АПХЬАХЬА ЛЮБИЛЕЙЛА ЙЛАЙХIВАХIВТI

Афилология наукаква рдоктор, апрофессор, академик Къарча-Черкес, Къабард-Балкъар, Адыгея республикаквала гIатгара зму анаука анхагIвы БЕКИЗОВА Лейльа лысквш 90 лыртлапIатI. Ауи лгвыргъьахъвла йлайхIвахIвтI Къарча-Черкес Республика а-Правительства а-Председатель УАЗ Аслан, арыпхьарали наукали КЧР аминистр КРАВЧЕНКО Инна, КъарчаЧеркес агуманитар рхъвыхраква ринститут адиректор КИТАОВ Виктор. Уаз Аслан литература нархарала, арыпхьарала, апхьахьа шIаква ргIадзныргылрала уыс ду зырхъйаз йгьи йзырхъйауа Бекизова Лейльа КЧР а-Хъада йразыра сальамшвъа литтI. Бекизова Лейльа асквш 1929, май а 29 ПсауычIадаха кыт (апхъала Кълычкт) апны дйытI. Асквш 1957 агIан Ленинград къральыгIва университет афилология факультет дгIалгатI. Йара ауи асквш йгIашIарышвта Къарча-Черкес агуманитар рхъвыхраква ринститут апны наука нхагIвыта, афольклор хъвшара, КЧР ауагIахъаква рлитература хъвшара друнашвачпагIвта дынхатI. Асквш 1973 агIан доктор диссертация лхчатI, наука нхарата йлыму 200 йрайхIапI. Ауи лгвымчIвара нхара йаквшахIатта «Орден Дружбы народов» йгьи чIахIра грамота щарда гIалквнадыргатI.