АъачIвагIагIвчва йшдрыбагъьауала, астудентква заджвгьи йапшым
социальна адкIыларапI.
Ауат йрылахIауа рдырраквала, рапхъахьыла мурадквала, йхIагIу рджьгаррали разгIашыкърали,
ринтеллектли асоциальна бзазара штшаквдыргIапсуали, тшызрыбагъьауа рщаквгылщали арахьарат рыквлагIвчва йгIарылхIвитI. Ауи акIвпI йаргьи
аъачIвагIа гIацIгартаква
йрыцIу ахIвсси ачкIвынчви хIкъраль аунашвачпагIвчва хIуачIвымш ащата щтIазцIушта йхIыщтагIайуа къару мчыта
йзырпхьадзауа. Ауат дасугьи рхъа ахъазла йызпхьарныс ъачIвагIата йгIалырхыз рыквыргIапсума,
апхьара ргвы кIанамрыхIауата лахIвара бзи рызгIанагума, йызлашваз
ажвлара – арат датшагьи
лкIгIара щарда рмагIны
дупI.
УахьчIва швзабахIырдыруаш Псыжв абзазагIв
ХВЫТI Диана Марат
йпхIагьи лпахь йлыргылыз ахачIвы дазычIвырхъитI. Ауи Лагъь-КIавкIаз
къральыгIва гуманитартехнология академия йаланакIуа аколледж апны
«Земельно-имущественные отношения» ъачIвагIала йазалху квтанай
дырра гIацIылган, ужвы
йара академия апны адгьыл йгьи амлыкв уысква
раныргIалща рыцIагьи
цIолата йыллырдыритI.
Ауи хIшахалыргIвазазла,
йыззырбжьауа акадастр,
априватизация уысква,
адгьыл йгьи йатуымрапауа амлыкв хвы шрыквырцIауа ауасамцара
азаман ашIыцраква швабыжта йлымаджьащахъвапI.
– Аколледж сапхьаркIвауата стшыбжьараква
ъакIвшаз Псыжв кыт администрация апны ахъвшара аъачIвагIагIв хъада ПАТI Лариса Ибрахим йпхIа швабыжта
дсыдынхалтI. Акыт аунашвачпарта адгьыл йгьи
амлыкв уысквала йгIайуаз абзазагIвчва йгIадыргалуа ашвъаква шдырхъвыхуа сахагIвазатI. Ауаъа гIвымызкI руацIа аколледж апны йгIасыртыз
атеория дрыбагъьатI, сгIалгауата архъвыхраква санырхъысуаз бзита йгIасыхъватI, – лхIвитI Диана.
Ауи йшгIалылкIгIауала, уахьчIвала дъапхьауа
академия «Агрономия»
факультет апны рахIагьи
йлымаджьащахъвапI, апхьарагьи рахIагьи майрата йгIалдахIвитI. Ауыгьи гвынгIвырапI, астудент бзазара йащцахьаз,
квтанай ъачIвагIадырра
змахьу лыхъазла ауи апшта апхьара гьылчвыбаргвхым.
– Уапхьузтын, дыррагьи уымазлуштI, – лхIвитI
астудент гврыхва. – ХIарыпхьагIвчва швабыжта
йхIызбзипI, рлекцияква
ухъа йгIатахауата йадыргалитI. Ауат угвы аквкIта
урыпхьахырквын, йащтагIайуа амш майрадзата йузыгIахIвахитI, ухъа
йгIатахитI. Ауат йырхъазымкIва, арефератква ансрыхIазыруа цхърагIагата
а-Интернетгьи гIасрысабапитI, ауи дыррата йгIатыуымхуаш гьаъам. ЙгIасахвпIта, философияла апхьара сахIатква бзита тшъарызсрыхIазыруа ахъазла арат амшква хIарыпхьагIв рхъвыхра сылмыркIуата зынла «хвба» сызлыргылтI. Ауи скъаруква
йрызхъаснарцIатI, арахьарат апредметквалагьи схъа бзита садынхалырныс стахъхатI, – лхIвитI
апхIвыспа.
Ауи апхьара джьауапкIра ду зпщылу нхарата
йъалпхьадзауа хIгвапхатI. Йауа ухIварыквын,
Диана лапшта зщаквгылра цIолата йазхъвыцуа
чкIвыныргIа ракIвпI йъачIвагIагIв бзихауа. УахьчIвала ауи лстудент бзазарала дразыпI, йгIалылхыз амгIвагьи лара йшлыквыргIапсу кьангьаш гьазгIазгуам
Получайте свежие новости на электронную почту
Комментарии