Актуально В КЧР определили победителя регионального этапа Всероссийского конкурса »Учитель года России» - 2024 СКФО 1,4 млн тонн ставропольской сельхозпродукции продали за рубеж в 2023 году СКФО В Дагестане временно закрыли зоопарк из-за отсутствия лицензии СКФО Где поесть том ям в Черкесске СКФО В Чеченском педколледже состоялся «Вечер нашидов»

АСАБИКВА РТШПСЩАРА ГВЛАХIАРАПI

28.06.2019 242
АСАБИКВА РТШПСЩАРА ГВЛАХIАРАПI
ква рыпхын мшква сабап алата йшакIвшуш апшта Россия Федерация аунашвачпагIвчва уыс щарда дырхъйитI. ХIреспубликалагьи ауи анархарала йчпачIву надырхъитI, асабиква асанаторийква, йапшым нархара зму алагерьква рпны тшпсырщарныс йырщтиитI. Апхьартаква рпны йынхауа алагерьквагьи асабиква драйгватI. Псыжв йгIвбахауа квтанай апхьарта апны йынхауа алагерь й-1–4-хауа аклассква рапхьагIвчва йрыуата сабита 28-гIв тшпсырщитI, ауат апхьарта адиректор КIЬЫЧА МухIамад ХIамзат йпа алагерь анхара йаназаману йшджвыквнацIуш апшта зымгIва адигалтI. Ахвыцква вожатата апычIв классква рарыпхьагIвчва рыцпI. – ХIара асабиква шIыцракI шдхIырбуш ацIыхъва хIтагылапI. Ауат ртшпсщара мшква сабап шрылазлуш, рыла шпшуаш уыс хъадата хIпахь йхIыргылитI. МшигIадза асабиква хIызларыдынхалуаш программа хIымапI. ЙгIауахвырквын, йапхъахауа амш асабиква шабадыруаш апшта дасу йхъа ахъазла алацIара хвыцкI гIахIархIвтI, рахIа бзита уыса зхIвауала анкъвакъвра акIвхIыршатI. АуысагIв Пушкин Александр йуысари йынцIра-бзазари йырзынархаз амш акIвхIыршатI, – лхIватI апычIв классква рарыпхьагIв ДЖЬМАКЪВЫЛ Нурйат Йараджьыб йпхIа. Алагерь апны амш ауацIа асабиква хын йдырчитI. АмацIаугIвчва Рамазан Санйат, ХIашвцIа Мадина, Ламхъва Маридат ансимшы хъагIата, къуат ацIата йчIащыгIвыу арызкъква рзырмацIауитI. – Сара алагерь апны хIшдырчауа швабыжта йсгвапхитI, хъагIадзата йхIзымацIауитI. Арахьарат аклассква рпны йапхьауа чкIвынчва щарда нбжьагIвта йскIытI. ХIара апахь апны топ хIаситI, гIакIы-гIакIы хIхъвмаритI. Алагерь щымтигIадза сгвыргъьауа сгIайитI, – йхIвитI йпщбахауа акласс йгIалгаз Шогьан Шамиль. Йапхъахауа акласс йгIалгаз Джьанымбей Саида зымгIва рацкIыс Черкесск абассейн йанцауа гIалылхитI. Ауи тшылкIвабарныс бзи йылбитI. Асабиква абассейн апны йдзцауа тшырбжьитI, лахIвара шIыц щарда гIарыланацIитI. Алагерь апны асабиква шIыцрата йырбаз, ртшпсщара мшква джьащахъвата йшакIвшаз ргвы пхата йгIатахуштI.  Псыжв йапхъахауа Гимназия апны «Солнечный городок» ахьызта лагерь нхитI. Алагерь аунашвачпагIв МАЛХIВАЗ Майа Павел йпхIа йшылхIвазла, сабита 28-гIв рызгIайтI. Ауат гIвгвыпкIта йыршан, агвыпкI «Лучик», арахьари «Звездочки» рыхьырцIатI. Алагерь апны асабиква йрыдынхалитI ШВХIАГВАЩ Зарема ИсмагIиль йпхIа, КIЬЫЩМАХВА Дарья Валентин йпхIа, ШВОТЫКЪ Венера Джьамбот йпхIа. – Алагерь тыпта йгIахIнатуа рыцIа ймачIпI сабита йгIайырныс зтахъу рпхьадзара ацкIыс. Ауи йгIалцIла, апхьари аспорти рпны адахIвраква зму, атгIачва дуква рпны йгIадзынгылуа, зан йа заба дызмахым асабиква апхъа йхIыргылитI. МшигIадза йазалху программала хIрыдынхалитI. Щымта асахIат а 8.30 хIалагитIта а 14.30-дза йапшым ахъвмарщаква, айчважвараква акIвхIыршитI, – лхIвитI МалхIваз Майа. Алагерь апны асабиква рыпкъ райшата йшыркIуаш, ашварагIварадара йазынарху ахабзаква шырдыруашла айчважвараква адыргалитI. Черкесск йаныргIалу абассейн, абиблиотека асабиква дырцалитI. – Щымта асабиква алагерь йангIайра амщтахь атшрычIвайраква хIчпитI, йчитIта, уадыргIвана йапшым ахъвмарраква, анкъвакъвраква адыгIгалитI. АхIвсса гIахIвырныс, уарад рхIварныс швабыжта бзи йырбитI, ачкIвынчва топ йаситI, акытчаквагьи гьырчвымыгъым, – лхIвитI ШвхIагващ Зарема. Алагерь апны мацIаугIвыта йынхауа БЕЖАН Света, КЕНЧЕШАОВА Ирина, ГIАП Фарида, ГВАГВ Айнур йдрыхIазыруа афачIвква асабиква йыргвапхадзауа йырфитI. – Сара араъа йырмацIауа акашаква, аборщ бзи йызбитI, закIгьи гIанызымжьуата йсфитI, уадыргIванагьи ачкIвынчва топ хIаситI. МшкIгьи агIвсымщтуата алагерь тшпсщара сгIайитI, – йхIвитI йапхъахауа акласс йгIалгаз КIьашвауа Алан. АхIвсса «Волшебные краски» суратгIврала алагерь ауацIала анкъвакъвра йалалитI, апазлква азыркIкIитI, мхвыла йапшым апкъыгIваква напIыла йырчпитI. – Апахь асфальт апны суратгIвра швабыжта бзи йызбитI, ауи акIвымкIвагьи сгIахIвитI. Араъа йхIзырмацIауа йсгвапхадзитI, – гIахIалхIвтI Чква Эвилина. Асабиква амш ауацIа уысдъа йыгьгIанхум, йапшым анкъвакъвраква йрылалитI, рыршIыйара тшауацIназрыхуаш, ракъыль зрыпшгIуш амальква арыпхьагIвчва йрызгIарауитI. Ахвыцква рыпхын мшква сабап алата йакIвдыршитI, рызгIвадара агъьырчIвитI, нбжьагIвчва йрабадыритI.
242 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный