Россия Федерация Абджьар Къаруква рветеранква рыжвлара организация йщаквнаргылыз «За самоотверженность» медальква айъазагIвчва йъарыртуаз айззара апны КЧР айсра комиссариат анхагIвы, аподполковник Щыбзыхва Асльамбакь амедицина анхагIвчва драйхIвахIвтI. – АзгIва йабакIуа айъазагIвчва швхъа швамайгьдзауата ачымазагIвква рырбзихара къару ду алашвцIитI.
Швара йшвапшу аъачIвагIагIвчва рцхърагIарала йбзихауа рпхьадзара йалахIитI. АзгIвадарахчара гвхътIыла швъазынхауа ажвлара хвы швыквырцIитI, йшвзыразта швбзира рхIвитI.
Заджвгьи швадйымцалуата швтахъырала ашIашIкIгIара зхьуа шврайъазатI йгьи йыгьзаджвым зызгIвадара гIашвхчаз. Швбзира ауагIа зынгьи йгьырхъаштылуашым, – айъазагIвчва драйхIвахIвтI Щыбзыхва Асльамбакь. Ауи «Абашта агвыргъьахъвква рыртлапIарала а-Федеральна адгалра комитет» акоммерция йалам аорганизация ахабзалыхра Совет апредседатель, архъв агенерал ЕРМАКОВ Виктор Федор йпа, Россия Федерация Абджьар Къаруква рветеранква рыжвлара организация КЧР-ла ахъвшара знапIыцIу, къвырльыкъв зымхахуа аполковник ТЕМЫР Арсен Тимур йпа айъазагIвчва йырзынадырхаз ахIвахIвра дгIапхьатI, «За самоотверженность» медальква риттI. Медаль зыртыз Хаджимусова Тамара йгьи ТхIагъапса Оксана КЧРБ апны коронавирус абакIрала агоспиталь хымчыбжьа йынхатI. АгIвыджьгьи агоспиталь апны йъадзатахъыз аъара рхачIвква йнардзата йдырхъйатI.
Комментарии