АСЛАВЯН ГІВЫРА АЩАТА ЩТІАЗЦІАЗ ДЫРТЛАПІАТІ

Къраль щарда рпны йдыртлапІауа аславян гІвыри акультури ры-Мш Къарча-Черкес Республика апынгьи ансисквша йацыркІитІ. Апхьахьаква, айщчва Кирилл йгьи Мефодий рчвахъабага ареспублика къральыгІва библиотека йачвыхъарамкІва йаныргІалпІ. Ауи адзхъа май а 24 йадахІвуата йанакІвызлакІгьи адиннкъвгагІвчва, ажвлара организацияква ргІащтийыгІвчва, ареспублика абзазагІвчва айззалитІ, Кирилл йгьи Мефодий уыста йдырхъйаз гІаргвалашвахитІ. Агвыргъьахъв НикольскIа кьльиса йгІатыцІыз адиннкъвгагІвчва рымгІвайсрала йджвыквылтІ. Ауи амщтахь Къарча-Черкес Республика а-Хъада йыхьызла ачвахъабага апны йгІайззаз тшырзынайырхатІ ауагІахъа уысквала, ажвлара коммуникацияквала йгьи печатьла КЧР аминистр йзаместитель Гузко Сергей. – Аславян гІвыри акультури ры-Мшла зымгІвагьи пхата сшвайхІвахІвитІ. Агвыргъьахъв ансисквша аславян къральква зымгІва рпынгьи йдыртлапІитІ, айщчва Кирилл йгьи Мефодий аурышв бызшва йащатахаз алфавит ъагІандыршаз ахъазла йрызхІвахІвитІ. УыжвгІанчІви Россия апны агвыргъьахъв асквш 1991 йгІашІарышвта гватра ду азалырхитІ, – йгІаликІгІатІ Гузко Сергей. Черкесск ПокровскIа кьльиса апротоиерей Нартов Александр йгьи адиннкъвгагІвчва агвыргъьахъв йалаз йрайхІвахІвтІ. Апротоиерей йшихІвазла, айщчва-апхьахьаква рамайчра абзирала агІвыри акультури дахІврала тшауацІырхитІ. – Ауат ргІаджвыквцІарала уахьчІва йъагІадзаз урышв бызшвала хІгІвырныс йгьи хІапхьарныс лшара хІымапІ. Кирилл йгьи Мефодий агІвыра агрек бызшва йгІахъырхта урышв бызшвала йъатаркІыз магІын ду амапІ. Ауат йрапшу агІвычІвгІвысква йанакІвызлакІгьи абанпараква рхъмаштылра йалазлуштІ, – йхІватІ Нартов Александр. Агвыргъьахъв йалаз драйхIвахIвтI КЧР Ажвлара палата апредседатель Молдованова Верагьи. Ачвахъабага йгІадгылыз абзазагІвчва йрыуата щардагІвы апостолква Кирилл йгьи Мефодий уыста йдырхъйаз хвы шаквцІауачву гІалыркІгІатІ, пхата йгІаргвалашвахтІ.