РОССИЯ АМШГIВЫРА ЙАЛАЛЫЗ АУЫСАГIВ

Къарча-Черкес Республика, Коста Хетагурова кыт абзазагIвчва рышта зыхьыз нкъвнагауа ауысагIв, апублицист, асуратчпагIв йхъыцIыз асквш 160 йазынарху гвыргъьахъв адыргалтI. Ауи йалан Лагъь Осетия– Алания йгIатыцIыз аделегация, Къарча-Черкес Республика а-Правительства йалу, ажвлара организацияква йгьи аполитика партияква ргIащтийыгIвчва, абзазагIвчва. Къарча-Черкес Республика а-Хъада Темрезов Рашид йыхьызла агвыргъьахъв йгIадгылыз тшырзынайырхауата дгIачважватI ареспублика а-Хъада йгьи а-Правительства р-Администрация аунашвачпагIв йзаместитель СЕМЕНОВ Ахмат. Ауи йшихIвазла, аосетин литература ащата щтIазцIаз данйыз амш артлапIара Лагъь КIавкIаз абзазагIвчва зымгIва йырзацапшу гвыргъьахъв мшыпI. – Хетагуров Коста йыршIыйара бызшва щардала йалу КIавкIаз абзазагIвчва йырхъардугапI. Къарча-Черкес Республика апны ауысагIв бергьльы йтынхараква хвду рзырбитI. Ауи йанакIвызлакIгьи ацIабырг дазгылан, ауагIа драргванын. Аосетин гвымчIва йыхьыз анцIрала Россия амшгIвыра йалазлуштI, – йгIаликIгIатI Семенов Ахмат йгIачважвара апны. Агвыргъьахъв йгIадгылыз тшырзынадырхатI ауагIахъа уысквала Лагъь Осетия–Алания аминистр ЦУЦИЕВ Аслан, Къарча район администрация ахъада КУЩЕТЕРОВ Спартак, Цхинвал город администрация знапIыцIу КОЧИЕВ Алан, «Иудзинд» осетин жвлара организация акоординатор ТОКОВ Владимир, «Фарн» осетин жвлара организация апредседатель ХЕТАГУРОВ Олег. ЙгIачважваз зымгIвагьи Хетагуров Коста йыршIыйара аосетин йгьи абашта литература рпны магIныта йаму гIалыркIгIатI. Агвыргъьахъв йалаз ауысагIв, агIвгIвы, асуратчпагIв йчвахъабага ащапIы йгьи а-Фырква р-Аллея апны ахIврапшдзаква щтIарцIатI. АршIыйагIв йысквш 160 йазынархаз агвыргъьахъв митинг амщтахь зымгIвагьи аконцерт джьащахъва йапшырныс рылшатI.