ЗЫНХАША ТАРЩАХIАУА ЙЦIАРЫМКIРАГIАТI

Ареспублика апрокуратура органква анхагIвчва рконституция хвитнагIаква шгIарысабапхауа дырхъвыхуата сынчIва ахвмызкIла мыгIвхъгарата 1776 гIадрыбергьыльтI. Ауат йрылапI анхаша тащахIара, йабгамкIва йрытра датшагьи. АмыгIвхъгараква рыхъазла ъанатIанкъвгагIвта 30-гIв ъадаб джьауап ддыркIытI. Арат, датшагьи апхьадзараква йрыквгIашIастI КЧР апрокуратура апны ажурналистква йгIарынйаз ареспублика прокуратура афедеральна хабза рхъйара хъпшылра ахъцIарала ахъвшара аунашвачпагIв йзаместитель СКВОРЦОВА Наталья, нхарали социальна тшауацIыхрали КЧР аминистр йзаместитель ПРЫГУНОВА Ольга, КЧР апны нхарала а-КъральыгIва инспекция аунашвачпагIв йхъвдаквцIараква зырхъйауа БАЙРАМКУЛОВ Борис, ареспублика апрофсоюзква радкIылара хабзала аинспектор хъада УЖАХОВ Азамат. – Социальна магIныта йаму йгIалцIла апрокуратура органква анхартатыгIвчва анхагIвчва йаназаману йгьи йабгата анхаша рыртуазтын рылапш йыцIапI, – лхIватI Скворцова Наталья. – ХIреспублика агород йгьи арайон прокуратураква рпны зынхаша тарщахIауа, анхара йапщылу йамгIан мыгIвхъгаразлакIгьи йанйауа хабар зладыргуш йазалху ателефонква нхитI. Ареспублика прокуратура апны ауат ауысква йырзалхпI 26–74–99 телефон номер. ТшгIахIзыназырхауа заджвгьи гватрадъа дгьгIанхушым, йабгу джьауап йауаштI. ЙгIалскIгIара стахъыпI зыхьыз цIазкIуа ртшазынархараквалагьи архъвыхраква шакIвшуш. Скворцова Наталья йшылхIвазла, йтарщахIаз анхаша ддыршвахра ахъазла асуд швъата 794 рщтитI, апрокурорква рщаквыргылрала 23-гIв административна джьауап ддыркIытI. Апрокуратура органква нхарата йакIвдыршаз абзирала йаквылыз нхашата сом 18 мильуанкI айхIа ддыршвахтI. Ауи акIвымкIвагьи, архъвыхраква рымщтахь анхаша ъарырымтуа йазынархата уголовна уыскI гIахъыртIытI. – Ауаса уахьчIвагьи агIнхартакI рпны анхашала апсарчIвы йшалу сом агIмильуанкI йнадзитI, – лхIватI ауи. – Ауат анхартаква рынхагIвчва рынхаша шрыртхуаш хIазынхитI. ЦIабыргыта, анхарта абанкротра йаназцауа йынхаз рынхаша рнапIыцIауыршва хырныс швабыжта йбаргвхитI. АпсарчIвы ъаквылыз агIнхартакI йрыуата агIвба банкротпI. Апрокуратура анхагIвы анхашала апсарчIвы йапщылу ауысква аналдыргауа йзынйауа абаргвыраквагьи дрыквгIашIастI. Ауат йрыуапI анхагIви анхартатыгIви ангIалра ъарымчпауа, анхаша антарщахIауа зынла тшъагIарзынадмырхауа. – Мызпхьадзарала, сквшквакIла рынхаша ангIарырмтра акIвпI тшангIахIзынадырхауа, – лхIвитI Скворцова Наталья. – Ауи ауыс арыбаргвитI. АнхагIвы мызкIы апны анхаша гIван йгIапшцIигара атахъыпI. Зынхаша ауаса йгIапшцIзымгауа архъвыхра органква тшырзынайырхара атахъыпI. АнхартатыгIви анхагIви рангIалра даквгIашIастI Ужахов Азаматгьи. – ЗаманкIла нхара йалагауагьи аунашвачпагIви йари йгIвыта ангIалра рчпара, анхара книжка апынгьи йтагIвра атахъыпI, – йхIватI ауи. – АнгIалра зымчпаз анхагIвы йыхъазла анхартатыгIв джьауап гьикIуам. Ауи акIвымкIвагьи, швъала йгIарбам нхаша гIапшцIызгауа йпенсиягьи мачIхитI, асоциальна ахчаква гьгIайадзушым. АнхартатыгIви анхагIви йырчпауа ангIалра апны анхаша, ахъвдаквцIараква йалыргата йанызлара атахъыпI. АнгIалра йара анхагIвгьи йымамкIва йгьауашым. Нхарали социальна тшауацIыхрали КЧР аминистр йзаместитель Прыгунова Ольга аминистерства асоциальна нхара азазаъащаква агвныргIврала уыста йакIвнаршауа даквгIашIастI. Ауи йшылхIвазла, КЧР а-Правительства, ареспублика апрофсоюзква радкIылара йгьи анхартатыгIвчва асквшква 2017–2019 руацIала йынхуш ангIалра рчпатI. АнгIалра йгIвбахауа ахъвы анхаши анхара азазаъащакви йырзынархапI. – ХIинспекция анхара апны анхаша йаназаману йрыртуазтын гIарыбергьыльра йхъаду анархараква йрыуапI, – йхIватI Байрамкулов Борис. – ЙлыхIхыз ахачIвква йрыламызтынгьи, йатахъхузтын, архъвыхраква акIвхIыршарныс ахабза хIархвититI. Араса сынчIва йагIвсыз амызква рагIан мыгIвхъгарата 150 гIашIахIкIытI. АнхартатыгIвчва анхаша тарщахIитI, абгата йыгьрыртуам, анхара азгIвадара йъазарархауа йгIалцIла йгIацылра атахъу ахча анхагIвы йыгьйыртуам, уахъынла нхара ахъазлагьи анхаша йгьацырцIум. Анхашала апсарчIвы хIанаквчважвауа анхагIвчвагьи рыцIа йджьгархарныс тшырзынасырхара стахъыпI. Зынхаша тарщахIауа йгIвыта, онлайн амальла, ажвлара хабарргагаквала тшгIахIзынадырха ауитI. АпсарчIвы гIвымызкI йахънахIвузтын, ауыс ащтанкъвцара органква йхIщтиитI. УахьчIвала уголовна уыс гIахъыртIра ахъазла жвуыскIла ашвъаква ащтанкъвцара органква йрыхIттI. Анйара йалаз ажурналистква разцIгIараквагьи джьауап гIарырттI йгьи анхара, анхаша йырпщылата зхвитнагIаква мыгIвхъыргауа йцIарымкIырныс хIреспублика абзазагIвчва тшырзынадырхатI.