«АТШАУАЦIЫХРА МГIВА ХIЫГЬТЫЦIУАШЫМ»

Къарча-Черкес Республика йгьи Черкесск город рымшква йрыдахIвуаз агвыргъьахъв айззара «АдзыгIвбжьа ЙачIва» тшпсщара парк йаныргIалу Амфитеатр апны йакIвшатI. Ауи йалан Лагъь-КIавкIаз Федеральна округла РФ а-Президент йгIащтийыгIв МАТОВНИКОВ Александр, Лагъь КIавкIаз ауысквала РФ аминистр ЧЕБОТАРЕВ Сергей, КЧР а-Хъада ТЕМРЕЗОВ Рашид, Ставрополь край агубернатор ВЛАДИМИРОВ Владимир, Адыгея Республика а-Правительства а-Председатель НАРОЛИН Александр, «Фонд содействия реформированию ЖКХ» а-УнашвахъцIарта апредседатель ЦИЦИН Константин, хIреспублика акъральыгIва власть органква, ажвлара адкIылараква ргIащтийыгIвчва, агородкви арайонкви рхъадаква, адиннкъвгагIвчва, хIшIыпIа абзазагIвчва. Агвыргъьахъв апкъ йтата Матовников Александр, Чеботарев Сергей йгьи Цицин Константин атшпсщара парк апны амзагIв цIлаква ларцIатI, «Воину-Освободителю» чвахъабага ащапIы ахIврапшдзаква щтIарцIатI. СКФО-ла РФ а-Президент йгIащтийыгIв Матовников Александр агвыргъьахъв айззара йалаз хIреспублика йгьи Черкесск город рымшквала пхата драйхIвахIвуата йшгIаликIгIазла, сквш 26-ла утхъахта Къарча-Черкес ауагIахъаква йнарахвыз ащаквыргылра Россия йузакъвымхуаш хIшIыпIа атшауацIыхра йащатахатI. – УахьчIвала КъарчаЧеркес апхъала йчIвырхъитI, аэкономика, асоциальна тшауацIыхрала змагIны дуу ахачIвква архъйитI. Ауат ахачIвква зымгIва ауагIа рбзазара анадзара агъьчIвра, амамыри атынчри ррыбагъьара йырзынархапI. Ареспубликагьи, ауи аквта – Черкесск городгьи апхъахьылагьи акъагIара мгIва йтымцIыргIатI, – йхIватI Матовников Александр. Ауи агвыргъьахъв йадахIвуата Россия а-Президент Путин Владимир йразыра швъаква риттI Черкесск город амэрия амлыкв йгьи акоммунальна унашвахъцIарта знапIыцIу Камурзаев Валерий, Черкесск апны «Макс-М» АО афилиал адиректор Гочияев Борис, афедеральна мгIва агентства йаланакIуа «Кавказ» федеральна автомобиль мгIваква рунашвахъцIарта адиректор йзаместитель Уаз Анатолий, акъральыгIва къвырльыкъвхара аветеран Перепелица Николай. Лагъь КIавкIаз ауысквала РФ аминистр Чеботарев Сергей йгIачважвара апны Къарча-Черкес апсахраква дахIврала йъакIвшауа ашIыпIаква йшрылапхьадзу йхIватI. Къарча-Черкес апсабари апсахра бзикви тшрыхадыргIвазарныс ртахъыта йшвызгIайуа рпхьадзара сквшигIадза йалахIитI. ШвшIыпIа йымдзуа ацIас пшдзаквала, йбайу культурала, датша закIгьи йапшым апсабара аъащала йбергьльыпI. Ауаса йхъаду ауат адахIвраква амайчра нхарала йгIатызгауа, зцри шта йазцIабыргу ареспублика абзазагIвчва ракIвпI. Къарча-Черкес апны уагIахъата 80 райхIа бзазитI, адинква зымгIва аъапI. Ауат зымгIвагьи йацыта рсабиква гIадзындыргылитI, айшвакI апны тшазыркIкIитI, рджькIахбаста агIвыршитI. Ауи акIвпI йаргьи Къарча-Черкес апахь йгылу ахачIвква дахIврала йызхъйауа, – йгIаликIгIатI Чеботарев Сергей. Ауи Лагъь КIавкIаз ауысквала РФ а-Министерства аразыра сальамшвъаква зитыз йрыуапI «Каскад» акционер жвлара акоммерческа директор Борлаков Шамиль, «Резинотехник» завод аучасткIа аунашвачпагIв Хъвана АхIмад, «Сады Карачаево-Черкесии» нхарта абухгалтер Татаринова Елена. ХIреспублика абзазагIвчва ахIвахIвра ажва пхаквала тшырзынайырхатI Ставрополь край агубернатор Владимиров Владимиргьи. Адыгея а-Правительства а-Председатель Наролин Александр агIвреспубликакI рпарламентква щарда цIуата рацынхара, аэкономика, арыпхьара, анаука, акультура уысквала ршвапха амдараква, Лагъь КIавкIаз ауацIала ажвлара рагвынгIвыри ртынчри рхчарала ращтаныкъвара пшдза хIапхъахьылагьи йшшIымчIвуш йрыбагъьатI. ХIреспублика а-Хъада Темрезов Рашид асасчва агвыргъьахъв хIыцагIвыршарныс йъагIайыз ахъазла дшырзыразу йхIватI. Ауи датшагьи йшгIаликIгIазла, Россия а-Президент Путин Владимир йгьи РФ а-Правительства рцхърагIарала КъарчаЧеркес апны змагIны дуу апсахраква ншитI: аспорт тыдзква, асоциальна нхартаква, азгIвадарахчартаква, апхьартаква, асабигIзартаква руыхвитI, аэкономика тшарыбагъьитI, ауагIа рбзазара щтIыцIитI. РФ а-Президент Путин Владимир й-Унашвала асквш 2022 агIан КъарчаЧеркес йахъыцIуаш асквшы 100 хIыртлапIуштI. Ари атшын «КъарчаЧеркесла гIатгара зму» ЧIахIра хьзы йанкъвгагIвхатI арыпхьара, анаука, азгIвадарахчара, акыт млыкврхIара, акультура, аспорт, ауыхвара, ахабарргагаква йагъьу рынхагIвчва. Ауат дрыуапI «Къарча-Черкес Республикала гIатгара зму акультура анхагIвы» ЧIахIра хьзы йанкъвгагIвхаз Абаза муниципальна районла акультури атшпсщари р-Квта аъачIвагIагIв Айсан Аминат ИсмагIиль йпхIа. Темрезов Рашид «За заслуги перед Карачаево-Черкесской Республикой» орден йквнайыргатI хIреспублика йапрезидентыз Батдыев Мустафа Азретали йпа. Айззара йалаз хIреспублика йгIаквчважвауа афильм йадырпшытI, агвыргъьахъв рашваквали ргIахIвраквали йдрыпшдзатI Къарча-Черкес йгьи агвла республикаква рартистква.