ЧАЙКА ЮРИЙ: «КЪАРЧА-ЧЕРКЕС ТШАУАЦIЫЗХУА АШТАКВА ЙРЫУАПI»

МартI а 3 Къарча-Черкес Республика дгIайтI Лагъь-КIавкIаз Федеральна округ (СКФО) апны Россия а-Президент йгIащтийыгIв ЧАЙКА Юрий. Ауи КЧР а-Хъада ТЕМРЕЗОВ Рашид данйынйа хIреспублика атшауацIыхрала ахачIв хъадаква, Россия а-Президент Путин Владимир йунашваква шдырхъйауа, ауагIахъа проектква абзазара йшаларжьуа йалачважватI. Ауи амщтахь Чайка Юрий Къарча-Черкес асоциальна-экономика тшауацIыхрала анархара хъадаква йъарылачважваз айззара акIвйыршатI. Ауи йалан КЧР а-Хъада Темрезов Рашид, КЧР а-Правительства а-Председатель Уаз Аслан, ауи йзаместительква, аминистрква, ахабзахчара органква рунашвачпагIвчва. АлачIвара апны уыс хъадата йызлачважваз йрыуапI хIреспублика апны ауагIахъа проектква, аинвестиция проектква абзазара йалажьра, атуризм, агIархарджьра промышленность, акыт млыкврхIара ртшауацIыхра, ауагIа рхъахIара йалархIара датшагьи. – Къарча-Черкес Республика зпсабара пшдзу, гъынгьи пхынгьи ауагIа тшъапсырщауа курорт бзи ъану, культура, турых байа зму ауагIахъаква акъыльаквшвара рызбжьата йъабзазауа, адзыгIвкви агвалкви ъащарду аштаква йрыуапI. Россия абзазагIвчва йырхъазымкIва, агIвымакъральква йгIартыцIта араъа тшпсызщауа ансисквшагьи йрылахIитI. Атуризм ареспублика аэкономика атшауацIыхра йацхърагIауа анархараква йрыуапI. Араъа апсабара байараква щардапI, хIахъврачва, гранит, мрамор, азгIвадара йахъвауа нышв, аминерал дзква щардата адгьыл йгIацIцIитI. Апсабара йгIашвнатуа абайараква ареспублика хъахIара шрызгIаргуаш апшта йгIарысабапра атахъыпI. Ареспублика анхара бзи йызбауа уагIала йбайапI. УагIахъата 80 райхIа айгвара, акъыльаквшвара рызбжьата араъа йбзазитI. Ашта атшауацIыхра къару ду алазцIауа ареспублика аунашвачпагIвчва ауагIахъаква райгвара рыбагъьара йазынхауата щарда рчпитI, – йхIватI Чайка Юрий айззара апны дгIачважвауата. Ауи РФ а-Правительства а-Председатель МИШУСТИН Михаил щарда мцIуата дшйынйаз, Россия а-Президент йпны йгIаныршу ауагIахъа проектквала а-Совет а-Президиум алачIвара дшалаз айззара йалаз йдйырдыртI. – Россия а-Правительства аунашвачпагIви сари СКФО асубъектква ртшауацIыхра йазынарху уыста гIважва райхIа хIрылачважватI. Анйара апны йгIащтIысхыз уысквакIла Мишустин Михаил йчпаз аунашваква рырхъйара джвыквылхьатI. Апрезидент Совет алачIвара апны ауагIахъа проектква рыдынхалра хIалачважватI, нархараквакIла ауысква зрыласуаш хIажванахъаква рыхIттI, – йхIватI Чайка Юрий. Ауи афедеральна министерствакви аведомствакви рцхърагIарала ареспублика проектква рынхара апсахраква рыларцIарныс хачIвы йыргылтI. Чайка Юрий КъарчаЧеркес асоциальна-экономика аъаща даквчважвауата анхара тыпква гIаныршара, апхъахьыла анхаша йалархIара гватра рзалхра шатахъу йхIватI. – СКФО арахьарат аштаква йгIарыквухырквын, Къарча-Черкес апны анхашала апсарчIвы агалагьи ймачIпI. Абюджет нхартаква рынхагIвчва йаназаману рынхаша рыртитI, псарчIвыкIгьи гьаъам. Ауаса псарчIвы зкву анхартатыгIвчва йындырхауа ауагIа рахча рыртхра ахъазла йчпачIву швазхъвыцра атахъыпI, – йгIаликIгIатI Чайка Юрий. Ауи хIреспублика апны аны-аба змам, хъпшылыгIвдъа йгIанхаз асабиква гIвнабзазартала йшадыргалуагьи даквгIашIастI. Чайка Юрий йшихIвазла, сынчIва ари ауыс йазынадырхаз ахча гIванла йалахIатI, асквш 2020 апны айыбаква гIвнабзазарта рзалырхуата сом мильуан 77 гIадрысабапуаштI. Чайка Юрий асквш 2016 йгIашIарышвта КЧР абюджет ахъахIара хъвы йшалахIаз, агропромышленна комплекс штшауацIнахуа гIайхIватI. Ауи йшгIаликIгIазла, асквш 2018 йгIаквухырквын, йагIвсыз асквш йгIадырхарджьыз апкъыгIваква йгIартныцIыз сом пщмилиардкIла йщардапI. – Ареспублика атшауацIыхра йазынарху ахачIвква, ауагIахъа проектква, асоциальна уысква абзазара йалажьрала хIацынхара шаъазлуш хIалачважварныс акIвпI уахьчIва хIзайззаз. Ацынхара апсахра бзиква шащтагIайуаш йазхъасцIитI, – йгIаликIгIатI Чайка Юрий. Темрезов Рашид дангIачважвуз Россия а-Президент Путин Владимир йунашваква рырхъйара апны хIкъраль аунашвачпагIв СКФО-ла йгIащтийыгIв йцхърагIара магIын ду шаму гIаликIгIатI йгьи асквш 2019 агIан КЧР абюджет шдырхъйаз Чайка Юрий дахайыргIвазатI. – Ареспублика бюджет ахъахIара хъвы йгIалахIаз ахчаквала асоциальна программаква дахIврала абзазара йалагIжьитI, акъральыгIва псарчIвы йалдзгIатI. Йшыжвдыруа апшта, КЧР абюджет акврыдзраква рпроцент 64 социальна магIны зму ахачIвква йырзынархапI. Ахчаква арыпхьара, азгIвадарахчара, асоциальна политика йгIарыцIанакIуа анхараква йырзалырхитI. Асквш 2019 агIан йгIвыджьхауа саби зауыз атгIачваква зкьы йнадзитI, ауат зынцхърагIарата сом зкьы 20, йпщыгIвхауа йгьи йащтагIайуа саби зауыз 807-гIвы ареспублика йщаквгылу ан капиталла сом зыкь 105,5 рзалырхтI. АцхърагIараква зымгIва шалу сом мильуан 85,8 йнадзатI, ахча ареспублика бюджет йгIаунащттI. Йапхъахауа, йхыгIвхауа йгьи йащтагIайуа саби зауыз тгIачвата 7,6 зкьы райхIа ргIариква хысквша дрыцкьанадзыкIьа йырзалырхуа ацхърагIараква зымгIва шалу йагIвсыз асквш ауацIа сом мильуан 803 йнадзатI. ХгIвы йгьи йайхIата саби зму рбзазара агъьчIвра мурадла 181 аъара адгьыл шта рзалырхтI, – йхIватI Темрезов Рашид. КЧР а-Хъада саби зщарду атгIачваква адгьыл анырзалырхуа йгIаншауа абаргвыраква шдрыдзуа гIайхIватI. Хвыдъа шта зквнагу атгIачва йъабзазауа акыт йа арайон апны йрыртуаш адгьыл аъамызтын, йхъарамкIва йаныргIалу амуниципальна район апны йырзалырхитI. Ари ашIыцра хабзала йдрыбагъьатI. Темрезов Рашид хIреспублика адемография аъаща шгвымхам гIаликIгIатI. Ауи йшихIвазла, асквш 2019 агIан КЧР апны сабита 5110-гIвы адуней йгIаквылтI. Асквш 2018 агIарбараквала хIреспублика апны агIвычIвгIвыс квтанайта сквш 76-и жвмызкIи дбзазитI. ХIреспублика аунашвачпагIв абизнеси зхъа йазынхауа акъральгIвчви йшырцхърагIауагьи гIайхIватI. Ауи йшгIаликIгIазла, асквш 2018 йгIаквухырквын, йагIвсыз асквш пкъыгIвата йгIадырхарджьыз жвыгIвпроценткIла йщардапI. – ХIреспублика апны зхъа йазынхауа акъральгIвчва йрыцхIкIуата ашвыр цIлауатраква ргIаныршарала аинвестиция проект абзазара йалагIжьитI. «Къарча-Черкес Республика апны ашвыр цIлауатра рхIара ауысла» къральыгIва программа апкъ йтата Уарп муниципальна район апны уатрата 50 гIандыршахьатI. Апхъахьыла ужвыгьи храйонкI апрограмма йаларцIуштI, – йхIватI Темрезов Рашид. КЧР а-Хъада атуризм, агидроэнергетика йырзынарху ауысквагьи шакIвшауа гIайхIватI. КъарчаЧеркес Республика апны акыт а-Сквш апкъ йтата йыншаз апсахраква ауагIа шдрыразыз гIаликIгIатI. Темрезов Рашид Абашта айсра Ду аветеранква АйгIара асквш 75 йапылуата цхърагIарата йддрадзуш гIайхIватI. ХIреспубликала ауагIахъа проектква абзазара йшаларжьуа дгIаквчважватI КЧР а-Правительства а-Председатель Уаз Аслан. Ауи йшгIаликIгIазла, асквш 2019 апны ауагIахъа проектква (10) рыпкъ йтата федеральна программата 45 хIреспубликала абзазара йаларжьтI, анхараква сом 5,4 миллиард рыквыдзтI. ЙАЦЫНХАРНЫС ЙАНГIАЛТI СКФО-ла Россия а-Президент Путин Владимир йгIащтийыгIв Чайка Юрий йгьи КЧР а-Хъада Темрезов Рашид йакIвдыршаз айззара апны ажва зыртыз «Сбербанк» АгIвадахьМараташварта банк знапIыцIу Титов Евгений унашва зхъицIауа абанк Къарча-Черкес абизнес проектква абзазара йалажьра йшацхърагIауа гIаликIгIатI. Ауи КЧР а-Правительстви «Сбербанки» ужвыгьи хнархаракIла рацынхара швъала йдрыбагъьарныс ажванахъа гIайгтI. – «Сбербанк» асквш 2035-дза РФ йгьи СКФО рпны атуризм атшауацIыхрала йацхърагIауа афинанс нхарта пхатшаква йрыуапI. КъарчаЧеркес акурортква раныргIалрала КЧР а-Правительства йгьи «Сбербанк» рацынхара апхъахьылагьи тшауацIнахуаштI, – йгIаликIгIатI Титов Евгений. Темрезов Рашид йшихIвазла, «Сбербанк» абзазара йаланажьуа апроектква хIреспублика атшауацIыхра ахъазла магIын ду рымапI, ауи КЧР абюджет ахъахIара хъвы йалазырхIауа анхарта пхатшаква йрыуапI, – йгIаликIгIатI Темрезов Рашид. КЧР а-Хъада йгьи Титов Евгений хIреспублика апны аинвестиция проектква абзазара йалажьра, ацифра экономика тшауацIнарыхра нархараквала КЧР а-Правительстви «Сбербанки» рацынхара щаквзыргылуа ангIалра мачвы ацIарцIатI. АЮБИЛЕЙ МЕДАЛЬКВА РЫРТТI Къарча-Черкес асоциальна-экономика тшауацIыхра йазынархаз айззара амщтахь Чайка Юрий йгьи Темрезов Рашид Черкесск город йбзазауа Абашта айсра Ду аветеранква йрынйатI, аюбилей медальква рырттI. АйгIайра гIатызгаз ахIбачва хIкъраль, хIреспублика рунашвачпагIвчва аветеранква ъархъмаштылуа, ацхърагIараква ъаддрадзауа ахъазла йшырзыразу рхIватI. Аветеранква айсра агIан хI-Псадгьыл шгIархчаз, айсра амщтахь акъраль ш г I а щ а к в д ы р г ы л х ы з йаквчважватI. Чайка Юрий АйгIайра аюбилей медаль зитыз аветеран КАНАМАТОВ Хамит Абул йпа Калинин йгьи Прибалтика фронтква рпны асвязь рхъвква дрылата дайсытI. «Орден Отечественной войны» I-хауа йгьи II-хауа степеньква дыркавалерпI, «Орден Красной Звезды» гIван йгIайквнадыргатI, «За боевые заслуги», «За взятие Кенигсберга» медальква гIайырттI. Айсра амщтахьгьи акъраль агIащаквыргылхра къару ду ъалайцIаз ахъазла «За трудовое отличие», «За трудовую доблесть» медальква датшагьи ртшхъвага щардала дгIалыркIгIатI. ФЕНЕВА Клавдия Семен йпхIа дшIадзата Лагъь-КIавкIаз афронт дпшцIалтI, Луганск утыцIта Будапештдза айсра мгIва гIамылдатI. Анамыца самолетква агвыквсраква адрымгалскIва пшыхвра дцун. ХIайсыгIвчва ауи лцхърагIарала агвыквсраква тшырчвырхчун. ЖУРАВКОВА Екатерина Степан йпхIа лбальыгъ днамдзаскIва афашист концлагерь дтадрышвтI, ауаъа хьтагьи млагьи лбатI. Ауи асквш 1966 агIан лхъапщыли лари хIреспублика бзазара йгIайтI, Черкесск город йапшым анхартаква рпны нхарала лыхьыз лыргатI. БОБРЫШЕВ Михаил Алексей йпа лейтенант ахIба чын йымата й-74- хауа ахысыгIвчва рполк далата дайсытI. Алакшара мчыкI апны хIатлата дхвхатI. Фыррата йгIайырбаз ахъазла «Орден Красной Звезды» датшагьи агIмедалькI гIайквнадыргатI. Асквш 1977 йгIашIарышвта РТИ завод апны акъральгIв-хъахчара штаб даунашвачпагIвта, уадыргIвана азавод зхчуз йнапIыцIата пенсия днадзанадзыкIьа дынхатI. Асержант ахIба ПОПОВА Надежда Павел йпхIа дпшыхвгIвын. «Орден Красной Звезды» дакавалерпI, «За отвагу», «За оборону Кавказа» датшагьи амедальква гIалквнадыргатI. Попова Надежда лапшта зхъа йамайгьдзауата хI-Псадгьыл ахчара йазгылыз афырква йгIадзынгылуа абанпара рыхъазла швапхата йъанамхъауа гьаъам. ХЕЖЕВ Рамазан ХIаджьмырза йпа асквш 1942 агIан Ленинград аблокада йгIалыргаз асабиква дрылата хIреспублика дгIаргтI, Бесленей кыт апны ХежевргIа ртгIачва днарахвтI, ауат йцрихатI. Йара дгIазлыцIыз аткъвым гьидырхуам, Бесленей апны дзыгIзаз аунагIва апшвыма адуней анихIваджь йбыжьбахауа акласс дапхьун. Ауи йан йанылхъазха апхьара нижьын, къвырльыкъвхара дызшIыртындзыкIьа йани йгIвахщчви дырцхърагIауата дынхатI. Йборч йырхъйата дангIахъынхIвых Бесленей апны сквшквакI дбзазатI. Асквш 1976 агIан йтгIачвагьи йаргьи бзазара Черкесск йгIайхтI. Рамазан пенсия днадзанадзыкIьа шоферта дынхатI, анхара даветеранпI. Абашта айсра Ду аветеранква ансисквша йъарылдзгIауа згвы йамсуа гIвычIвгIвыскIгьи дгьаъам. УахьчIвала хIреспублика апны Абашта айсра Ду йаветеранта 114-гIв бзазитI. Ауат йрыуата 87-гIвы афронт йпшцIаз, айсра ныкъвадыкъвара гIалызхыз ракIвпI. Атыл анхагIвчва – 1677-гIв, айсра йаладзыз рхъапщылаква 163-гIвы йнадзитI. Анйара апны КЧР а-Хъада Темрезов Рашид аветеранква ахча цхърагIара рыртырныс шщаквйыргылыз гIаликIгIатI. Акъральла йрыртуа акIвымкIва хIреспублика йбзазауа Абашта айсра Ду аветеранква заджвипхьадза сом зыкь 50 йыртуаштI, айсра йаладзыз, йгIахъынхIвыхта адуней зхIваджьхыз рхъапщылаква, атыл анхагIвчва – сом хвынзыкь. Ахча цхърагIараква КЧР абюджет йгIаунащтуаштI. Россия а-Президент Путин Владимир хIкъраль аветеранква йырзалырхырныс йгIайхIваз ацхърагIараква ауат йрыцрыртуаштI. Темрезов Рашид датшагьи йшихIвазла, КЧР абюджет йгIаунащтуа ацхърагIараква йырхъазымкIва, Къарча-Черкес ахьызла РФ а-Федерация а-Совет йалу, РФ а-КъральыгIва Дума адепутатква аветеранква заджвипхьадза сом зыкь 50 йдрадзуштI.