АДГЬЫЛКВА ШГIАДРЫСАБАПУА ЙАХЪПШЫЛИТI

Черкесск город апшцIаква раныргIалра йазалху акъральыгIва программа нхауищтара фатар щардала йалу атдзаквгылаква йгIарыцIанакIуа аштаква дырчIаджьра йахъазымкIва, саби хъвмарыртата, тшпсщартата йгIандыршахьу гьмачIым. Хвысквшала йдрыбагъьаз апрограмма сынчIва алата ужвыгьи хысквша йдырхъйуштI. Ауи апкъ йтата йагIвсыз асквш йандыргIалыз апшцIаква 51 йнадзитI. Апрограмма апны йгIарбу арчIаджьра уысква акIвзыршауа анхартаква рхачIвква шдырхъйауа йахъпшылуа ажвлара рхъвыхыгIвчва йгIадрыбергьыльуа абжараква шдрыдзхуаш йащтапI. Россия УагIахъа фронт КЧР-ла ахъвшара а-Исполком йалу СТРУГАНЦОВ Денис йшгIахIайхIвызла, йагIвсыз асквш апны апшцIаква шандыргIалуа йахъпшылуата рхъвыхрата йакIвдыршаз гьмачIым. – Апрограмма шдырхъйауа зылапш йыцIу уыхварали ЖКХ-ли КЧР а-Министерства, Черкесск город амэрия рынхагIвчва хIыцта апшцIаква шандыргIалуа хIырхъвыхитI. Фатар щардала йалу атыдзква йгIарыцIаркIуа аштаква абзазагIвчва арыразуата йдырчIаджьра атахъыпI. Аныкъвартаква дыррайшитI, асфальт щтIарцIитI, аквчIвартаква дыргылитI, амзаква кIнырхIитI, асаби хъвмарыртаква гIандыршитI. АгIвнабзазартаква рпшвымаква апшцIаква шдырчIаджьуа йазыразымкIва йанщаквхIыргылра, амыгIвхъгараква шдрыдзуашла амальква нахIахвитI, – йгIаликIгIатI Струганцов Денис. Ажвлара рхъвыхыгIвчва йшщаквдыргылызла, асквшква 2017–2022 руацIа йынхуш апрограмма йалашваз апшцIаква рпны хвитнагIа рымамкIва гараж, датша уыхвара ъарчпаз йгIалцIла арчIаджьраква тащахIахитI. Агород адгьылква шгIадрысабапуа зырхъвыхуа Черкесск амэрия аунашвахъцIарта знапIыцIу ТЛЬЫС Арсен йшгIахIайхIвызла, апшцIаква раныргIалрала анхараква дрыласуата, йъакIвым гараж зыргылыз йнидрыххитI. – Фатар щардала йалу атыдзква рыпшцIаква рпны гаражта йдыргылыз щарда йнадзитI, ауи аштаква анзыргIалуа руыс йазарархитI, – йхIвитI Тльыс Арсен. – Атдзаквгылаква рыпшцIаква рпны агаражква ратрыпара заман щарда агитI. Ауи йгIалцIла акIвпI йаргьи апшцIаква анзыргIалуа анхараква йаназаману йзырзалмыргауа. Ауи апш гIанымшара ахъазла, апрограмма апны йгIарбу ахачIвква хIрыласуата агаражква ндхIрыхитI. Фатар щардала йалу атыдзква рбзазагIвчва йырхъатачIвыру йгьи амуниципальна адгьылква рпны агаражква зхвынгылу адгьыл хабзала йагвынзмыргIвыз джьауап дхIыркIитI. АгIвычIвгIвыс дъабзазауа апны гараж йыргылырныс дахвитызтынгьи, апшцIа анзыргIалуа руыс гIашIанарысуазтын, йшатирыпушла швъа йзыгIаргIвитI. Ажва ахъазла, уахьчIвала гараж 200 атдрыпарныс апшвымаква швъа рзырщтихьатI. Ауат йрыуата 70 хабзамыгIвхъгарала йгIадрысабапуата йщаквхIыргылхьатI. Апшвымаква ргаражква дара йтрымгузтын, административна джьауап дхIыркIитI, къвады дхIыршвитI. Ауи йшгIаликIгIазла, гараж гIадрысабапырныс рмурадта адгьыл штаква зкIыз акъральгIвчва йрыуата збзазартаква зпсахыз йанырзыпшгIауагьи гIаншитI. Агараж нызххра атахъу апшвыма дырмауыргьи, хвитнагIа йымамкIва йгIайкIыз адгьыл йарадъа йгIадрымцырахра атахъхитI. – Фатар щардала йалу атыдзква рыпшцIаква рпны гараж зыргылыз акъральгIвчва швъала йхIрыбагъьаз апIатла йтымцIуата йыркIыз адгьылква гIадырхвитхра атахъыпI. Швъа ззыгIаргIвыз апшвымаква йадрымцалуата ргаражква дара-дара йтыргарыквын, ауыс йагуш акврыдзраква рыцIа ймачIызлуштI. Ауаса, амуниципальна ахъатачIв техника гIадрысабапта агараж тыргарыквын, анхараква йрыквыдзуа йахъазымкIва, ауи ъадыргалуаш аштагьи ахча азишвуштI, – йгIаликIгIатI Тльыс Арсен. Черкесск город апны агаражква ауи аъара йщардахан (гIвынзыкь йрайхIапI) апшцIаква, аурамква рпны аныкъвара баргвхатI. Агород аунашвачпагIвчва ауат йрылдырдзгIара, адгьылква гIадырхвитхра рмурадта архъвыхра нхараква дрымчтI, гараж зхвындыргылуаш адгьыл гьырзалырххуам. Тльыс Арсен йшихIвазла, акъральгIв агараж шихъатачIвыру зырцIабыргуа швъа йымамкIва датша заджвы йанийрыхвгIахуа агIаншараквагьи гьмачIым. – Ажва ахъазла, уахьчIва сом зкьы швкIла швъадъа гараж зхвгIаз уачIвы йнидрыххырквын, йыгьгвасрамма? Ауаса йгIанымшара ахъазла, швъа ацымкIва млыквкIгьи швымхвгIан, – йгIаликIгIатI Тльыс Арсен. Ауи унашва зхъицIауа аъачIвагIагIвчва гвып агород атдзаквгылаква йгIарыцIанакIуа аштаква анзыргIалуа руыс дрымайрауата ансимшгьи рхачIвква дырхъйитI.