ЛАБА ЙЫМГIВА ЛЫРЦИТI

ПхIа дызму дзачIв абазлакIгьи ауи йылъачIвагIахуш даназхъвыцуа йшварагIварам, йтынчу уыс дадкIылазларныс йтахъыпI. Сквш 30 айхIа КъарчаЧеркес Республика ауацIа уысквала аорганква йрылу, уахьчIва КЧР-ла МВД аэкстремизм апшIагылрала а-Квта аналитика хъвшара знапIыцIу, аполиция аполковник МЫКВА Радикгьи йпхIа Марина аполиция дрылата дынхарныс гьитахъымызтI. Ауи анхара шварагIварата йапщылу йхъатала йызнымкIва йылайхIватI. Марина лаба йхIвуз зныкI ахъазла дгIашIанакIытI, Черкесск город й-10-хауа аквтанай апхьарта бзидздзата дангIалга хIреспублика квта йаныргIалу Москва афинанс-промышленна университет «Синергия» дыцIалтI йгьи асквш 2014 агIан бухгалтер учет, анализ йгьи аудит ъачIвагIа лымата аэкономика факультет дгIалгатI. Ага ауаса йаъазтынгьи, асквш 2015 агIан аполиция апны дынхауа далагатI. – Сара йанакIвызлакIгьи йстахъын саба йапшта полиция фаша сшвыта сынхарныс йгьи йыздыруан ахабзахчара шсъачIвагIахуш, – лхIвитI Мыква Марина Радик йпхIа. – Ауаса саба йара йымгIва сыквлырныс гьитахъымызтI. Апхъапхъа аурамква рпны йчIапщауа (ППС) акъвырльыкъвхагIвчва срылата сынхатI. «Йанбымуазара, – йхIватI саба, – йшаквнагу апшта сержант чынла бгIалага». Ауи амщтахь КЧР-ла МВД акадрква рхъвшара апны сынхатI. Марина ахабзахчара органква данрылал юрист ъачIвагIагьи дапхьахтI. Асквш 2018 агIан ауи Лагъь-КIавкIаз къральыгIва академия аюридическа факультет дгIалгатI. УахьчIва лаба дъанхауа аэкстремизм апшIагылрала а-Квта ахабарква рпшIагылрала йгьи контрпропагандала ахъвшара апны йалкIгIата змагIны дуу ауысквала дуполномоченна ахIбапI, лчынла длейтенант ахIбапI. – Ари а-Квта апны анхара схънахуан, – лхIвитI аполиция алейтенант ахIба. – ХIыздынхалуа айхIара йагIбахауа акласс йгIашIарышвта чкIвыныргIа ракIвпI. Архыз, Домбай, Машук йакIвшауа чкIвыныргIа рфорумква хIрыламылуата йгьагIвхIщтуам. ЧкIвыныргIа аэкстремист гвыпква йшрыланамхIвуш хIазынхитI. Аквтанай апхьарта апхьагIвчва хIанрынйауа ргIальаматра шгIащтIыхIхуаш, айчважвара йшгIалалуаш хIащтапI, чвалатшычпарата ауыс хIгьадгылуам, ашвъабгъьы йану хIгIапхьата хIгьамцIыцIхуам. Афлешмобква адыгIгалитI, асогIа хвыцква рыхIтуата анкъвакъвраква акIвхIыршитI, авидеороликква гIахIрысабапитI. Асабиква ргIальаматра ангIахIыршIыхара азцIгIараква гIахIыртуа йалагитI. Астудентква рпны рыцIа цIолата ауыс хIадгылитI. Араса Индустриальнатехнология колледж апны «Сара с-Россия – террордъа» темала йакIвхIыршаз айчважвара апны ашIаква атерроризм йгьи аэкстремизм штшачвырхчуш йахахIыргIвазатI, терроризм йгьи экстремизм нархара зму ачвгьахараква рыхъазла джьауапта йддыркIуа, ачвгьахагIвчва Интернет шгIадрысабапуа хIрыквгIашIастI, аэкстремизм йаланахIвауа йырхауа йацIыхъватшарахауа йгIаквчважвауа «Аквыджьмаква рызшIытра» видеофильм йахIырпшытI. Мыква Марина лъачIвагIа швабыжта лгвы йацчпапI, ауаса лынхара йахъазымкIва лгIальаматраква йгIарыцIаркIуа щардапI. Ауи амузыка бзи йылбитI, «фортепиано» классла амузыка апхьарта дгIалгатI, асабиква рпсихология лымаджьащахъвапI. УахьчIвала дшынхауамцара Москва афинанс-промышленна университет «Синергия» апны психолог-педагогта дапхьитI. – Психолог-педагогта съапхьауа апны асаби психология нархарата йгIалсхтI, – лхIвитI ауи. – Сынхара апны асабиква сшрачважвуш, ргвы хътIыта йшгIасачважвуш здырра атахъыпI. ДзачIв сабийызлакIгьи йхъатачIв лкIгIараква йымапI, зымгIва ацапшыта урыдгыл гьауашым. Психологияла адырраква схъа ахъазлагьи, сынхара ахъазлагьи йстахъыпI. Абараса лъачIвагIа лгвы гIащтIнахуата, лдырраква йшрылалырхIуш дащтата лаба йапшта ансимшы аполиция фаша лшвыта Мыква Марина лкъвырльыкъвхарта дадгылитI. Йылхауа ауыс хIзаман апны амагIны шдуу гIазгвнымгIвуа дгьаъам, ауи асабиква шымгIващуш дащтапI. Асабиква ачвгьи абзии рзалыргауа йаъазтын, ауат заджвги йыгьхъикъьалуашым, йамуа уыскIгьи гьдыршатIушым. ДЗЫУА Аминат