ЙДАХIВРАКВА ДЖЬАУЫМЩУШТА ЙГЬАЪАМ

«ГIвыра гIазлыцIуаш дшхвыцыркIву дудыритI» – рхIвитI хIуагIа ажважвта. Ауат ажваква срыздырхъвыцтI цысквша айхIа йыртам, зткъвымла Хъвыжвду кыт йауу, йабаду йыхьыз зхъырхIвалгIаз Черкесск йбзазауа Эгьдза Адам йдахIвраква санрыздзыргIвуаз. «Цысквша айхIа йыртам дахIврата йымазлушйа»-хIва згвы йгIанагуашгьи даъапI, ауаса ага йджьащахъвазтынгьи, Адам хвыц йгIатгараква гьмачIым. ЗымгIва йрапхъата йгIалскIгIара стахъыпI Адам гIвысквша айхIа дыртамкIва апхьара штшазибжьаз, уахьчIвала ауи дакъикъакIла ажвата 70 айхIа дгIарыпхьитI, дгIвитI, шахмат даситI, гимнастикала агIатгараква йымапI, Черкесск й-2-хауа амузыка апхьарта аэстетика хъвшара дгIалгатI. СынчIва ауи аквтанай апхьарта дцуштI. Ари аъара асаби йшпадикIылуа, йкъару йшпагIанагуа, йызгIвадара йгьазарарымма? – Сара аунагIва счIвата «Все для вас» газета садынхалитI, – лхIватI Адам йан Галина. – АунагIва съагIвну йгIалцIла асаби асабигIзарта дгьхIымщтитI, хIара-хIара йапшым анархараквала хIйыдынхалырныс, дыгIбжьарныс рыцIа йгIалхIхтI. Адам йаба Роман ахабарргага ргIапсгаквали атехнологияквали дъачIвагIагIвпI, Галина лъачIвагIала дмузыкардырыгIвпI. АгIвыджьгьи асаби аквтанай апхьарта дцанадзыкIьара йыгIзара-бжьара, апхьарта дазрыхIазырра дара йрыхъвдаквызларныс йгIалырхтI. Ауат асаби гIвысквша даннадза Москва йбзазауа айъазагIв йгьи агенетик Бахтина Елена йлылхыз «Школа гениев» программала йыдынхалуа йалагатI. – Ауи апрограмма асаби йакъыль тшауацIнарыхра, йъапкътлапкъ, йызгIвадара рыбагъьара ахъазла уызгIвымсхыз цхърагIагапI, – йгIалылкIгIатI Галина. – Адам хысквша даннадза ашахматасра тшазибжьауа далагатI, хвысквша анихъыцI гимнастика дхIщтитI. Ашахмат асаби йакъыль арыпшгIитI, чхIара гIайыланацIитI. Агимнастика йъапкътлапкъ арыбагъьитI, Амузыка апхьарта апны дгIазылгаз аэстетика хъвшара апны асуратгIвра, ахореография, атеатр, амузыка, этика ззырхIвауа ййырдыртI, ангьльыз бызшвагьи дапхьатI. ЙаъапI асаби щардачва дахIрыпхьауата, атшпсщара ахъазла заман йымамкIва згвы йгIанагуашгьи. Ауаса, йшсхIваз апшта, йазалху программала хIйыдынхалитI, ахъвмаррагьи дахадзитI, йыквлагIвчвагьи дрылапI. Йара Адам хвыц зымгIва йымаджьащахъвата йылайкIитI, ауаса йшихIвауала, агимнастики ашахмати рыцIа йгIалихитI, ауатла агIатгараквагьи дырдзынадзахьатI. СквшбжакIла шахматла дызлаз жвиз анкъвакъвракI рпны быжьмедалькI гIатигатI. Ауи Пятигорск, Ставрополь, Нивинномысск рпны анкъвакъвраква дрылан. СынчIва сентябрь Адам аквтанай апхьарта дыцIалитI. Йани йаби ауи Черкесск й-5-хауа а-Гимназия дцарныс рыцIа йгIалырхтI, йауа ухIварыквын, апхьарта унашва ахъызцIауа Чащев Сергей хIреспублика утыцIтагьи зыхьыз бергьльу дшахматистпI, асабиквагьи йбжьитI. Адам архъвыхраква дырхъысын, Черкесск амузыка апхьарта афортепиано хъвшарагьи дыцIалтI, йани йаби ауи «Полиглот» дуней колледж апынгьи ангьлыз бызшва дадрыпхьарныс рмурадпI. – Йалныс ауаштI йдырраквала атест дахъыста мызквакI рымщтахь Адам йгIвбахауа акласс ддырчIварныс, – рхIвитI ауи йани йаби. – Ажва аламкIва абаза бызшвала апхьара сахIатква дхIщтиуаштI. ЙхIтахъыпI йцри бызшвала бзита дчважварныс, дапхьарныс. Абараса гвыбзыгъарчIвачIвата дгIадзынгылитI Эгьдза Адам. Ауи йдахIвраквала йани йаби, йткъвым, абаза уагIа шйыргвыргъьалуш йазхъахIцIитI.