«ХIАРА ХIЫНЦIРА, ХIАРА ХIЫЗГIВАДАРА!»

Анаркомания апшIагылра а-Мш йадахIвуата чкIвыныргIа рполитикала, акурортквала йгьи туризмла КЧР а-Министерстви анаркотикква ргIарысабапра хъпшылра ахъцIарала афедеральна къвырльыкъвхарта КЧР-ла а-УнашвахъцIарти сквшигIадза «Рисунок на асфальте» анкъвакъвра адыргалитI. СынчIва анкъвакъвра Черкесск йаныргIалу жвапхьартакI гIалалтI, зымгIвагьи шалу сабита 100-гIвы азнаддатI. Анкъвакъвра хачIв хъадата йамаз апхьагIвчва йызгIваду абзазара йхънарыхра, анаркомании атутынчвари агIвычIвгIвыс йызгIвадара лдзгIара шадрадзауа, аспорт бзи йубара шатахъу гIаргвныргIвра акIвпI. ХIапхьагIвчва йыргIвыз асуратквала рдунейпшыща гIадырбатI, ауат рарыпхьагIвчва рыцта йдрыхIазырыз анхараква азакIы ацкIыс азакIы рахIа йпшдзан. – ХIапхьагIвчва ари анкъвакъвра сквшигIадза йалалитI. СынчIва апхьарта апшцIа апны йаныргIалу алагерь йгIайуа й-5– 6-хауа аклассква йапхьауа ашIаква ракIвпI йаъу. Асабиква йазгIашыкъта асуратква ргIвитI, апхъагылара гIатыргарныс йгвыгъитI, – йхIватI Черкесск й-8-хауа апхьарта суратгIврала арыпхьагIв ЗАГАШТА Исльам ШаферкIа йпа. – Сара суратгIвра бзи йызбитI. УахьчIва ари анкъвакъвра апны хIыршIыйара гIахIырбарныс хIылшуштI. ХIапхъагылагIвхарныс хIтахъыпI. ЙыгIгIвыз асурат зшIытгата йамапI «ХIара хIынцIра, хIара хIызгIвадара!», – йгIалылкIгIатI Черкесск й-8-хауа апхьарта й-6-хауа акласс апхьагIв Къахвын Амира. ЧкIвыныргIа рполитикала, акурортквала йгьи туризмла КЧР а-Министерства ахъвшара аунашвачпагIв Крымшамхалов Зураб йшихIвазла, анкъвакъвра сквшигIадза тшауацIнахитI, азыгIальаматра рымата йгIалалуа асабиква рпхьадзара йалахIитI, Апхьартаква рарыпхьагIвчва асабиква анкъвакъвра йаздрыхIазыруата уыс щарда акIвдыршитI. Анкъвакъвра йалаз агвыпква зымгIва аграмотакви атопкви рырттI. Апхын агIан асабиква ртшпсщара мшква джьащахъвазлара, йызкву рымгIва йыквымцIырныс ахъазла анаркомания азгIвадара йшазарару, аспорт шбзазару гIаргвынгIвра ахIатырла йапшым анкъвакъвраква, айчважвараква ракIвыршара сабап алапI.