АРЫПХЬАРА ДЖВЫКВЫРЦIАХЫРНЫС ЙХIАЗЫРПI

СынчIва коронавирус ашIашIкIгIара згIва йащтагIайыз аквыргъвгъвараква арыпхьарагьи аъаща баргвы йтанаргылтI. ХвымызкI цIуата апхьартаква рынхара псахра алата йакIвдыршитI. ЙгIаргванхауа апхьара сквш шIыц асабиква апхьартаква йдрайгвахырныс зымгIвагьи айгвгъитI. ХIреспубликала апхьартаква дрыхIазырхуата йапшым арчIаджьра нхараква акIвдыршатI. Абаза муниципальна район администрация арыпхьарала йгьи культурала а-УнашвахъцIарта ахъада МАРТАЗА Зимфира МхIамат йпхIа йшылхIвазла, арайон йаланакIуа апхьартаква зымгIва апхьара сквш шIыц йазыхIазырпI. – Абаза муниципальна район администрация арыпхьара хъвшара цапхьартакI, хвсабигIзартакI, азъазара КвтакI аланакIитI. Ауат зымгIва апхьара сквш шIыц асабиква драйгвахырныс йазыхIазырпI. ЙъакIвызлакIгьи йшхIылшузла арчIаджьра нхараква акIвхIыршатI, абльынква гIаквырчватI, йшвра атахъыз ршвытI, рчIаджьра йазыбжаз арымдзаква, астолква дырчIаджьтI, амзаква рпсахтI. СынчIва йалкIгIу гватра ашварагIварадара йазалхIхитI. А-Федеральна программа апкъ йтата Къвбина квтанай апхьарта апны амцаблыра сигнализация гIадыршIыцхтI. Арахьарат зымгIва рпны «Первичные средства пожаротушения» атахъыраква йрыквыргIапста йандыргIалхтI, мцаблыра аныншара агIан йгIадрысабапуа аджвылцIыртаква йырхьпшытI, – лхIвитI ауи. СынчIва хIкъраль а-Президент Путин Владимир апычIв классква рапхьагIвчва хвыдъа пхата йдырчарнысла йунашва дырхъйара ахъазла апхьартаква рчартаква зымгIва йатахъу рымапI, рчIаджьра йазыбжаз ахIаквква йырхьпшытI, зуыс йазъазу нхагIвчвала йадыргалтI. – Арайон йаланакIуа апхьартипхьадза апны чарти мацIауырти аныргIалпI. Йазалху аъачIвагIагIвчва тшырзынахIырхан, йызламацIауа ахIаквква, адуховкIаква бзита йырхьпшытI. Йапхъахауа – йпщбахауа аклассква рапхьагIвчва хвыдъа пхата йырчара йатахъу зымгIвала йадгалапI. «Роспотребнадзор» йщаквнаргылыз атахъыраква хIырхъйауата йазакIу меню лыхIхтI. СынчIва сабикI йчара сом 61 азалырхитI, ауи ахча щыбжьан йырфуш гIалцIитI. Ауи акIвымкIвагьи, щымтала каша йгьи чай рыртырныс рылшуштI, – йылрыбагъьитI Мартаза Зимфира. АунашвачпагIв йшылхIвазла, йымхьтахаскIва рчIаджьра йазыбжаз акотельнаквагьи йырхьпшытI. Рынхара джвыквырцIара ахъазла абжараква дрыдзтI. Псыжв йапхъахауа Гимназия хъышвквакI рпсахырныс ргвыгъапI. ЙынджьыгьчкIвын йгьи Къарапагва квтанай апхьартаква рпны «Точка роста» квтаква гIахъыртIырныс тшдрыхIазыритI. – АлбыргIан йгьи Псыжв йгIвбахауа апхьартаква рпынква цIыпх йгIахъхIтIыз «Точка роста» квтаква рынхараква йшгIадырбазла, апхьагIвчва швабыжта йрымаджьащахъвапI. СынчIвагьи гIвапхьартакI рпны ауат рынхараква джвыквыгIжьырныс хIгвыгъапI. Ауат ъагIвнанхуш апещква хIырчIаджьтI, йатахъу зымгIвала йадыгIгалтI. АрыпхьагIвчва рдырраква йрыладырхIауата акурсква йырхъыстI, атехника шIыцквала йынхауа тшырбжьатI. Сентябрь ауат а-Квтаква гIахъхIтIуаштI, – йгIалылкIгIатI Зимфира МхIамат йпхIа.  Къвбина квтанай апхьарта «Цифровая образовательная среда» программа йалалын, ауи апкъ йтата ласыта йынхауа Интернет рызкIылыргатI, «Ремонт спортивных залов в сельской местности» федеральна программала апхьартаква рспортзалква зымгIва дырчIаджьтI. Мартаза Зимфира хIшахалыргIвазазла, йапшым афедеральна программаква гIадрысабапуамцара, арчIаджьра нхараква акIвдыршитI, апхьартаква гIадыршIыцхитI, ауыжвгIанчIви технологияква йрыквыргIапста арыпхьагIвчва рынхара адыргалитI. Сентябрь а 1 асабиква драйгварныс йшхIазыру гIахIайхIвтI Къвбина квтанай апхьарта адиректор КIВРАЩЫН Умар ЗулькIарней йпагьи. – СынчIва апхьартаква рынхара шакIвшуш зымгIвагьи ахъгвыргIвитI. Ага аъаща баргвы хIташвазтынгьи, йшхIылшузла хIынхара джвыквхIцIахырныс йанхIыргIалтI. АмацIауырти акотельни хIырчIаджьтI, Интернет ласы хIызкIылыргатI, арыпхьагIвипхьадза ноутбукла дадыргалырныс хIдыргвыгъатI. Апхьарта анхагIвчви апхьагIвчви тшазхIкIкIын, асанитар нхараква акIвхIыршатI, апхьарта апшцIа хIрыцкьатI. Асабиква рапхьара йшащтацуш апшта йхIылшуз хIчпатI, – йхIватI КIвращын Умар. Апхьартаква рпещква цкьата, йлашарата ахвыцква йрызпшитI, арыпхьагIвчвагьи рапхьагIвчва адырраква рымгIвала йрыцымгIвайсырныс йхIазырпI.