ГВЫМ ПСЫХIВА ЗРЫПШДЗАУА АХЪАЦIА

СчкIвынхъа гIапсарати баргвырати сызшIашваз сгвы йангIанагхра «УыжвгIандзара сгIазырбзазаз Анчвата йдуу квырмыш ду йквнагапI», – йхIвитI Красна Восток кыт абзазагIв, июль а 10 сквш 85 зыртлапIауа ГIВКIЬАТI Александр (Шура) Бесльан йпа. Александр йшихIвауала, тгIачва ду рпны дйытI. Йаба Бесльани йан Къари хвыгIвпачви пхIакIи гIадзындыргылтI: Квакваз, Къвакъва, Заудин, РаскIа, Александр, Борис. Йаба «ПарижскIа коммуна» колхоз арахв дырпщылан. Абашта айсра анакIвшуз Александр анахьанат йыквлагIвчва рапшта, фачIвыла йгьи чгIвычала дбжата арахв, ауасаква йырпщылаз йаба, йайщчва ахIбачва дрыцын. «Ари чпа» ззырхIвуз йырхъйун, ражва ачIвыла йыгьнаймырдзузтI. Асквш 1942 август агIан афашистква хIхакв йгIаталын, асквш 1943, январь а 14 йтырцахтI. ЛадзымкIва, гIапсарамкIва датша гвырбзигакIгьи гьаъамызтI ауи азаман. – УчкIвынта йубауа ухъа йгIатахитI. Йыгьсхъаштылхуам, уахьчIва йъагIадзазгьи сгIвылакI йрыцIаркIвапI гIвнамыца хъыш дуквакI хIхакв йнагваралта гвагвыщ, квтIу, къаз ъатакIыз агьадащла йанджвыквыл йхъарамкIва йчIваз агIвладукI шгIарыжвлыз, азаджв йавтомат дамцIаста драйхсырныс дшалагаз, ауаса хIан дангIарпырагыл рыбызшвала зджьакI рхIвауа йшгварцIхыз. Ауат рцIыхъвала акыт йгIаталыз Ар Къапщ агIвлакI йрайхIвапсата, «Зджьара йгIахIцхърагIапI»-хIва йышгварырдаз, – йхIвитI Александр йчкIвынхъа гIайгвалашвахуата. Айщчва Квакваз, Заудин, РаскIа, Борис арахвырхIари ауасархIари тшырпырщылын, рынцIра шабгаз йалабзазатI. Ауаса Александр айха чарх зцIаз атрактор амгIа йымата акыт гIакIвзыршауа архъаква дрыдынхалырныс, дмеханизаторхарныс рыцIа дхънахтI. – Сара асквшква 1950– 1952 рагIан скытлагIвчва ГIап ЧухIайыб, Кълыч ЧагIбан, Пщуна ДадакIара, Гвым Рауф, ГIап ИсмагIиль, МаткIа Умар йгьи Къамби Ауаль сыцта Терезе кыт апны механизаторта сапхьатI, –йгIайгвалашвахитI Александр. – Гънын, хIъапхьуз апещква хьшвашван, щапIыла абна хIцунта жвгIвала мшIы гIагIгуан, мца ацIхIхъиуанта мачІкІ тшхIыршышуан. ГIвкIьатI Александр йапхьара даналга дызквдырчIваз СТЗ тракторла йынхара джвыквицIатI. Ауаса щарда днымхауата йкытлагIвчва КIвакIва Нурби йгьи ХвытI Борис Кьарим йпа йыцта ар къвырльыкъвхара дызшIырттI. Хысквша айхIа къвырльыкъв йхатI. ДангIахъынхIвых мшквакI рахIа дымчIвауата йынхара джвыквицIахтI, йапшым атракторква дрыквчIвата йкыт гIакIвзыршауа адгьылква йырхарджьтI. Ауи сквш 40 райхIа механизаторта дынхатІ, зынгьи атынчра тшгьайымттI, тшынла йчпарныс йылымшуз, уахъыла йнайырдзахуан. Ауи йыгIвзачвагьи йаргьи шпанхуз?! Йара йхIваща абаракьат рпщылан, тшахьъанадырхалакIгьи йгIардахIвуан. Александр зынгьи уыс майра дгьазымпшгIатI. Жвасквша руацIа «ПМК971» йаланакIуаз Красна Восток кыт ауыхвара участкIа дынхатI, тракторла хIатлата йатйымрыпаз гьаъам. УацIыхъван сквш 30 райхIа бульдозер даквчIвата «Красновосточна» совхоз дынхатI. – Тлаханла йгIауахвырквын, «Сара ари азаман стынчын»-хIва закIгьи гьсызгIалкIгIушым, – йхIвитI Александр. – АгIапынла силос зтарцIуз амашаква, арахв йгьи ауаса бораква гIасрыцкьун, апхкI шабгаз акомбайн страктор йашIарышвта нартыхв силос схуан, амаша йтарцIуз асилос бульдозерла йтазгвычIун, адзынла афермакви акъвашкви йрызцуз амгIваква сырхьпшуан, агънылагьи асылгIва йхънагIвуз амгIваква срыцкьун, акыт йачвыхъарата йаныргIалыз ауаса къвашква трактор тележкIала тшхьа рыдызгалуан. Ажва гьалам, ГIвкIьатI Александр механизаторта дъадзанхуз гIапсара щарда йбатI, ауаса зынгьи дгьамашшытI, дыззынхаз йцри млыкврхIарта, дызцынхаз, джькIахбаста зцифыз ауагIа гьихъаштылуам. – «Йабадзагьи хIацасуа, хIацацхърагIауа, тгIачва пшдзата хIынха!»-хIва схъа йасхIвхитI, агвашв счIвата йнагIвс-гIагIвсуа атракторква анызбара, – йхIвитI Александр йынхара сквшква гIайгвалашвахуата. – Сбзазара атурых стгIачва, сгIакIвзыршауа асабиква йрасхIвитI, агIвычIвгIвыс анхара дшарыпшдзауа, ауи шбзазару, ушартлапIауа ргвынсыргIвитI. ГIвкIьатI Александр йгIапсара асовхоз аунашвапчпагIвчва йапшым асогIаквала, ачIахIра швъаквала йгIалыркIгIатI, ауи «Анхара аветеран» медаль гIайквнадыргатI, акыт совет дадепутатта далырхтI. Нхарала йгвымчIваз ГIвкIьатI Александар тгIачва пшдзалагьи йыхьыз дйырхIватI. Йхъапщыла Назильи йари хыгIвпачви пхIакIи гIадзындыргылтI. Назильи йпа Валерийи сквш къомкI цIитIта адуней йгьыквхым, арахьарат тгIачва хIвапсагIвата йбзазитI. Александр йара йуыхваз атдзы апны йпайцIба Вячеслав йтгIачва дрылата дбзазитI, йажвынтахъа найдаситI. – Сара йшспхьадзауала, уара упшдзамкIва усабиквагьи гьпшдзахушым. Уара уынхагIвызтын, пIатIу уыквызтын – усабиквагьи ауаса йаъазлуштI. Сара сбзазара ссабиква ачвпхащушта йгьаъам. Щта, ауи гьнасыпрамма сара сыхъазла! – йхIвитI ГIвкIьатI Александр йгIамидаз асквшква дырзыразта.