УнашвахъцIарта апны
асквш 2019 рынхара агIарбараква йъарылачважваз алачIвара акIвшатI.
Ауи йалан КЧР АуагIа
Айззара (а-Парламент)
а-Председатель йапхъахауа йзаместитель
СМАКУЕВ Дагир, КЧР
а-Правительства а-Председатель йзаместитель
ПОЛЯКОВ Евгений,
аэкономика тшауацIыхрала КЧР аминистр НАКIВАХВ Али, КЧР апрокуратура афедеральна хабза шдырхъйауа хъпшылра ахъцIарала ахъвшара аунашвачпагIв АФАУЫН Зураб, «Росреестр» КЧР-ла а-УнашвахъцIарта знапIыцIу УРУСОВ Марат датшагьи.
«Росреестр» КЧР-ла
а-УнашвахъцIарта знапIыцIу Урусов Марат айззара апны йызлапшуашыз ауысквала айшыста
дгIачважватI. УадыргIвана ауи йзаместитель Ордоков Аслан йгьи «Росреестр» КЧР-ла а-УнашвахъцIарта ахъвшараква рунашвачпагIвчва
Микитов Мусса йгьи Тоторкулова Динара асквш
2019 апны йшынхаз йгIаквчважватI.
Микитов Мусса йшихIвазла, асквш 2019 ауацIа акъральгIвчва рымлыкв акъральыгIва кадастр йанырцIара ахъазла ахIвара швъата 18587
гIарадзатI. АкъральгIвчва
ртшазынархараква дырхъйауата адгьыл штата
9386 акъральыгIва кадастр
йанырцIатI. Капитальна
уыхвара объектта 4930
йатдымрыпауа амлыкв
йзакIу акъральыгIва реестр (ЕГРН) йанырцIатI.
Микитов Мусса ан капитал, ипотека йа датша
кредит гIазрысабапта
гIвнабзазарта зхвгIаз акъральгIвчва рымлыкв ашвъа йанцIарала нхарата
йакIвдыршазгьи даквгIашIастI. Ауи йшихIвазла,
асквш 2019 агIан абанкква рцхърагIарала йатдымрыпауа млыкв зхвгIаз
гьмачIгIвым.
– ЙагIвсыз асквш
абанкква тшырзыназырхаз йрыуата 1229-гIв ипотекала гIвнабзазарта рхвгIатI.
УагIата 3982-джь ипотека анагвындыргIвуаз ан
капитал, агIвнабзазарта
сертификат ахчаква гIадрысабаптI, – йхIватI Микитов Мусса.
Ауи йшгIаликIгIазла,
«Росреестр» КЧР-ла а-УнашвахъцIарта тшазыназырхаз йрыуата аэлектронна цхърагIараква гIазрысабапуагьи йрылахIитI.
ЙагIвсыз асквш апны
а-УнашвахъцIарта аъачIвагIагIвчва электронна
квпшыра зму швъата 15675
йрылапштI, асквш 2018
йгIаквухырквын, жвизпроценткIла йщардапI.
– Электронна амаль
ашвъаква рагвныргIвра
арыласитI. Ари анархарала ауысква агъьхIчIвуата акъральыгIва власть
органква, ашIыпIа хъаунашвахъцIара органква,
анотариусква, акредит
организацияква, ауыхвара нхарта пхатшаква аргваныта хIрыцынхитI, –
йгIаликIгIатI Микитов
Мусса.
Ордоков Аслан йатымпауа амлыкв акадастр хвы шщаквдыргылуа, адгьылква йырзынарху акъральыгIва рхъвыхраква шакIвдыршауа даквчважватI. Ауи йшихIвазла, асквш 2019 агIан адгьылква йырзынархата
йакIвдыршаз архъвыхра
611 рагIан адгьыл штаква гIаркIуата, йшакIвым
йгIадрысабапуата мыгIвхъгара 300 ашвъа йанырцIатI. АмыгIвхъгараква
нзыршаз зымгIва административна джьауап
ддыркIытI (сом зыкь 1818,8
аъара къвады ддыршватI).
– ХIреспублика апны
адгьылква шгIадрысабапуа анхIырхъвыхуа КЧР
апрокуратура анхагIвчвагьи гIахIцхърагIитI. Асквш
2019 ауацIа апрокуратура органкви хIунашвахъцIарти юридическа хъата зму адгьылла ахабза
мыгIвхъызгаз джьауап
ддыркIытI, – йхIватI Ордоков Аслан.
Ауи йатымпауа амлыкв акадастр хвы
шщаквдыргылуа, ауи йазыразым акъральгIвчва
ртшазынархараква йшрылапшуагьи даквчважватI. Ордоков Аслан
йшгIаликIгIазла, асквш
2019 апны йатымпауа
амлыкв акадастр хвы
йазыразымкIва «Росреестр» КЧР-ла а-УнашвахъцIарта апны йгIаныршу акомиссия 225-гIв
тшазынадырхатI. Ауат йрыуата 33-гIв юридическа
хъата зму ракIвпI. ЗымгIва шалу 105-гIвы ршвъаква йыгьрылампштI, заджвы йшвъаква йара
йтахъырала йхъындырхIвыхтI.
– АмакIыраква рапхъала аобъектква ркадастр
хвы сом мильуан 4102,2
аъара йнадзун, атшазынархараква йанрылапш
амщтахь сом мильуан
3519,63-дза йгIанакъвытI, –
йгIаликIгIатI Ордоков Аслан.
Ауи акъральыгIва геодезия рхъвыхраква шакIвдыршауа даквчважватI,
асквш 2020 апны ахачIвквагьи гIайхIватI.
«Росреестр» КЧР-ла
а-УнашвахъцIарта ахъвшара «ФКП «Росреестра»
аунашвачпагIв йхъвдаквцIараква зырхъйауа Тоторкулова Динара хIреспублика арайонква, акытква, культура тынха
магIны зму аобъектква
рмажаква шщаквдыргылуа, йатымпауа амлыкв
йзакIу акъральыгIва швъа
(ЕГРН) йшанырцIауа гIалхIватI. Ауи йшгIалылкIгIазла, асквш 2019 апны
кыт 21, муниципальна
гIаныршарата цба датшагьи хвштакI йырзынарху амажаква ЕГРН
йанырцIатI.
– Асквш 2019 ауацIа
культура магIны зму аобъектква йырзынарху цмажакI щаквхIыргылтI йгьи
объект 68 культура тынхата йшпхьадзула ЕГРН
йанхIцIатI, – йгIалылкIгIатI Тоторкулова Динара.
Ауи датшагьи унашва
зхъылцIауа ахъвшара тшазыназырхауа йгIадрысабапуа аэлектронна цхърагIараквагьи сабапрата
йрылу даквчважватI, апхъахьыла ахачIвква гIалхIватI.
Айззара йалаз шагвынгIвызла, амуниципальна
гIаныршараква рпны адгьылква йрызарархауа
гIашIаркIуаштI, аштаква,
ашIыпIа бюджетква хъахIара шрызгIаргуаш апшта архъвыхраква дрымчуаштI. «Росреестр» КЧР-ла
а-УнашвахъцIарта йгьи
КЧР а-Правительства рынхагIвчва ауи гIардахIвра
ахъазла баргвыра ъану
акыт администрацияква
рпны айззараква шакIвдыршушла йагвынгIвытI.
Асквш 2019 агIарбараквала бзита йынхаз
«Росреестр» КЧР-ла
а-УнашвахъцIарта аъачIвагIагIвчва КЧР а-Правительства артшхъвагаква
рырттI.
Получайте свежие новости на электронную почту
Комментарии