ЧЕМПИОН ЩАРДА ГIАДЗЫНЗЫРГЫЛЫЗ АРЫПХЬАГIВ

йынцIра апны гылартата йаму дзачIвызлакIгьи йдыритI. Ауи азгIвадара йащатапI. АуыжвгIанчIвиква аспорт бзи йырбара, ауи тшадыркIылра ахъазла нхара щарда акIвшитI. Асаби швапха бзи гIазхъихуаш ахIба данйаргвану йбзазащагьи ащтацитI. Арат амшква ЙынджьыгьчкIвын квтанай апхьарта апны КъарчаЧеркес Республикала гIатгара зму арыпхьагIв, атлетика ласыла аспорт амастерра акандидат ЦЕКЪВА Исуф ХIамзат йпа йзынархата спартакиада акIвшатI. Исуф ХIамзат йпа асквш 1942, апрель а 10 агIан ЙынджьыгьчкIвын дйытI. Йцри кыт агIсквша апхьарта дангIалга ХIабаз апхьарта дыцIалтI. Ауаъа дъадзапхьуз спортла йыквлагIвчва драгъьта тшгIайырбатI, агIахIвра дшазычпу збаз арыпхьагIвчва «Адиюх» хореография ансамбль йапхъахауа агвып дрыларцIатI. Асквш 1961 агIан ХIабаз квтанай апхьарта дангIалга къвырльыкъвхара дцатI. Асквш 1963 агIан Исуф Латвия архъвква руацIала йакIвшуз атлетика ласыла анкъвакъвраква дрылан. Ауаъа йгIатгараква ъахIаракIыз ахъазла къвырльыкъв ъайхуз йапхъахауа Москва агарнизон йрыму АчIахIра апхьага йыхьызгьи йсуратгьи аншвалтI. Ауаъа дангIахъынхIвых, асквш 1965 Ставрополь педагогика институт аспорт факультет дыцIалтI. Йара ауи асквш йцри кыт апхьарта нхара далаган, апхьарагьи анхарагьи ацйырцатI. Асквш 1968 агIан йбжьуз апхьарта афутболасыгIвчва Къарча-Черкес автоном областьла «Кожаный мяч» турнир апны апхъагылара гIатыргатI. Цекъва Исуф асквш 1960-ква рагIан Къарча-Черкесла йгьи Ставрополь крайла атлетика ласыла йагъьыз дрылапхьадзахатI. Ауи йгIатгараква ужвы йъагIадзазгьи йджьаущушта йаъапI. Метр 60 быжьлахъвгIахъасракIла, метр 100 – 10,8 лахъвгIахъасрала, метр 200 – лахъвгIахъасра 22 -ла дгIагIвуан. Цекъва Исуф асквш 1979 угIалагата асквш 1984-дза ХIабаз районла аспорт комитет дапредседательын. Ауи арыпхьагIвта сквш 40 дынхатI, агIахIвыгIвчва сквш 30 йбжьатI. Спортсмен щардагIв гIадзынйыргылтI. Йбжьуз агIахIвыгIвчва гвып КъарчаЧеркес автоном областьла апхьартаква руацIала зымгIва йрагъьын. Ауи йгIатгараква гIалыркIгIауата, асквш 2003 агIан «КЧР-ла гIатгара зму арыпхьагIв» йгьи асквш 2009 агIан «КЧР-ла анхара аветеран» хьызква гIайквнадыргатI. Исуф ХIамзат йпа йгIатгараква гIаргвалашвахуата ЙынджьыгьчкIвын кыт ажвлара Совет агIаджвыквцIарала апхьарта апны йакIвшаз аспартакиада «Алашара» жвлара адкIылара апны Гьадыгв Мурат унашва зхъицIауа «Развитие гражданского общества в абазинских населенных пунктах» хъвшара ауи адгалра йацхърагIатI, апхъагылагIвчва йырквнадыргаз асогIаква рхвгIатI. Ари атшын Цекъва Исуф сквш 40 дъанхаз апхьарта арыпхьагIвчва асасчва пхата йгIарпылтI. ЙынджьыгьчкIвын кыт ахIбачва р-Совет апредседатель Джьджьу Кърым, акыт ажвлара Совет апредседатель, «Алашара» жвлара организация апны «Абаза бызшва» хъвшара аунашвачпагIв Джьандар Мурат, ЙынджьыгьчкIвын квтанай апхьарта адиректор ХIаткъва ФатIима, Исуф ХIамзат йпа йыцынхаз, йынбжьагIвчва, йкытлагIвчва, йтгIачва, апхьагIвчва айззара йгIадгылтI. Джьджьу Льильа йгьи Быджь Назир йакIвдыршуз агвыргъьахъв апны арыпхьагIв йынцIра-бзазара мгIва гIахъызтIуаз аргылчIвква гIадырбатI. Сквшщарда йыцынхаз, йайрыпхьаз ргIагвалашвахраква йгIайззаз йрыцагIвыршун. – Исуф ХIамзат йпа йыхъазла бзирата йухIвуш щардапI, – йгIаликIгIатI Джьджьу Кърым. – Ауи нцIрата йымаз асабиква рбжьара йайттI. Арайонлагьи, ареспубликалагьи, адунейлагьи згIатгараква хIаракIхаз спортсмен щардагIв гIадзынйыргылтI. ХIара арыпхьагIв щардагIв хIыдынхалтI, ауаса Юсуф ХIамзат йпа йапшта гвылагьи псылагьи зынхара йадгылуаз дгьрыламызтI. Физкультурала дарыпхьагIвыз акIвымкIвагьи химияла апхьара сахIатквагьи йырцун. Ауи йбзирала апхьарта апны йадыргалыз агIахIвыгIвчва гвып фестиваль щарда рпны йапхъагылагIвхатI. ХIарыпхьагIв уыста тшыззынайырхалакIгьи йнардзата йырхъйун. Квырмыш йзысчпауата сразыра ажваква йзынасырхитI. Ужвыгьи дызгIвадата сквшщарда гIаницIрагIатI. Джьджьу Кърым физкультурали спортли КЧР аминистр Узденов Рашид йымачв зцIу ачIахIра грамота Цекъва Исуф йыйттI. ЙынджьыгьчкIвын квтанай апхьарта адиректор ХIаткъва ФатIима йшылхIвазла, Исуф ХIамзат йпа асабиква аспорт тшадыркIылра ахъазла уыс щарда йхатI. ЙагIвсыз асквшышв асквш 60-ква рагIан ауи дыззынадзаз агIатгара хIагIаква надмыркъвуа йайрыпхьаз, ужвы йара йапшта бжьагIвыта йынхауа ачкIвынчва йуыс надырдзахитI. – ХIспортсменква ззынадзауа йхIаракIу агIарбараква уара ухатIгьи алапI. Ауат швапха пшдза гIазхъырхуаш ахIбата урымапI. Ага тшпсщара учIвахызтынгьи, убжьагажваквала йанакIвызлакIгьи кьангьашагIвта уырзалитI. УызгIвадата ужвыгьи сквшщарда хIапхъа угылазтI, – лхIватI ХIаткъва ФатIима. Апхьарта гвып рыхьызла ауи Цекъва Исуф бзи йбауа шахмат, шашка йгьи нард хъвмаргаква согIата йылттI. ЙынджьыгьчкIвын муниципальна гIаныршара ажвлара Совет апредседатель Джьандар Муратгьи Цекъва Исуф йайрыпхьаз чкIвыныргIа йзадыргалыз асогIаква йыйттI. Ари атшын йгIачважваз зымгIва Исуф ХIамзат йпа аспорт бзибарата йазйыму, йынцIра шабгу асабиква рбжьара йшазынайырхаз гIалыркIгIатI. Агвыргъьахъв йгIадгылыз Исуф ХIамзат йпа аинститут йыцапхьаз, сквшщарда нбжьагIв цIабыргыта йыцу Джерештов Заудин ажва пхаква йзынайырхатI. – Сара Исуф дсынбжьагIв цIабыргыпI. Сквшщарда цIуата хIащтаныкъвитI. Ауи йынхара дазцIабыргыз акIвымкIвагьи йтгIачвагьи швабыжта гватра ду рзалихитI, щарда цIуата адуней зхIваджьыз йхъапщыла Римма дйыцхмызтынгьи йпи йпхIи цIагылагIв багъьата дырзалитI, – йхIватI Джерештов Заудин. Айззара швабыж пхата йакIвшатI, Исуф дызлаз гIаншара щардагьи гIаргвалашвахтI. Ари агвыргъьахъв адызгалыз лразыра ажваква рзыналырхатI Исуф йпхIа Айсан Лариса. – Айззара адызгалыз акыт ажвлара Совет, апхIвысква р-Совет, «Алашара» жвлара адкIылара анхагIвчва, хIцри апхьарта арыпхьагIвчва гвып сразыра ажваква швзынасырхитI. Араса пхата саба швъайайхIвахIвыз йсгвапапI, апхьарта анхагIвчва йанакIвызлакIгьи агвыргъьахъв мшква рагIан гватра йзалырхитI, – лхIватI Айсан Лариса. – Саба йгIатгарата йгIалыркIгIаз срыквгIашIасхуата йацсцIахра стахъыпI анкъвакъвраква рагIан йхIатладзу хбыгIвтшчIваракI шгIайадзаз. Ауат рымщтахьгьи дангIащаквгылх йынхара гькIайымрышвтI. УахьчIвала сара сшахагIвазула ауи йгIатгараква Лагъь КIавкIазла заджвгьи дгьырхьымдзастI. Хвысквша рахIа снамдзауата саба шахмат сасуа сибжьатI, саргьи сащахIба Азамат дызбжьахын, ауи йгIашIарышвта зынгьи сгьимайгIайхтI. Саба хIхIабльа асабиквагьи йалкIгIата гватра рзалихуан. Анкъвакъвраква дангIайхуаз хоккей йызласуаш аъамапсымаква, атопква щардата йрызгIайглун. Атларыджаквала хIныкъвауа хIибжьун. Чемпион щардагIв гIадзынйыргылтI. Саба, сразыра ажваква узынасырхитI, уара ухъатала ачемпионра уъазынамдзаз ашвхIаусыгIваква сацкIыс заджвгьи йгьидырам, ауаса сара сыхъазла уара уапхъагылагIвпI, учемпионпI. Асасчвагьи акыт абзазагIвчвагьи рыхъазла ари агвыргъьахъв шIыцрата йырзалтI, Исуф ХIамзат йпа йынцIра-бзазара шакIвшаз йахагIвазарныс рылшатI. Айззара йгIадгылыз рыхъазла «Марашта» хореография ансамбль гIахIвытI, апхьагIвчва мшыркъвара нархара змаз апьеса хвыцква гIадырбатI. Акультура программа амщтахь аспорт анкъвакъвраква джвыквырцIатI. Атлетика ласыла, шахматла, волейболла аспортсменква анкъвакъвтI. Аспартакиада швабыжта йджьащахъван, апшIагылара ду рызбжьата апхъагыла гIатызгаз акубокквала, аграмотаквала йгьи амедальквала йгIалыркIгIатI. Шахматла ЦЕКЪВА Али Сафарби йпа апхъагылара гIатигатI, йгIвбахауа агыларта АГАЧА МухIарби йадзатI, йхпахауа ДЖЬАНДАР Адам йквнадыргатI. ЙынджьыгьчкIвын кыт абзазагIвчва хгвыпкIта тшыршан волейбол йастI, акытцIыхъва абзазагIвчва апхъагылагIвхатI, йгIвбахауа – акытквта рспортсменква, йхпахауа акыт ахъа ачкIвынчва йыргатI. Атлетика ласыла йапшым ахъвква рпны ргIарбараквала йапхъагылагIвхатI АЖЬИ Амаль, УАЗ Дали, ЧКВА Аббас, САИТОВ Амаль, ЧКВА Алим, МЫХЦ Руслан, ДАХЪВМА Эльдар, ЦЕКЪВА Дамир, БЛЬАНАУА Элина, ХВБИ Хадиджа, УЫРЧЫКЪВА Льильа, ДЖЕО Дана, КЫКI Динара, БЫДЖЬ Лина, ЧКВА Амалия. ЙынджьыгьчкIвын кыт абзазагIв, адунейла гIатгара зму аспорт амастер, «Алашара» жвлара адкIылара йаланакIуа «Спорт» хъвшара унашва ахъызцIауа Чква Расул ари йапшу хIспортсмен бергьыльква йырзынарху айззараква щардала йадгалра атахъыта йпхьадзитI. – Исуф ХIамзат йпа йзынарху атурнир йквнагадзауата йадыгIгалтI. ХIара хIшIангьи йгIатгараква рхабарква йанакIвызлакIгьи йыгIгIалун, дшлегкоатлет бергьльу гIдыритI. Апхьарта данынхуз хвы йзыгIбауа, швапха гIайхъыхIхуан, – йхIвитI Чква Расул. – АйцIбачва Цекъва Исуф бзита дрымдырырныс ауаштI, ауи йгIалцIла уахьчIва йакIвшауа аспартакиада хIуыжвгIанчIвиква рыхъазла магIын ду амапI, хIхаквлагIв йгIатгараква бзита йрыхагIвазарныс рылшатI. ХIара аспорт йадкIылу хIыгIвычIвгIвысква ршвапхала йгIадзынгылуа абанпарагьи ауи бзи йдхIырбарныс мурадта йхIчпатI. УахьчIва акыт ауацIала анкъвакъвраква акIвхIыршатI. ХIапхъахьыла ари атурнир датша кытквагьи гIалагIжьырныс хIгвыгъапI, рахIагьи йауацIыхта йакIвхIыршуштI. Адгалра уысква рпны цхърагIара гIахIызрадзаз зымгIвагьи хIырзыразпI. Ари атшын Исуф ХIамзат йпа швабыжта гвалагIваласра щарда йылан, нцIрата йымаз асабиква дрыдынхалуа йгIазгыз арыпхьагIв зынгьи йгIатгараквала йхъа гьимыртшхъватI. Йуыс нардзата йырхъйауа, чкIвыныргIа ргIатгараква драйгвыргъьауа дгIабзазатI. Исуф ХIамзат йпа йзынархата йакIвшаз аспартакиада йгIадзынгылуа аспортсмен шIаква шаргвышхвуш йазхъахIцIитI. ЙхIщардазтI швапха пшдза гIазхъыхIхуаш ахIбачва пшдзаква. Исуф ХIамзат йпа згIвадара багъьа йымата ужвыгьи сквшщарда хIапхъа дгылазтI.