Янъы ис орынга

Карашай-Шеркеш Республикасынынъ Басшысы Рашид Темрезов КЧР Правительствосынынъ Председателининъ орынбасары – финанслар министри этип Мурат Ханафиевич Суюнчевти салувы акында Указга кол басты. Муннан алдын ол Россиядынъ Пенсиялык фондынынъ КЧР бойынша регионлык боьлигининъ басшысы болып ислеген. Пенсиялык фондынынъ КЧР бойынша боьлигиннен алдын ол Халк Йыйынынынъ депутаты бола келип, экономикалык политика, бюджет, финанслар, налоглар эм эпшиллик бойынша комитетин басшылаган. Сонъ КЧР законшылык органыннан РФ Федерация Советининъ сенаторы болып, ол Федерация Советининъ бюджет эм финанслар рыногы бойынша комитетининъ агзасы болган. Оннан баска Мурат Ханафиевич Оькиметлик Думадынъ эм Федерация Советининъ бюджетлер ара айкаслар соравлары бойынша уьш яклык комиссиясынынъ санына кирген. Рашид Темрезовтынъ белгилевинше, ол М.Суюнчевти янъы ис орыны уьшин кеспили эм аьзирликли аьдем деп санайды, неге десе онынъ финанс-экономикалык оьлшемде уьйкен сулыбы бар. Оннан баска Мурат Суюнчевтинъ Россия Правительствосы ман эм ерли оьзлик басшыланувдынъ басшылары ман биргелес ислесуьвдинъ коьп йыллык сулыбы бар. Исши йолыгыстынъ барысында Карашай-Шеркеш Республикасынынъ Басшысы янъы вице-премьер – финанслар министри алдында бир кесек маьнели эсапларды салды, айырым эсти оькиметимиздинъ басшысы салатаган Федераллык Йыйынына каратылган эм «Май» Указларында белгиленген эсапларды яшавга эндирмеге кереги акында айтты.