ЦХЪРАГIАРА ЙАЗЫБЖУ ЙЫРЗЫНАДЗИТI

КЧР МВД ажвлара совет хIреспублика агвчIагIвра фондква рынхара йъалачважваз айззара акIвнаршатI. Ауи йалан ауацIа уысквала КЧР аминистр МЕЛЬНИЧЕНКО Александр, ауи йцхърагIагIвчва, КЧР МВД ажвлара совет знапIыцIу АТАБИЕВА Мария, хIреспублика агородкви арайонкви рпны Россия МВД ахъвшараква рыжвлара советква ргIащтийыгIвчва. Анйара апны КЧР МВД ажвлара совет йакIвнаршауа «Абзихара агIамта» гвчIагIвра акция шакIвдыршуш йаквчважватI. Акция апкъ йтата агвчIагIвра уысква сынчIва апрель йгIашIарышвта йадыргалитI. «Абзихара агIамта» акция «Территория милосердия», «Счастливое детство», «Моя Карачаево-Черкесия», «Самира», «КIавкIаз», «Российский Детский Фонд» ахъвшара гвчIагIвра фондквагьи йацыркIтI. «Абзихара агIамта» акция апкъ йтата хIреспублика арайонква рпны саби щарда зму атгIачваква йырцхърагIатI. ХIабаз йгьи Абаза муниципальна районква рпны цхърагIара йазыбжу жватгIачвакI фачIвы рзыргатI. Россия МВД «Хабезский» межмуниципальна хъвшара ажвлара совет йалу агвчIагIвра уыс акIвыршара йацхърагIатI. Айззара апны Атабиева Мария йшылхIвазла, атгIачваква цхърагIара дызрадзауа агвчIагIвра фондкви ажвлара совет йалуи йацынхарквын, щардагIвы рзыргвыргъьуштI. – УахьчIва хIацынхара рыцIагьи йхIырбзийырквын, хIызцхърагIауата ашвъа йану атгIачваква йгIарылархIа ауаштI. Ауи ззысхIвауа, цхърагIара йазыбжата, ауаса ауи нарахвырныс зымуа атгIачваква хIрыдынхалырквын, хIылапш йыцIазлуштI, – лхIватI Атабиева Мария «Абзихара агIамта» гвчIагIвра акция акIвыршара йацхърагIауа дшырзыразу гIалылкIгIауата. АуацIа уысквала КЧР аминистр Мельниченко КЧР МВД йаланакIуа ажвлара советква йрылу, агвчIагIвра организацияква знапIыцIу атгIачваква йъарцхърагIауа ахъазла дшырзыразу йхIватI. Ауи йшгIаликIгIазла, атгIачваква рызкъы рзыргара йахъазымкIва, датша йыззыбжула йадгалрагьи магIын ду амапI. – УахьчIва йацыхIчпауа агвчIагIвра уысква асабиква агвымхараква йырчвыхчарала анхараквагьи гIарыцIанакIитI. АтгIачва апны асаби йдрыфуаш, йшвырцIуш рымамызтын, рхъа гвымхара гIаташварныс, ймыгIвхънагарныс ауаштI. Збзазара хIатлу атгIачваква рпны анчви абачви рбзазаща хIырхъвыхитI, ракъыльаквымшвара гIазлыцIуа гIахIхIырдыритI. АтгIачва апны абаргвыраква асабиква йрымзарархара ахъазла амальква гIахIрысабапитI, – йхIватI Мельниченко Александр. Айззара йалаз зхъахIара накъву атгIачваква цхърагIара драдзарала анхараква апхъахьылагьи йшгIашIадымрысуаш гIалыркIгIатI, ажвлара советкви агвчIагIвра фондкви рацынхара рыцIагьи йшагъьырчIвуашла йагвынгIвытI.  Август а 1, а 8 йакIвшаз акцияква рыпкъ йтата саби 2000-гIв фачIвы рзыршатI. Ауи акIвымкIвагьи ареабилитация Квта йаныргIалу асабиква ларпшра Домбай йыргатI.