АРДЗЫНБА АДГУР АМИРАН ЙПА

«Арызна апа» – ари акIвпI апсыуа бызшвала «Ардзынба» тдзыхьыз йгIаныцIуата йырпхьадзауа. Й-ХIХ-хауа асквшышв алагамта АрдзынбаргIа йрыуу Абхазия ащхъа жвлараква зымгIва рпынгьи йрылан ухIва ауаштI. Ауи асквшышв ацIыхъва зпхьадзарала рыцIа йайхIу, махъарыхъвара зму аткъвымква йрыуан. Аткъвым йауу щардагIвы рыхьызква рфыррала, рхъацIарала атурых йгIалахатI. Ауат дрыуапI ауыжвгIанчIви Апсны йапхъахуз а-Президент Ардзынба Владислав Григорий йпа. Абари апхъанчIви ткъвым дгIарылцIтI акъраль йхIаракIу аъанатIа дазабакIуата сынчIва мартI а 22 Абхаз Республика йакIвшуш апрезидент алхраква йрылалыз АРДЗЫНБА Адгур Амиран йпа. Абхаз Республика апрезидентра акандидат Ардзынба Адгур асквш 1981 агIан Гудаута город дйытI. Аквтанай апхьарта амщтахь Къабард-Балкъар къральыгIва университет дыцIалын, промышленна-къральгIв уыхвара нархарала ъачIвагIа йымата асквш 2007 агIан дахIврала дгIалгатI. Ауи ауниверситет йгIацIигаз адырраквала дгьгIашIамстI, асквшква 2007–2009 руацIала Волгоград къральыгIва техника университет апны йгIаныршу аспирантура дапхьатI. Ардзынба Адгур ауагIахъа млыкврхIара аунашвачпари аэкономики нархарала кандидат нхара йхчан, аэкономика наукаква дыркандидатхатI. Ауылагьи дгIашIамсуата асквш 2013 агIан РФ а-Президент йпны йгIаныршу къральыгIва къвырльыкъвхарала Академия апны аэкономика, акъральыгIва финансква йгьи акъральыгIва унашвахъцIара нархарала йдырраква йрылайырхIатI. Адгур Амиран йпа йкандидат нхара анихча амщтахь асквш 2010 йгIашIарышвта Абхаз къральыгIва университет апны йайрыпхьитI. Асквшква 2011–2013 рагIан Абхаз Республика а-КъральыгIва таможня комитет апредседатель аэкономика уысквала дикьангьашагIвын. Асквш 2013 йгIашIарышвта архъйара власть органква дрылапI, гIвысквша Абхаз Республика экономикала а-Министерства агIвыма-экономика уысквала ахъвшара даунашвачпагIвын. Асквш 2015 февраль угIалагата апрельдза Абхаз Республика а-Президент й-Администрация экономикала а-Унашвачпарта йнапIыцIан, ауи амщтахь йара ауи а-Министерства дахъадахатI. Асквш 2019 декабрь йгIашIарышвта датшагьи къральыгIва ъанатIакI гIайызхъарцIатI – Абхаз Республика а-Правительства а-Председатель йзаместительра. Асквш 2019 агIан аэкономика йгьи аполитика наукаквала Лондон апны аэкономика аисторияла йдырраква йрылайырхIахтI. Апхьахьа наука нхарата жвиз йымапI, ауат гIвмонографиякI рылапI. Ардзынба Адгур йнаука нхараква Абхаз Республика асоциальнаэкономика тшауацIыхрала ахачIвква, ахIаракьатра хвыц апны арынок аъаща датшагьи йырзынархапI. Асквш 2014 агIан «АпхъагылагIв шIа» уагIахъа согIа далауреатхатI йгьи «Йагъьу экономист» номинацияла дапхъагылагIвхатI. Ардзынба Адгур апрезидент ъанатIа дазабакIырныс мурад зичпазла азцIгIара джьауап гIайтуата араса йхIватI: – ХIреспублика апны йщаквгылыз аъаща учхIа гьауыхуашым, – йхIватI апрезидентра акандидат. – Абхазия апны аполитикква гIвгвыпкIта йагIвша ауитI: авласть знапIыцIцIра зтахъым ачыннкъвгагIвчва йгьи зны йчыннкъвгагIвыз. Ауат ртыпла тшанамырпсахуа гIаншитI, ауаса йангIалырныс гьрылшум. АуагIагьи авласть йгьазхъарцIахуам, хвыцгьи дугьи руачIвымшла рхъагвы гьаквым. Адгур Амиран йпа Абхазии Грузии разазаъащалагьи йгвгIанагра йхIватI. Ауи йшипхьадзауала, агрузинква Апсны ахъахвитра йадымгылуата йгьауашым, йанамуыхуагьи асквш 2008 агIан Абхазия ашта йызчIвым йыркIыта Грузия апарламент йнанауахвыз ахабза дрыдзхра атахъыпI. Апрезидентра акандидат йлихыз апрограмма апны хъадата йгIалкIгIапI акъральыгIва ахьыла ауагIа разхъацIара гIащаквыргылхра, ажвлара апны азахвара хъахьызлара, акъраль апIатIу щтIыхра, ашварагIварадара рыбагъьара, ауагIа рбзазара агъьчIвра, арыпхьара агъьчIвра, абызшва хчара датшагьи. Апрограмма йащатахатI Москва апны абхазква радкIылара ацхърагIарала йлырхыз «25 шагов развития экономики Абхазии» швъа. Ардзынба Адгур дтгIачвапI, хгIвысабичва гIадзынйыргылитI. Абхазия акъральгIвчва мартI а 22 Ардзынба Адгур Амиран йпа йыхъазла напIы щтIышвхырныс шваквгIазшIыхIтитI. Абхазия апрезидентра ака