АФАТАР ШIЫЦКВА РЦIАПХАКВА РЫРТТI

Асквш 2022, январь а 12 Къарча-Черкес йахъыцIуа асквшы 100 йадахIвуата ари атшын 13 тгIачвакI афатар шIыцква рцIапхаква рырттI. Афатарква ъаныргIалу Черкесск город, Свобода урам, й-62-хауа атдзы апны гвыргъьахъв адыргалтI. Ауи йалан КъарчаЧеркес Республика а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель йзаместитель ГОРДИЕНКО Евгений, Черкесск город амэр БАСКАЕВ Алексей, асасчва йгьи абзазагIвчва. Темрезов Рашид ареспублика абзазагIвчва агвыргъьахъв мшыла пхата драйхIвахIвтI. – УахьчIва щардагIвы рыхъазла магIын ду зму мшыпI. ЖвахтгIачвакI рбзазара аъаща агъьырчIвырныс рылшуштI. Черкесск йаланакIуа «Северный» район мшигIадза тшауацIнахитI. Араъа йбзазуш атгIачваква рыхъазла апхьартаква, асабигIзартаква, амедицина нхартаква, социальна нархара зму аобъектква уыхвапI. Ауат рансимшы тынчызлара ахъазла йатахъу зымгIвала йадгалапI. УахьчIва афатар шIыцква йырталхуа згIвадара багъьа рзыстахъпI, саби щарда гIарыцIагылуа, амамыри абаракьати рыгымхаргIатI, – йхIватI а-Хъада. Черкесск, Демиденко урам, й-155-хауа атдзы апны йбзазуз Меремкъвыль Марита МухIамад йпхIагьи ари атшын афатар шIыц ацIапхаква гIалырттI. АпхIвыс йшылхIвауала, лынцIра апны ауи магIын ду зму гIаншарапI. – ХIъабзазуз апещ йгIаквухырквын, йгIахIыртыз афатар швабыжта йлашарапI, йдупI. ХIреспублика аунашвачпагIвчва аразыра ажваква рзынасырхитI, схъатала швабыжта сразыпI. ГIвымчыбыжькI руацIала, АлахI йхIвузтын, хIгIатыпахырныс хIмурадпI, – дгвыргъьауа йылхIвитI Марита. Фатар гIазыртыз зымгIвагьи йгIардахIвыз йайгвыргъьатI, рбзазара рыцIа йшмайрахуш гIалыркIгIатI.