АШIАКВА АМАМЫР ЙАЗГЫЛАПI

Ставрополь город апны «Студенческая весна стран БРИКС и ШОС» йхпахауа фестиваль акІвшатІ. Ауи йалан РФ а-Президент СКФО-ла йгIащтийыгIв МАТОВНИКОВ Александр, Лагъь КІавкІаз ауысквала РФ аминистр ЧЕБОТАРЕВ Сергей, СКФО-ла йаныргІалу асубъектква рунашвачпагІвчва ТЕМРЕЗОВ Рашид, ВЛАДИМИРОВ Владимир, БИТАРОВ Вячеслав, КIВАКІВА Валерий, агІвымакъральква йбзазауа хІхаквлагІвчва йрыцкІрала а-Федеральна агентства аунашвачпагIв МИТРОФАНОВА Элеонора, Россия а-КъральыгІва Дума адепутат КАЗАКОВА Ольга, чкІвыныргІа руысквала а-Федеральна агентства аунашвачпагІв БУГАЕВ Александр. РФ а-Президент Путин Владимир йтшазынархара сальамшвъа дгІапхьатІ СКФО-ла аполпред Матовников Александр. – Къраль 23 йгІартыцІыз аделегацияква злу ари афорум йгІадзынгылуа абанпараква мамыр рызбжьата йащтаныкъвара магIныта йаму, швапха амырдара шыртахъу, акъраль дахIврала апхъала йчIвырхъарныс ахъазла йрылшауа зымгIва дырхъйарныс йшхIазыру йыргІарбагапІ. АкІвыршагІвчва йдрыхІазырыз ауысква зымгІвагьи йшрымаджьащахъвахуш кьангьашра гьазгІазгуам – йгІалкІгІан Путин Владимир йсальамшвъа апны. Лагъь КІавкІаз ауысквала РФ аминистр Чеботарев Сергей йшихІвазла, адуней ащтацаща зпсахырныс йхІазыру ашІаква ракІвпІ афестиваль йазнаддаз. – ЙцІыхъвахауа азаман ауацІала Лагъь КІавкІаз йапшым ауыс джьащахъваква ъадыргалуа шІыпІата йалитІ. ХІара хІыхъазла швабыжта йчІахІрапІ «Студенческая весна» й-3-хауа афестиваль Ставрополь город апны йакІвшарныс ъармурадхаз. Лагъь КІавкІаз апны бызшвала йапшым уагІата 100 райхIа бзазитІ. Ауат адызкІылуа ауысква сабапра ду рылата йспхьадзитІ. УахьчІва афестиваль йгІадгылыз ашІаква ршІыйара злу журналистпІ, ашвахІвагІвпІ, уызгІвымсхыз хореографпІ, артистпІ. Ауат злу афорум амамыри анбжьагІвыгІари йрыквшахІатпІ, – йхІватІ Чеботарев Сергей. Ставрополь край агубернатор Владимиров Владимир афорум йгІадгылыз зымгІва пхата драйхІвахІвтІ, адахІвраква шырзитахъу гІаликІгІатІ. Афестиваль адгалра йацхърагІатІ Ставрополь край а-Правительства, Россия ашІаква р-Союз йалу. Ауи агІарбараквала хІапхъахьыла йызланхуш резолюциягьи нарахвтІ.