Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей

ЧКIВЫНЫРГIА РГIАТГАРА

22.03.2019 286
ЧКIВЫНЫРГIА РГIАТГАРА
РФ а-Президент й-Администрация аунашвачпагІв йзаместитель Кириенко Сергей «Лидеры России» проект афинал Къарча-Черкес йауу хгІвы ъалашваз ахъазла хІреспублика ахІвахІвра ажваквала тшгІазынайырхатІ. – «Лидеры России» анкъвакъвра афинал Къарча-Черкес йауата хгІвы ъалашваз ареспублика акадр лшараква шхІагІу йаквшахІатпІ. ПщынгІважви хвба йнадзауа хІкъраль аштаква зымгІва йрыуу анкъвакъвра афинал йгьаламшватІ. Анкъвакъвра ахачІвква алачпан йгьи йбаргвын. Зкъарула, здырраквала афинал йалашваз сгвы йгІатыцІуата срайхІвахІвитІ, – йхIватІ Кириенко Сергей. Къарча-Черкес Республика а-Хъада Темрезов Рашид афинал йазынадзаз хІреспублика ащтийыгІвчва драйхІвахІвтІ. – Сочи апны анкъвакъвра афинал йалашваз хІреспублика ащтийыгІвчва АКБАЕВА Медина, АККАУА Амир йгьи ОСИПОВ Алексей срайхІвахІвитІ, ауат йшаквнагу апшта рдырраква, рапхъагылагІв хІальква рзыгІарбатІ, – йгIаликIгIатІ КЧР а-Хъада Темрезов Рашид. «Лидеры России» анкъвакъвра афинал йалашваз а 300-гIвгьи апхьара ахъазла сом мильуан зыкІы-закІ рырттІ. Ауи аъара ахча Къарча-Черкес йауата афинал йалашваз ахыгІвгьи йгІарадзатІ (сертификатта йгIарырттI. – Сызпхьуш ужвыгьи багъьата йыгьщаквсмыргылстІ, ауаса дырра ъасзымхъауа анархара йгьи анхара рынок апны рыцІа йыззыбжу аъачІвагІа тшазыбжьара гІалсхуашта гІацІцІуаштІ. Йалырныс ауыпІ, ацифра технологияква ргІарысабапра гІалсхырныс, – лхІватІ асом мильуан ззыналырхушла йзызцІгІаз аъачІвагІа гІалхрала а-Квта аунашвачпагІв, абанк анхагІвы Акбаева Медина. Апроектква ахча рзалызхуа РАНХиГС акІвпІ, мыш 90 руацІала ауи ангІалра адырчпалра атахъыпІ. – ЙгІасыртыз агрант Россия а-Президент йпны йгІаныршу ауагІа млыкврхІарала йгьи акъральыгІва къвырльыкъвхарала Россия академия апны апхьара йазынасырхара смурадпІ, – йхІватІ «Южна» агрокомбинат аинженер Аккауа Амир. – Академия йапхьауа йызнымкІва срачважватІ йгьи ауаъа сдырраква йрыласырхІарныс щаквсыргылтІ. Ауат рпрограмма анархара, апрофессор-арыпхьагІвчва гвып ралаща схъырхтІ. Академия апны йынхауата йапхьуш йыхъазла график щаквгылапІ. «Лидеры России» анкъвакъвра афинал йалаз йъапхьуш дара йгІалырхырныс йахвитпІ, ауаса йхIаракІу апхьарта йазалху лицензия амазлара атахъыпІ. – Агрант ззынасырхуш ужвыгьи багъьата йыгьщаквсмыргылстІ. Ауаса сабапра сызгІазгуаш адырраква йрылахІара ахъазла йшгІасрысабапуаш ажва гьалам, – йхІватІ РФ Ащтанкъвцара комитет айсра щтанкъвцара хъвшара аунашвачпагІв Осипов Алексей. – Сара юридическа дырра сымапІ. Агрант экономика дырра гІапшцІгара йа «Государственное и муниципальное управление» нархарала апхьара йазынасырхуштІ. Ари анкъвакъвра аштаква зымгІва гІаланакІитI, ауи «Россия – страна возможностей» акоммерция йалам аорганизация йаднагалитІ. Анкъвакъвра ззынарху хІкъраль аунашвахъцІара органква йрылазлуш гІарыбергьыльра акІвпІ. Апроект рхъйара ахъазла акъральыгІва къвырльыкъвхарала йгьи аунашвахъцІара кадрква ррезервла РФ а-Президент йпны йгIаныршу акомиссия джьауап акІитІ. Акомиссия РФ а-Президент й-Администраця знапІыцІу Вайно Антон унашва ахъицІитІ. ЙагІвсыз асквш йакІвшаз анкъвакъвра апны йапхъагылагІвхаз уахьчІва йапшым афедеральна къвырльыкъвхартаква рпны йджьауапкІру аъанатІаквала йынхитІ, РФ а-Президент й-Администрация апынгьи ъанатІа зыртыз рылапІ. СынчІва «Лидеры России» афинал агІан 104-гІвы йагъьта йгІалыркІгІатІ. ЙхІвара атахъыпІ, ари азын социальна магІны зму ауысква рыцІа гватра шырзалырхыз. Афинал йалашваз дара рыштаква рпны социальна магІны зму апроектква лырхын, абзазара йаларжьтІ.
286 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный