ЗЫЛШАРАКВА АХЪАРЫСУ ЙРЫЗХЪВЫЦУАТА

Зылшараква ахъарысу йгьи пенсия йнадзауа акъральгIвчва рхвитнагIаква хчара магIны зму уыспI. Ауи ахIатырла Россия а-Президент Путин Владимир, а-Генеральна прокурор ауыс йалкIгIу гватра азрымапI. КъарчаЧеркес апрокуратура органквагьи йгIашIыпхьадзу агвып йрыланакIуа акъральгIвчва рхвитнагIаква рхчауата архъвыхраква адыргалитI, ауи анархарала ажвлара организацияква, авласть органква йрыцынхитI. ЙагIвсыз асквш агIан нхарата йакIвдыршаз йаквгIашIастI КЧР апрокуратура ахъвшара аунашвачпагIв СКВОРЦОВА Наталья, ОНФ КЧР-ла ахъвшара знапIыцIу КАППУШЕВА Людмила, нхарали социальна тшауацIыхрали КЧР а-Министерства ахъвшара аунашвачпагIв йзаместитель БАТЧАЕВА Людмила. – ЙагIвсыз асквш йакIвхIыршаз архъвыхраква рагIан зылшараква ахъарысу йгьи апенсия ныбыжь йазынадзауа акъральгIвчва рхвитнагIаква хчарала ахабзаква мыгIвхъгахауата гIаншара 321 гIахIрыбергьыльтI, – лхIватI Скворцова Наталья. – АмыгIвхъгараква дрыдзхра ахъазла швъата 80 айхIа рзыхIщтитI, административна хабзамыгIвхъгараквала уыста 41 гIахъхIтIытI, асуд йрыхIтыз ауысква 26 йнадзитI. ЙгIауахвырквын, муниципальна районквакI рбиблиотекаква аныкъвадыкъваква рыхъазла литература гьрымам. КъарчачкIвын район а 15 апхьартакI рпны зылшараква ахъарысу йырзалху апрограммала апхьагаквала йгьадгалам. Скворцова Наталья йшгIалылкIгIазла, Черкесск город, Прикубань, КъарчачкIвын, Къарча, Зеленчук, АдыгьахIабльа йгьи ХIабаз районква рпрокуратураква йшгIадрыбергьльызла, аныкъвадыкъваква йгьи зныбыжьла йнаскIьахьаз асоциальна нхартаква йзынашылра, атранспорт йзаквчIвара ахъазла йатахъу анхараква гьакIвдмыршатI, атранспорт гIашIасыртаква рпны аныкъвадыкъваква тып гьырзалхым. Ауат амыгIвхъгараква архъвыхраква рымщтахь йдрыдзхтI. – АмыгIвхъгараква ъащарду йгIалцIла ареспублика прокуратура апны йазалху телефон нхуштI: 26-74-99, – лхIватI ауи. – ЗхвитнагIаква мыгIвхъгахауа аныкъвадыкъваква, апенсия ныбыжь йнадзауа, апенсионерква ауи ателефонла тшгIахIзынадырха ауаштI. ХIалампшуата тшазынархаракIгьи гьгIанхушым. Архъвыхраква рагIан хъвшвыла йадгалрала йгьи анхара тыпква рзалхрала амыгIвхъгараква ймачIымкIва хIрынйатI. Ауат ауысквалагьи тшгIахIзынадырха ауитI. Ашшраква бзи-бзи йалхIыргуштI, амальква нахIахвуаштI. «Доступная среда» программалагьи йчпачIвыта йгIанхауа гьмачIым. УахьчIва амгIва картала анамхъараква надырдзахитI. – Йыгьмайрам йажвыз атдзы пандус ашIаучпарныс, – лхIватI КЧР-ла ОНФ ахъвшара знапIыцIу Каппушева Людмила. – «Доступная среда» программа ззынарху аныкъвадыкъваква йгьырхъазым, зныбыжьла йнаскIьахьата йкъарусызхазгьи, коляскIала саби дынкъвызгауа ангьи хIрызхъвыцра атахъыпI. УахьчIвала хIреспублика апны тдзы зуыхвауа ауат йыгьрызхъвыцуам, апандусква гьдыргIапсуам. Ажвлара ргватра ауи ауыс йазынадырхара ахъазла йцIыхъвахауа агIвысквша ОНФ «Улетный пандус» анкъвакъвра аднагалитI. Ауи ззынарху таразымкIва йдыргIапсыз апандусква сурат рхъыхта Интернет йгIатацIара акIвпI. – Ауаса ауагIа анкъвакъвра дукI йыгьгIалалуам, – йгIалылкIгIатI Каппушева Людмила. – Йапхъахуз асквш хIыжвлара организация йалу архъвыхыгIвчва ракIвпI асуратква ахъызхуаз, сынчIвагьи ауагIа дукI йыгьджьгарым. ХIкъральгIвчва ауат ауысквала рхъвыцща рымпсахкIва йгьауашым. ОНФ жвлара организацияпI, йгIахIрыбергьыльуа амыгIвхъгараква апрокуратура йхIщтиитI. Йамуата йдыргIапсыз апандус ахъазла йызчпаз къвады рыквшвитI. Ауаса ауи ауысла протокол зыгIвуашда, йыззырщтиуашда? Ауи зхъвдакву къральыгIва органкIгьи гьаъам. Ауатква хIрызхъвыцын, йазалху къральыгIва орган гIандыршара ахъазла хIреспублика аунашвачпагIвчва тшырзынахIырхатI. ХIгвыгъитI хIажванахъа йацыркIуашта. Анык ъва дык ъваква рхвитнагIаква хчарала йрыхъвдакву ауысква шдырхъйауа даквгIашIастI нхарали социальна тшауацIыхрали КЧР а-Министерства ахъвшара аунашвачпагIв йзаместитель Батчаева Людмила. – ХIреспублика апны «Доступная среда» программа асквш 2013 угIалагата йынхитI, – лхIватI ауи. – УахьчIвала йапшым нхартата 183 зылшараква ахъарысу йрыквдыргIапстI, ауат арыпхьара нхартата 74 рылапI. Йшалу ауат ауысква сом мильуан 247 рзынадырхатI. Батчаева Людмила йгIарыдахIвыз уыскI даквгIашIастI – адагвква рыхъазла диспетчер къвырльыкъвхарта гIандыршатI. Ауаъа сурдоатакIыгIвта гIвыджь нхитI. Йапшым анхартаква рпны аъачIвагIагIвчва тшырзыназырхауа адагвква асурдоатакIыгIвчва онлайн связьла йырцхърагIитI. Адиспетчер къвырльыкъвхарта аъачIвагIагIвчвагьи тшазынадырха ауитI. – ХIминистерства асайт апны адиспетчер къвырльыкъвхарта ателефонква аныпI, – лхIватI ауи. – ЦIабыргыпI, уахьчIва зылшараква ахъарысу абзазара рыцIа йырзымайрахара ахъазла йчпачIвыта йгIанхауа аъапI. ЗымгIва зпщылу ахчата йгIауырщтуа акIвпI, ауаса йхIылшауа шгIаныгIымжьуа ажва гьалам. АъачIвагIагIвчва зквчважваз ауысла апхъахьылагьи йшацынхуш дрыбагъьатI.