РШВАПХА АКЪРАЛЬЛА ЙБЕРГЬЫЛЬХАТI

Москва апны акоммерция йалам аорганизацияква й-Х-хуз рсъезд акIвшатI. Ауи анхара йалан «Алашара» адкIылара апрезидент йзаместитель МЫХЦ Рамазан йгьи Черкесск городла ахъвшара аунашвачпагIв МЫКВА Мурат. Асъезд апны уыс щарда гIащтIырхтI, йапшым ахачIвква абзазара йалажьрала амальква йрыквчважватI, йдырхIаз ашвапха амырдатI. «Алашара» адкIылара йгьи «Апсадгьыл» абаза жвлара организацияква р-Ассоциация йдырхъйауа ауысквала асъезд апны дгIачважватI Мыхц Рамазан. Ауи «Алашара» апрезидент, Къарча-Черкес Республика АуагIа Айззара (а-Парламент) а-Председатель йзаместитель Эгьзакь Мусса ХIабальа йпа йлихыз апрограмма йауацIыхта даквгIашIастI. – Зпхьадзарала ймачIу руагIахъара гIархчара ахъазла акытква ртшауацIыхра магIын ду амапI. «Алашара» адкIылара аъачIвагIагIвчва рынхара айхIарагьи ауи йазынархапI. Быжьсквша цIитI хIорганизация нхауищтара. Ауи азаман ауацIала баргвырата хIзынйазгьи гьмачIым. АуагIа рхъвыцща, ашIыцраква рахьыла йщаквгылыз разазаъаща упсахырныс швабыжта йбаргвыпI. Акытква рбзазагIвчва апхъапхъа азхъацIарата йгIадырбуз гьщардамызтI. Эгьзакь Мусса йынхара апны ауат разыгIальаматра гIаршIыхара акIвын рыцIа хъадата йгIаликIгIуз. МачI-мачIымца абзазагIвчва ркытква раъаща агъьчIвра йазынархаз ауысква йрылалуа, дара ражванахъаква гIаргуа йджвыквылтI. Йапхъахуз апроектква кытипхьадза спорт площадкIа уыхвара йазынархан. Абаза кытква 13 йнадзитI, рыуа зджьарагьи ауи апш гьаъамызтI. Ауи йапшу апроектква «Алашара» ахча азалырхуа, аспорт площадкIа ъаныргIалызлуш акыт гIаныршара аунашвачпагIвчва йлырхуа, абзазагIвчвагьи къарула йацхърагIауамца кытипхьадза уызгIвымсхыз аспорт площадкIаква руыхватI. «Алашара» адкIылара ауыхвага пкъыгIваква рхвгIара сом зыкь 900 рзалырхтI. АуыхвагIвчва рынхарагьи сом мильуанкI аквшвушзарын, дара абзазагIвчва йдмырхъйазарквын. «Анхараква заман анрымаз агIан акIвын йанакIвдыршуз, псайспата апхъала йнаскIьун. Ага ауаса йаъазтынгьи, ауагIа дара ркъару здырцIаз заджвы зарар айрайдзарныс йгьизыруашым, йазсакъуа йынкъвыргуштI», – йгIаликIгIалитI Эгьзакь Мусса. «Алашара» адкIылара аъачIвагIагIвчва зымгIва ауи йажваква рцIабыргыра йызнымкIва хIаквшахIатхатI», – йхIватI Мыхц Рамазан асъезд апны дгIачважвауата. УахьчIвала акытква рпны анхараква адызгалуа агвыпква, ахIбачва йгьи апхIвысква рсоветква гIаншатI. «Алашара» адкIылара ацкIрала ауат «Апсадгьыл» Ассоциация йаднакIылхтI. Акыт гIаныршараква рхъадаква йырхъйачIву ауысква ужвы дара-дара йлырхитI. Ауат йрыквшвауа ахча азбжа агрантквала йгIатыргарныс Экьзакь Мусса дацхърагIитI, рызбжа акыт абзазагIвчва йаларпситI. «Алашара» адкIылара апрезидент Эгьзакь Мусса йгIаджвыквцIараква зымгIвагьи Къарча-Черкес Республика аунашвачпагIвчва йацыркIитI, нархара щардалагьи йацынхитI. «Алашара» йгьи «Апсадгьыл» уыста йдырхъйауа йахадыргIвазаз акоммерция йалам аорганизацияква рсъезд аделегатква йгьи адгалагIвчва хIхаквлагIвчва ршвапха байа швабыжта йджьарщатI. АгIаджвыквцIараква шыргвапхауа гIархIватI «Федеральный народный совет» жвлара организация апредседатель Бабичев Игорь йгьи «Общенациональный союз НКО России» апрезидент Айгистов Александр. Асъезд йхъаду алачIвара амщтахь «Алашара» адкIылара йгьи «Апсадгьыл» афедеральна организацияква р-Ассоциация йаларцIарныс ажванахъа гIаргтI.