АМАЛЬ ШIЫЦКВА ГIАРАУИТI

МартI а 15 АлбыргIан квтанай апхьарта апны Абаза район арыпхьара нхартаква рунашвачпагIвчва рыхъазла йакIвшаз асеминар хъата йаман «Апхьарта апны арыпхьара амаль шIыцква абзазара йалажьра». Асеминар йалаз йхътIу апхьара сахIатква, амастерклассква йырпшытI. Йпщбахауа класс апны апычIв класс арыпхьагIви абаза йгьи ангьльыз бызшваквала арыпхьагIвчви йацыта йадыргалыз апхьара сахIат азыгIальаматра ду гIарыланацIатI. Асабиква ахбызшвакIлагьи дырра бзи шрыму рджьгаррала йгIадырбатI. Йбыжьбахауа класс математикала рапхьара сахIат апны арыпхьагIв йцIасу аметодика йацта ауыжвгIанчIви амальквагьи гIалрысабаптI. АпхьагIвчва хачIвыта йрылтыз бзита йыргIвытI, азцIгIараква гвыбзыгъата джьауап гIарыртхуан. Апхьарта анхаща йагIарбагу апхьагIвчва раттестация акIвпI. Урышв бызшвали литературали арыпхьагIв ЙазакIу акъральыгIва рхъвыхра йшазылрыхIазыруа гIазырбаз мастер-класс акIвлыршатI. УыжвгIанчIви арыпхьара ргIапсща аметодика шIыцквадъа уыла йыгьуызгIацIажьхуам. АпхьагIвчва ракъыль, ргватра тшауацIдрыхра йацхърагIауа амальква йрыуапI «ментальная арифметика» (асаби секундакI ауацIа хачIвыта жваба йзырхъйауа дырбжьитI, ауи йхъала акIвпI дызлапхьадзауа). Ауи йапшу арифметикала й-5-хауа класс апны йакIвшаз апхьара сахIат асеминар йалаз гвщтIыхра ду гIарыланацIатI. АпхьагIвчва ахачIвква рымаджьащахъвадзата йдырхъйун. Апхьартаква рдиректорква ауи апрограмма дара рапхьартаква рпынгьи абзазара йшаларжьуаш рхIватI. Йалачпаз апхьара сахIатква рымщтахь асасчва асаби кIьанджь театр аргылчIв йадырпшытI.