СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

АХIБА ДЪАГIВНУ АУНАГIВА ПШДЗАХИТI

12.07.2019 206
АХIБА ДЪАГIВНУ АУНАГIВА ПШДЗАХИТI
Арат амшква Псыжв кыт йбзазауа МУРАТЫКЪВАРГIА АхIмади Фаризати (Белла) гвыргъьара, гвалагIваласра ду йалапI. Ауат рпахIба Замир Псыжв кыт йгIвбахауа аквтанай апхьарта хьапщ медальла дгIалгатI, ужвы йбзазара мгIва шIыц дыквылуата йъачIвагIахуш щаквйыргылхьатI йгьи ауи тшазибжьара ахъазла Саратов къральыгIва юридическа академия дыцIалырныс мурад йчпатI. – ТгIачвала Замир дайъазагIвхара хIтахъын, йаргьи ауи дадгылуазшва акIвын йшаъаз, – лхIвитI Фаризат. – Ауаса йахIбу аклассква рпны история, обществознание ййырдыруа даналага йъачIвагIахушла йгвгIанагра тшапсахтI, аюристра дхънахтI. Ауат апредметквала дазрыпхьуз Къвныжв Мира Юрий йпхIа йгьи Йуан СальыхI Абубакьыр йпа ахабзардыррала йгIальаматра гIадыршIыхата гIацIцIуаштI. Замир ймурад ангIахIайхIв хIъанквынхатI, дайъазагIвта акIвын зымгIвагьи хIыла дшгIацIалуаз. Ауаса хIгьипырасуам, йтахъырала йгIалихыз аъачIвагIа тшазибжьарквын рыцIа йагъьпI. Йара Замир йшипхьадзауала, юрист – хъацIа ъачIвагIапI, азахвара щаквыргылра, ауагIа ргIальаматраква хчара йапщылапI. Ауи йъачIвагIахушта йгIалихыз юриспруденция ййырдыруата йхIаракIу апхьарта дыцIалырквын амайчра йылата дшапхьуш кьангьашра гьалам. Йауа ухIварыквын, аквтанай апхьарта йапхъахауа акласс йгIашIарышвта ахьапщ медаль дазычIвырхъауата «хвбала» дгIамгIвайстI. Историяла, обществознаниела, биологияла, математикала йгьи абаза бызшвали литературали Абаза районла, ареспубликала йакIвшуз аолимпиадаква рпны йапхъахауа йгьи йгIвбахауа агылартаква гIатигатI. Ауи й-10-хауа акласс дыцIата бзидздзата йъапхьауа ахъазла агIмшкIыла СанктПетербург ларпшра йырщтийыз апхьагIвчва гвып дрылан. Замир апхьара йацйырцауата аспортгьи дапщылан, хвитта абакIрала ареспубликала аолимпиадаква рпны апхъагылараква гIатигатI, афутболасрагьи дазычпапI. Ауаса аспортгьи заман бзидздза уыквнахитI, йахIбу аклассква даннадза йбжьагIвы Урусов Марат апхьара рыцIа гватра шазалхчIву анихIва, Замир атшыбжьараква дгIаркъвыцIхтI. Йабагьи йангьи ауи тамамта йырпхьадзатI. ЙшхIхIваз апшта, АхIмади Фаризати ртгIачва апны Замир дахIбапI, ауи йымщтахь йгIайуа Зауырбакь йжвбахауа акласс дцатI, Зарина дайцIбапI, ауи йгIвбахауа акласс хъылгIватI. АгIвыджьгьи ращахIба швапхата дырзалуа бзита йапхьитI. Зауырбакь хвитта абакIра тшазибжьитI, ауи Краснодар, Гулькевичи, датшагьи аштаква йакIвшаз анкъвакъвраква дрылата йгIатигаз амедалькви аграмотакви йбльын йкIыдпI. ЙцIыхъвахауа азаман ауи абаза литература йымаджьащахъвата дапхьитI, ййырдыритI, алацIараква бзита йгIвитI. Йыздыруада, РФ агIвчIвчва р-Союз йалаз, сквш 40 айхIа «Абазашта» газет згIвыраквала йзырбайаз йабаду Муратыкъва Николай Цацу йпа йшвапхала агIвра тшайтуашызтын щта?! Зарина ашвахIвара, агIахIвра бзидздза йылбитI, апхьарта апны Къарча-Черкесла гIатгара зму акультура анхагIвы, Псыжв акультура Тдзы ахудожества унашвачпагIв Джьардис Аскьарби йбжьауа агIахIвыгIвчва гвып дрылапI. Ауи асквш ацIыхъва й-2- хауа класс бзидздзата дшгIалгазла апхьарта йгIалыртыз аграмота атгIачва швабыжта йайгвыргъьатI. МуратыкъваргIа АхIмади Фаризати рсабиква шви пхи рыквта йшгIадзындыргылуа, ауат ръадаб шпшдзу гвауымтуата йыгьгIанхум. Ажва аламкIва, ауи гьуыс майрам, йалкIгIата ани аби нхауата ргIариква заман щарда рзалырхырныс йанахамдзауа. АхIмад Черкесск автодорожна техникум дгIалгатI, йъачIвагIала дуыхвагIвпI, прорабта ПМК-21, «Смирнов-мебель», «Меркурий» нхартаква дынхатI. Фаризат Къарча-Черкес къральыгIва университет дангIалга хIреспублика ателерадиуагIатра компания абаза хъвшара апны журналистта дынхатI, уадыргIвана анаука тшадылкIылтI, уахьчIвала агуманитар рхъвыхраквала КъарчаЧеркес институт абаза хъвшара данаука нхагIвыпI. Апхьахьа шIа йалкIгIата агIвычIвгIвыс йъапкътлапкъ йапщылу ажваква лырхъвыхуата дрыдынхалитI, йгIадымрысабапхуа ажваква дырзыпшгIитI. СынчIва апрель агIан КъарчаЧеркес къральыгIва университет йакIвшаз «Клычевские чтения – 2019» дуней конференция апны ауи анархарала дгIазпхьаз адоклад Абхаз Республика йгIатыцIыз апхьахьа – бызшвадырыгIвчва швабыжта йрымаджьащахъвахатI. – Аконференция анакIвшуз Абхазия йгIатыцIыз йбергьльу абызшвадырыгIв, афилология наукаква рдоктор Хагба Лили слабадыртI, – лхIвитI Фаризат. – Швабыжта йсгвапахатI йгьи саргвышхватI апхьахьа ду сдоклад ъалымаджьащахъвахаз. Ауии сари апхъахьыла хIацынхушта хIангIалтI. АпхIвыс лыхъазла аунагIва уысквагьи, асабиква ргIадзныргылрагьи, анаука нхарагьи ацуырцарныс шбаргву гIазгвнымгIвуа дгьаъам. Ауаса Фаризат йгIалдахIвтI, ауи цIагылагIв бзита йылзалтI лабхъва Николайи ланхъва ФатIими. – АунагIва уысквалагьи, асабиква рыгIзарабжьаралагьи швабыжта сыззыразу сабхъви санхъви гIахIыцIагылтI, щарда хIхъыргатI, – лхIвитI ауи. – Сара сгIазлыцIыз атгIачва апны агIариква пщгIвы хIнадзун, хIани хIаби анхара дукI йыгьгIахъымшвалуазтI, хIанду Хвыжьи хIабаду Мазани ракIвпI зылапш хIыцIаз. УнагIва съанашылыз апынгьи йгIасдахIвтI, сабхъва адуней йхIваджьхьазтынгьи «абаду йкъвышра, йпшкара» ззырхIвауа асаби ахIбачваква йрылархIватI, ауат тшытхахьазтынгьи, рахщайцIба Зарина хвыц лапшта сквш 30 «Абазашта» газет корректорта йынхауа ранду лбжьагажваква йрыздзыргIвуа, дада йхIваквуз гIаргвалашвахуа лдама йыцIагылапI. АхIба пшдза, уасаражв дъагIвну аунагIва шви пхи гIвназлуштI, айцIбачва цIас, хабза ззырхIвауа рдыруаштI йгьи йыгьдрыдзуашым. Ауи йаквшахIатпI МуратыкъваргIа АхIмади Фаризати рбзазаща, ауат йрапшу атгIачваква ракIвпI аткъвымгьи ауагIахъагьи зрыпшдзауа.
206 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный