АПХЬАРА СКВШ ШIЫЦ ЙАЗАДЫРГАЛТI

АуацIа уысквала КЧР а-Министерства йгьи ауи апны йгIаныршу Ажвлара совет ргIаджвыквцIарала хIреспублика апны «Помоги пойти учиться» акция агIсквша цIуата йадыргалитI. Ауи ззынарху збзазара баргву атгIачваква рсабиква апхьара сквш шIыц йаздрыхIазырырныс цхърагIара рзыгIаныршара акIвпI. ХIызту асквш акция йацыркIтI хIаквымхарала афедеральна къвырльыкъвхарта КЧР-ла ахъвшара, хIреспубликала асуд приставква р-УнашвахъцIарта, Черкесск городла «Межрегионгаз» нхарта, Ащтанкъвцара комитет, «Россети» Карачаево-Черкесскэнерго» нхарта, Къарча город округла адепутат ЧОТЧАЕВ Шамиль йгьи ауагIа кIьыдаква. Август а 14 сабита 100-гIвы райхIа ран-рабачвагьи рыцта ауацIа уысквала а-Министерства йгIадгылтI. Ауат йызгIвадата, бзита тшпсырщата апхьара сквш шIыц йадгылхырныс рзыртахъта пхата йрайхIвахIвтI КЧР-ла МВД аминистр йзаместитель СЕРЕДА Александр, экономика тшауацIыхрала КЧР аминистр НАКIВАХВ Али, МВД апны Ажвлара совет аунашвачпагIв АТАБИЕВА Мария. «Оранжевое небо» ткван анхагIвчва асабиква йрыларшаз ашар зигIваква рнашх швабыжта йгIащтIырхтI, ауат ажвгIванд йаларжьуата йрымбахындзыкIьа йнардастI, «Регион-фрост» нхарта агIащтийыгIвчва йгьи аволонтерква асабиква марож рызгIаргтI. ЙащтагIайуата ауат рахIагьи согIа бзи рызпшуан. МВД автобусква йрыквдырчIван, апхьарта йызлацахуаш чгIвыча шIыц рзырхвгIарныс аткван йыргатI. Ауаъа дасу дыззыбжу, йгвапхауа чгIвыча, щапIхъацIа йгьи апхьага дгалчIвква гIалырхырныс рылшатI. АйгвыгIврала йкIвдыршаз ашIаква ран-рабачва сквшигIадза ари апш гвчIагIвра ъарзыгIандыршауа ахъазла акция адгалагIвчва аразыра ажваква рзынадырхатI.