ЙФЫРРА ХIКЪРАЛЬ АТУРЫХ ЙГIАЛАХАТI

йадахIвуата аветеранква йрайхIвахIвитI, рфырра абзазагIвчва ахадыргIвазитI. УахьчIвала абазаква ветеранта йхIымаз рыуа заджвгьи адуней дгьыквхым. Ага ауаса йаъазтынгьи, ауат рыхьызква атурых йгIалахатI, рхъацIара асквшышвква йгIарылстI, йгIадзынгылуа абанпараква рабадучва ргIатгараква рхъа рыладухитI. Абашта айсра Ду аветеран, «ЙачIва Къапщы» орден йанкъвгагIвыз, хъацIара гIазырбауата йайсыз ДЖЬГВАТАН Абдул Умар йпа йыхьыз пхата йгIайгвалашвахитI йпа Джьгватан Халид. – ХIаба асквш 1916 агIан Къвбина кыт дйытI. Йаба Умар граждан айсра агIан дырщытI. ГIвысабичва лымата йгIанхаз йан сквшквакI анахъыцI лылахь Къазма дгIанагтI. Ауаса хIаба Къазма дгIадзынгылтI, – йхIвитI Халид. Джьгватан Абдул апхьарта дангIалга трактористта дапхьатI. Асквш 1936 йгIашIарышвта атрактор даквчIвата дынхатI. Асквш 1939 агIан ачкIвын къвырльыкъвхара МарагIацIцIырта Хъара дыргатI. Абдул йкъвырльыкъвхара далымгаскIва Абашта айсра Ду гIалаган, Сталинград айбащра йпшцIалыз дрылашватI. Ауи атанк йаквчIваз аэкипаж дыркомандирын. – Айсра йапщылаз хIаба йгIагвалашвахраква срыздзыргIвырныс бзи йызбун. Ауи йшихIвахуазла, Сталинград агIархвитхра йаназгылаз атанкква айбащра йпшцIалырныс штшдрыхIазыруаз машинакI гIарыдзхъаххын, ауи йгIатыцIыз айсыгIвчва ртанкква йыртаз абылчIвы анадзара шамуа рхIван, йтырщтта, уыжвласыла йгIаргуаш тарчвахырныс унашва рчпатI. Атанкква рбакква андрымцыра йаквшвауата ажвгIванд анамыца самолетква гIахъылын, танкта йалагылаз аладрыхъвашатI. ЩардагIв аладзтI, хIабагьи ауаъа йапхъахауата дхвхатI, – йхIвитI Халид. Джьгватан Абдул агоспиталь дангIацIцIх афронт дпшцIалхтI йгьи ахысыгIвчва дрылашватI. Щарда дайсытI апехота дрылата, ауаса йгIванхауата датагIархвхтI. ЙызгIвадара ангIащаквйыргылх асквш 1942–1943-ква рагIан йгIашIарышвта айсра алгандзыкIьара, намыца бызшва бзита йъайдыруаз йгIалцIла, апшыхвыгIвчва дрылан. Абашта айсра Ду аналга амщтахьгьи Абдул асквш 1946 ацIыхъвадза къвырльыкъв йхатI. – ХIаба дангIайх уахьчIва апшта йыздырхитI. Ауи аорденкви амедалькви йщардан, фырра гIайырбауата дшайсыз зымгIвагьи йхIылахIхIвун. ХIтгIачва зымгIва швабыжта хIйызпшуан. Ауи тшпсищарныс дахамдзауата Ставрополь апартия апхьара дырщтитI. Ауаъа дангIалга акытсовет дапредседательта ддыргылтI. ЪачIвагIа щарда йпсахтI, йцIыхъвахауа асквшква хIаба аколхоз дапредседательта дынхатI, – йхIвитI Халид. Джьгватан Абдул айсра агIан йгIайквнадыргаз аорденква, амедальква йгьи аразыра сальамшвъаква щардапI. Ауат йрыуапI «ЙачIва Къапщы» орден, «За взятие Берлина», «За освобождение Варшавы», «За Победу над Германией в Великой Отечественной войне 1941– 1945 гг.», «Отличный разведчик», «За отвагу» датшагьи щарда. Абдули йхъапщыла Цуци агIгIвысабичва гIадзындыргылтI. Айсра заман агIан Цуцагьи атыл анхагIвчва дрылата окоп лжытI, айсра йпшцIаз йыртахъу надырхъара ахъазла уахъгьи тшынгьи гIапсара рымдыруата йынхун. Айсра йаланарыхъвашаз агIащаквыргылхра джьгарта дазынхатI. Ауи «Материнская слава» орден агIвстепенькIгьи дрынкъвгагIвын. – ХIаба хIыла азна дыгIбарныс гьхIылымшузтI, йымшаскIва дгварцIуанта цIыхквта акIвын дангIайхуаз. Йынхара джьауапкIрала дадгылуан, – йгIайгвалашвахитI Халид. Ауи йшихIвахуала, йцIыхъвахауа асквшква рагIан раба Абдул къральыгIва ртшхъвагакI дазпшуан, йгIайадзарныс дахамдзауата асквш 1959 агIан адуней йхIваджьтI. Ауи йгIадзынйыргылыз йсабиква зымгIва раба йфырра рхъа аладухитI, ргвы пхата дгIатахатI. Ауи атшын Халид аредакция йыцгIайгыз йаба Абдул ймедальква, йыртшхъвагаква пшдзата йамгван, йыхьыз ъагIаншвалыз апхьагаквагьи сквш щарда зхъыцIта йгIвабджьахаз агазет йгIатдырсаз раби рани рунашва зну абгъьыцкви щарда цIуата йшынкъвигауа гвы аутуан. Абашта айсра Ду агIан хIайсыгIвчва джьабагIата рыла йыцIсыз, рпхдзыта ауат артшхъвагаква «йыркIну» уылаухIвун. «Арат амедальква хIан йшанлыргIалыз апшта йынкъвызгаркIвитI» – пшкадза йаба ймедальква йщщуан йдухаз апа. АйсыгIвчва рфырра хIкъраль атурых йгIалахатI, йгIартынхаз асабиква абанпарипхьадза рхъмаштылра йалазлуштI.