет асессия апны йгIархIватI. Китай апны акIвымкIва, апхын йгьи агъын олимп хъвмарраква йара городкI зынгьи йгьакIвдмыршастI. Къраль 95 йгIартыцIыз спортсмента пщынзкьыгIв райхIа Пекин агъын олимп хъвмарраква–2022 рпны апхъагылара йазабакIуаштI. Ахъвмарраква рпны тшгIадырбарныс Россия аолимп комитет йщаквнаргылыз агвып йалу а 212-гIв йрыуата 103-гIвы хIвсысапI.