АПХЬАРТА ШIЫЦ ГIАХЪЫРТIЫТI

ЙцIыхъвахауа асквшква хIреспублика апны апхьарти сабигIзарти алата арыпхьара нхартата хвба гIахъыртIхьатI. Сентябрь а 7 КЧР а-Мш андыртлапIуз атшын ужвыгьи апхьарта шIыцкI ашвква ртIытI. Ауи Прикубань муниципальна район йаланакIуа Холоднородник кыт апны йыруыхватI. Апхьарта шIыц ангIахъыртIуаз айззара йалан Лагъь КIавкIаз ауысквала РФ аминистр ЧЕБОТАРЕВ Сергей, КЧР а-Хъада ТЕМРЕЗОВ Рашид, арыпхьарали наукали КЧР аминистр КРАВЧЕНКО Инна, арыпхьагIвчва, апхьагIвчва, акыт абзазагIвчва. – УахьчIва хIъану акыт абзазагIвчва сабигIзарта зланакIуа апхьарта шIыц швзыруыхватI. Арыпхьара квта апшцIа аспорт площадкIаква, ахъвмарыртаква амапI, спортзал гIальамат алачпапI. Араъа йапхьуш, йырбжьуш асабиква дырра цIола шшвауаш, гIвычIвгIвысагIара швылата, афизкультури аспорти шврыдкIылата швшгIадзынгылуаш йазхъасцIитI. Араъа йшвауаш адырра шIыцква гIашвцхърагIауа агIатгараква швырзынадзаргIатI, швыхьыз хъарата йгарагIатI, – йгIайззаз драйхIвахIвуата тшырзынайырхатI Чеботарев Сергей. Арыпхьара нхарта шIыц ауыхвара згIаджвыквцIару Темрезов Рашид КЧР а-Мш агвыргъьахъвла йгьи йрауыз ауыжвгIанчIви апхьартала акыт абзазагIвчва драйхIвахIвтI. – Ари акыт апны апхьарта уыхвара ахъазла щардагIвы тшгIасзынадырхатI. Апхьартажв тшваран, асабиква кьазула йапхьун – щыбжьандза гвыпкI адрыпхьун, ауат рымщтахь апхьарта йцуз асабиквагьи хъвлапныдза арыпхьагIвчва рыдынхалуан. Ари акыт апны арыпхьара уысква агъьхIчIвуата, ауагIа рахIвара хIырхъйауата сабигIзарта аланакIуата апхьарта шыруыхвуш схъатала йщаквсыргылтI. УахьчIва абар швари хIари уыжвгIанчIви арыпхьара квта гIахъхIтIитI. Арыпхьара нхарта апшцIа аспорт площадкIакви ахъвмарыртакви аныргIалпI, апхьарта йаланакIуа аспортзалгьи йапшым атшыбжьаракви анкъвакъвракви йрыквыргIапспI. ХIара апхъахьылагьи акытква ртшауацIыхрала, ауагIа рбзазара агъьчIврала анхараква акIвхIыршуштI. Асквш 2019 агIан Счастлива кыт апны культура Тдзы ауыхвара джвыквдхIырцIарныс хIагвынгIвытI. Ауи РФ а-Президент Путин Владимир акъральыгIва власть органква рпахь йыргылуа ахачIвква йрыуапI. ХIара арыпхьара, акультура, аспорт ртшауацIыхра, анхара тыпква ргIаныршара, ауагIа рбзазара агъьчIвра хIазынхарныс хIборчпI. – йхIватI Темрезов Рашид. Ауи йшгIаликIгIазла, хIреспублика апны арыпхьара, акультура нхартаква, аспорт объектква руыхвара йацызкIуа Лагъь КIавкIаз ауысквала РФ а-Министерства ацхърагIарала хIышта апны апсахра бзиква ншитI. – УахьчIва агвыргъьахъв йалу Чеботарев Сергей унашва зхъицIауа аминистерства ацхърагIарала апхьартаква, акультура нхартаква, аспорт объектква ргIаныршарала апроект пхатшаква абзазара йалагIжьитI. Ауи ахъазла аразыра ажваква йзынасырхитI Лагъь КIавкIаз ауысквала РФ аминистр Чеботарев Сергей. Йыхьыз схIвара стахъыпI Прикубань район атшауацIыхра къару ду алазцIаз, ауагIа йраргваныз, рбаргвыраква гIазгвынгIвуаз арайон йаунашвачпагIвыз Казиев Хвсейн Магомед йпа. Ауи ари апхьарта агIахътIра швабыжта дазпшуан, ауаса йыла йгьамбатI, мшквакIла утахъахта адуней йхIваджьтI, – йхIватI КЧР а-Хъада. Холоднородник кыт абзазагIвчва ркытлагIв Инамуков Башир йыхьыз арыпхьара нхарта шIыц йахъырцIатI. Ауи «К-8» атом дзыцIахь хъвыхI даквчIвата къвырльыкъв шихуз пхастала дыдзтI. Апхьарта ангIахъыртIуаз Темрезов Рашид Россия а-Фыр Белавенцев Олег апхьарта амузей согIата йазичпаз адзыцIахь хъвыхI аквпшыра зму ачвахъабага арыпхьара нхарта аунашвачпагIв йлиттI. Акыт абзазагIвчва йгьи арыпхьагIвчва гвып рыхьызла йгIачважваз Казакова Рима сабигIзарта зланакIуа апхьарта шIыц уыхвара йацызкIыз хIреспублика, Лагъь КIавкIаз ауысквала РФ а-Министерства рунашвачпагIвчва дшырзыразу гIалылкIгIатI. Айззара ацIыхъва йаннадза асасчва апхьарта гIахъыртIуата алентIа къапщ пыркъытI. УадыргIвана арыпхьара нхарта ауацIа шаныргIалу йапшырныс йдрайгватI. Апхьарта сабита 180-гIв йырзалхпI, ауат ъапхьуш аклассква, аспорт йгьи акультура айззара йрыквыргIапсу азалква шандыргIалыз зымгIвагьи арыразтI. Апхьарта йыцIамылс рыхъазла йырчпаз асабигIзартагьи гьхвыцым. Ауаъа сабита 75-гIв рыгIзуштI, апхьарта йаздрыхIазыруаштI. Темрезов Рашид йгьи Чеботарев Сергей асабигIзарта апны ахъвмарыртаква, асабиква ъачвуаш апещква, амацIауырта шырчпаз ргвапхатI. Ари арыпхьара квта шIыц Темрезов Рашид йщаквыргылра амщтахь асквш 2013 агIан ауыхвара джвыквылтI. Абашта айсра Ду апхъала йыруыхваз апхьартажв нырххын, гIвэтажкIла йалу арыпхьара квта руыхватI. Акыт абзазагIвчва йырзырчпаз асогIа швабыжта йайгвыргъьатI.