ЩТА ПШДЗА ГIАНИЖЬТI

Апхьахьа, аполитик, аюрист, асквшква 1993– 1994 руацIа юстицияла Россия а-Министерства йаунашвачпагIвыз КЪАЛМЫХ Юрий ХIамзат йпа адуней йхIваджьищтара сквш 25 цIытI. Ауи дгIаргвалашвахуата КЧР а-Правительства адзхъа йаныргIалу йчвахъабага йгIадгылтI КЧР а-Хъада йгьи а-Правительства р-Администрация знапIыцIу УАЗ Мурат, ауи йзаместитель ПИВОВАРОВА Надежда, КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства а-Председатель АРГВЫН Мурат, ауи йзаместитель СУЮНОВ Джанибек. Ауат Къалмых Юрий пхата дгIаргвалашвахтI, йчвахъабага ащапIы ахIврапшдзаква щтIарцIатI. – Къалмых Юрий ХIамзат йпа йхIаракIу юридическа дырра йымата РФ а-Правительства апны дынхатI. Ауи аюристква ръачIвагIадырра йалархIара гватра ду азалихуан, йайрыпхьаз гьмачIым. ЙгIалкIгIара атахъыпI, Къалмых Юрий анаука нхарагьи дшадкIылаз. Наука нхарата гIвышв райхIа, монографията жваба гIацIищттI. Асквшква 1991–1995 руацIа ауи йунашва йацIата къральгIв хвитнагIала гIвтомкI йнадзауа акнига Саратов апны йгIацIырщттI. Къалмых Юрий аюрист шIаква рыхъазла йанакIвызлакIгьи дшвапхазлуштI, – йхIватI хабзалыхрала, къральыгIва уыхварала йгьи ашIыпIа хъаунашвахъцIара уысквала КЧР АуагIа Айззара (а-Парламент) акомитет апредседатель Умалатов Владимир. Нхарала зыхьыз хъарата йзыргаз Къалмых Юрий аюристква рарыпхьара дазынхауата апхьахьа Тархов Виктори йари «Саратовская школа гражданского права» гIандыршатI. Ауи йнаука нхараква юристта йапхьауа уыжвгIандзара йгIадрысабапитI