ЙАЦАЦХЪРАГIАУА РУЫС ЛАСХИТI

ХIреспублика апны адзы ауысла йъакIвызлакIгьи уыздынхалуаш щардапI, йажвыз адзцагаква тIахсахатI, псахра йазыбжапI. ЙцIыхъвахауа асквшква кытипхьадза апны адзцагаква гIадыршIыцхуата анхараква акIвшитI. Гвым апынгьи адзы ауысла архъйачIвква гьмачIым. Агвымква ркъаруква адыркIылын, дзыдъа йгIанхаз ахIабльаква йырцхърагIитI. ЙагIвсыз амыз КIьабаца хIабльа – айщчва НагайргIа рыхьыз зхъу аурамла адзцагаква кIылыргатI. «Кумское» муниципальна нхарта адиректор ПОЛЯКОВ Игорь Анатолий йпа йшихIвазла, ахIаракьатчпагIв бергьльы, Адуней абазаабхаз Конгресс йхIаракIу а-Совет знапIыцIу ЭГЬЗАКЬ Мусса, КЧР а-Хъада йцхърагIагIв НАГАЙ Алибек, акыт администрация рцхърагIарала ауи ауыс рылшатI. – Дзыла рыцIа йгIапсауа ахIабльаква рпны хIынхитI. КIьабаца апны километркIи бжакIи айхIа дзцага шIыц тахIцIатI. Ужвы ахIабльа абзазагIвчва жвгIвала дзы гьгIахъаргылхуам, рунагIваква дзы шгIайуала зымгIва разыпI, – йхIвитI Поляков Анатолий. Адзы йапщылу ауысква радгалра гьмайрам, анхараква йрылагара апхъала абзазагIвчва дзы шрызкIылыргушла ашвъаква агвындыргIвра, проект лырхра атахъыпI. Ауыгьи заман щарда уыквнахитI. Гвым ачIварта гьыгъвгъварыртам, ахIагIартаква йбзазауа дзы рзугарныс гьмайрам. КIьабаца хIабльа апны йанынхуз абаргвыраква гIаншатI. Айщчва НагайргIа рыхьыз зхъу аурам хIагIартапIта анхараква ракIвыршарала йгIапсатI. Йаншуаругьи йанхьтугьи аунагIваква зымгIва дзы рызцара ахъазла ркъаруква йгьырмайгьдзатI. – Айщчва НагайргIа рыхьыз зхъу аурам апны адзы бзита йгIайра ахъазла апластик дзцагаква тарцIатI. АчкIвынчва ауи ахIабльа апны анхараква майрата йыгьрылымшатI. Эгьзакь Мусса йцхърагIарала араъа йдырхIаз атехника швабыжта ауыс арыластI. Мусса ХIабальа йпа йхIзалихыз аэкскаватор, датша йызланхауа атехника йрыквыдзуа ахчагьи гIауищтитI, ауат йрыланхауа ачкIвынчва нхаша рититI. ХIыхъазла ауи швабыжта цхърагIара дупI. Нагай Алибекгьи АлахI дизыразхатI, йкытлагIвчва дзы йнахъауата йрызцара ахъазла адзы ауыс йазынадырхаз ахча бзи гIариттI, – йгIаликIгIатI Гвым кыт администрация ахъада ХВЫТI Игорь. Гвым кыт апны адзы ауысла абаргвыраква алдыргауищтара йыгьсквшыкIым йцIуа. АбзазагIвчва дзыла йадгалрала анхараква йырзынадырхуш ахча ъарымамыз йгIалцIла ауи апхъала йрылшаз мачIпI. – Асквш 2019 агIан акыт администрация абюджет ахъахIара адзы ауыс йазынахIырхарныс йщаквхIыргылтI. Садова урам абзазагIвчва апластик дзцага трубаква рзыхIхвгIарныс йанахIва, администрация ахчала метр 300 йнадзауата труба рызгIадхIрыгтI. Аурам абзазагIвчва айззан, рунагIваква дзы кIылыргатI, – йхIватI ХвытI Игорь. Поляков Игорь йшихIвазла, йагIвсыз амыз дзы ъакIылыргаз айщчва НагайргIа рыхьыз зхъу аурам апны аныкъвартаква йырхьпшыхра атахъыпI. Ауи амщтахь Ленин йыхьыз зхъу, Кооперативна, Коминтерна урамква рпны адзцагаква гIадыршIыцхуаштI. – Ленина урам апны йпсахра атахъу адзцагаква метр 400 йнадзитI, Кооперативна – метр 300, Коминтерна апны йхIпсахуаш метр 500-ла аурапI, – йгIаликIгIатI «Кумское» МУП адиректор Поляков Игорь. Ауи йшихIвазла, акыт апны адзцагаква ангIадыршIыцхра амщтахь ауагIа адзы зъара азыршвушгьи щаквдыргылра атахъыпI. – КЧР а-Хъада йгьи а-Правительства р-Администрация хIанызшIырт акытква рпны адзы ахв щаквхIыргылырныс хачIвы дыргылтI. ХIкыт апынгьи ари ауыс хIалапшра атахъыпI. УахьчIвала ауагIа дзкубкI быжьсомкIпI йазыршвауа. ХIпны апш адзы ахв ъамачIу кыткIгьи гьаъам. ЙгIазхIкIкIуа ахча адзы гIахъазцылуа аргIапсгаква йырбылуа аэлектроэнергия ахв гьхънагIвум. Анасосква ркъару мчыпI, ауат злахIхвгIаз ахча «Алашара» АНО йгIаунащттI, – йгIаликIгIатI Поляков Игорь. Акыт абзазагIвчви адзы ауыс адызгалуа аъачIвагIагIвчви йагвынгIвыта йауаш хвыкI щаквдыргылырквын, ауагIа йапымшвтуата дзыцкьа рызцуштI. «ЙацацхърагIауа руыс ласхитI» шырхIвуа апшта, зкытлагIвчва бзиракI рзызхарныс йгвжважвауа рцхърагIарала йыншауа апсахраква ауагIа шдрыразуа абзазагIвчва рнашхква йгIадырбитI. АуагIа рызгIвадара, рбзазара агъьчIвра йазхъвыцуа ркъаругьи, рзамангьи, рахчагьи йырмайгьдзауа, йъагIадзынгылыз рцри кыт йацхърагIитI. Ауаса йаъу хIуагIа рмурадква йанакIвызлакIгьи йгIардахIвыргIатI.