АПСАХРА БЗИКВА ГЬМАЧIЫМ

Февраль а 28 Абаза муниципальна район а-Совет йызкьазуу алачIвара цIыпх рынхара гIарбараква йырзынархан. Айззара йалан Абаза район администрация ахъада НЫР МухIаджьыр, культурала КЧР аминистр БАРОКЪВА Рамазан, Россия МВД «Хабезский» межмуниципальна хъвшара аунашвачпагIв ДЖЬАНТЕМЫР Руслан, арайонла ажвлара организацияква ргIащтийыгIвчва, акыт администрацияква рхъадаква, Абаза район администрация аунашвахъцIартакви ахъвшаракви знапIыцIу. Айззара гIахъитIытI Абаза муниципальна район ахъада Архагъ Къвырманби Бильаль йпа. Ауи ансисквша апшта, ари азынгьи арайон администрация йагIвсыз асквш йшынхаз йалапшырныс йгIадгылыз адепутатква, ауагIа дшырзыразу гIаликIгIатI. ЙагIвсыз асквш Абаза район администрация анхара агIарбараквала дгIачважватI Ныр МухIаджьыр ЧагIбан йпа. Ауи асквш 2019 апны йапшым анархараквала дахIврата йыззынадзаз гIайырбатI, йырхъйамкIва йгIанхаз ауысквагьи дрыквгIашIастI. Ныр МухIаджьыр асквш 2019 агIан арайон абюджет шдырхъйаз даквчважвауата апхьадзараква гIайырбатI. Ауи йшихIвазла, арайон абюджет ахъахIара хъвы сом зыкь 499038168 йнадзатI, акврыдзраква – сом зыкь 501491715. Арайон ахъатачIв хъахIараквала рхачIвы шдырхъйазгьи гIайырбатI. АЦХЪРАГIАРАКВА ЙАНАЗАМАНУ ЙДДРАДЗИТI Ныр МухIаджьыр абзазагIвчва рсоциальна хчарала йрылшаз йауацIыхта даквгIашIастI. Ауи йшихIвазла, йагIвсыз асквш ауацIа ари анархарала акъральыгIва хъвдаквцIараква абгата йдырхъйара акIвымкIвагьи, абзазагIвчва йырзалху ацхърагIараква драдзарала амаль шIыцква абзазара йаларжьырныс рылшатI. Арайонла льгот зму акъральгIвчва 3893-гIв йнадзитI, ауат йырзалху акоммунальна цхърагIараква зымгIва йаназаманыз йырнапIыцIашватI, асквш ауацIала йшалу сом мильуан 27 айхIа рырттI. Россия Федерацияла анхара йаветеранта 532-гIв йагIвсыз асквш сом хмильуанкI айхIа радзатI, атыл данхагIвыта льгот змата йгIанхаз азаджв асквш ауацIа ансимзы сом 7612 йнапIыцIадыршватI, реабилитация йахъысыз йгьи аполитика репрессияква рзарар зквшваз 55-гIв асквш 2019 агIан сом 27291 ддрадзатI. Арайон апны КъарчаЧеркес Республикала анхара йаветеранта 327-гIв бзазитI, йагIвсыз асквш ауацIа ауат сом гIвмильуанкIи зкьы 197-и рзалырхтI. Ныр МухIаджьыр льгот зму ачернобылецква, акъвырльыкъвхагIвчва йгьи айсра ачвзабаква цхърагIарата йырзалырхыз гIайырбатI. – Абашта айсра Ду йаладзыз рчвзабаква 22-джь йнадзитI, атыл анхагIвчва – 92-гIв, Афганистан айсра йалаз – 34-гIв, йапшым айсра гIаншараква йрылаз – 63-гIвы, – йхIватI ауи. Ныр МухIаджьыр йшгIаликIгIазла, социальна цхърагIара гIазадзауа асаби 1858-гIв асквш ауацIа сом 2589772 рзалырхтI, саби дзауыз зны йрыртуа ацхърагIара 42-джь йрадзатI (сом 740818), сквшыкIи бжакIи йнамдзас саби зму 196-гIв цхърагIарата сом 8604983 рырттI. ХIышта апны йпщыгIвхауа йгьи йащтагIайуа саби дзауыз ашIыпIа ан капитал рзалырхитI. Нхарали социальна тшауацIыхрали а-Унашвачпарта ашвъа саби щарда зму тгIачвата йану йрыуата тгIачва 33 йагIвсыз асквш сом 3481500 рзалырхтI. АНХАРТАКВА РЫМЛЫКВ ЩАТА БАГЪЬАХИТI Асквш 2019 агIан «Арыпхьара» уагIахъа проект апкъ йтата Абаза районла псахрата йыншаз гьмачIым. «Демография» нархарала АлбыргIан кыт апны уыжвгIанчIви сабигIзарта ауыхвара джвыквылтI, ауи гIвысквшала йхIазырхуштI. «УыжвгIанчIви апхьарта» проект апкъ йтата АлбыргIан йгьи Псыжв йгIвбахауа апхьартаква рпны «Точка роста» технология-гуманитар арыпхьара квтаква гIандыршатI. АуагIахъа проектква асквш 2024-дза абзазара йаларжьуаштI. Ауаъадза Абаза район арыпхьара нхартаква зымгIва зласыра хIагIу Интернет йашIадрышвуашта йгвыгъитI. – ЙагIвсыз асквш ауацIа КЧР аунашвачпагIвчва рцхърагIарала йгьи йазалху апроекткви апрограммакви рбзирала арыпхьара нхартаква рымлыкв щата агъьхIчIвырныс хIылшатI. Ансисквша хIрайон апхьарта автобус азалырхитI. Асквш 2019 агIан йгIахIыртыз автобус шIыцква Къвбина йгьи Псыжв йгIвбахауа апхьартаква йгIадрысабапитI. – Арайон абюджет йгIалцIыз ахчаква йгьи адепутатква рцхърагIараква арыпхьара нхартаква раъаща агъьчIвра йазынахIырхатI. Аразыра ажваква рзынасырхара стахъыпI хIгIаджвыквцIараква йрыцызкIуа КЧР АуагIа Айззара (а-Парламент) адепутатква Быджь Исмель АбдульгIазиз йпа йгьи Меремкъвыль ГIабидин Владимир йпа, – йхIватI Ныр МухIаджьыр. Ауи Абаза район абзазагIвчва рызгIвадарахчара йшазынхауагьи гIайхIватI. Псыжв кыт йтагылу арайон квта поликлиника йахъазымкIва, Къвбина, АлбыргIан, ЙынджьыгьчкIвын кытква рамбулаторияква, Къарапагва йтагылу афельдшер-акушер пункт ауагIа рызгIвадара дырхъвыхырныс, амедицина цхърагIараква гIадрысабапырныс рылшитI. Арайон айъазартаква рпны тшынла йъарайъазауа тыпта 19 гIаныршапI, ауат йрыуата Псыжв апны – быжьба, Къвбина, АлбыргIан, ЙынджьыгьчкIвын – пщбапщба. – ЙагIвсыз асквш ауацIа акъральгIвчва рызгIвадара дырхъвыхуата 2097-гIв диспансеризация йахъырщттI. АйъазагIвчва йалкIгIу гватра азалырхитI ашIашIкIгIара згIваква ргIашIакIра йгьи асабиква йаназаману ахъвшвква рыдгалра, – йхIватI Ныр МухIаджьыр. – Асквш 2019 агIан арайон йауата 34-гIв ареспублика утыцIта ауыжвгIанчIви технологияквала медицина цхърагIара ддрадзатI. ЦIыпх «ЦхърагIара ласы» къвырльыкъвхарта тшазыназырхаз 4175-гIв йнадзитI, ауат йрыуата 1054-гIв – сабипI. Айъазара нхартаква рынхагIвчва, арыпхьагIвчва, ахабзахчагIвчва, анаркотикква ргIарысабапра хъпшылра ахъцIарала МВД а-УнашвахъцIарта аъачIвагIагIвчва йрыцта чкIвыныргIа анаркотикква йырчвыхчарала анхараква, айчважвараква акIвдыршитI.