ГIВУАГIАХЪАКI АПЫЗЩЫЛУА ГIАНШАРАХАТI

Октябрь а-16 йгIашIарышвта а-18-дза Абхаз Республика апны «Абаза» культура-спорт фестиваль акIвшатI. «Акультура йгьи аспорт нархараквала ацзакIыра рыбагъьара» зшIытра зму афестиваль сынчIва йапхъахауата йадыргалтI йгьи ауи Апсны апны ансисквшагьи йакIвдыршарныс йагвынгIвытI. Абаза уагIахъа радкIылра йазынарху афестиваль апкъ йтата хвитта абакIрала й-8-хауа адуней анкъвакъвра сынчIва Гудаута город апны йакIвшатI. ЙцIасхаз анкъвакъвра йалаз абакIыгIвчва абхаз-абаза Дуней Конгресс ЙхIаракIу асовет (ВААК) апредседатель ЭГЬЗАКЬ Мусса йсогIа йазабакIтI. Ауи Абхазия, ГIвадахь Осетия, Россия йаланакIуа жвизсубъекткI йгIартыцIыз спортсмента 200-гIв аднакIылтI. Анкъвакъвра ангIахъыртIуаз Эгьзакь Мусса йгIайззаз тшырзынайырхатI. – Швара анкъвакъвра швалата швкъару, швылшараква гIашвырбарныс швайщчва рпны швгIайтI. Аспорт тшыбжьараква, анкъвакъвраква чкIвыныргIа ртшауацIыхра йацхърагIитI, хIаль пшдза гIарыланацIитI. УахьчIва йанкъвакъвуаш абакIыгIвчва швмурадква гIашвдахIвыргIатI, швыхьыз зыргуш агIатгараква швырзынадзарныс швзыстахъпI, – йхIватI Эгьзакь Мусса. ГIвымшкI йакIвшаз анкъвакъвра агIарбараквала зныбыжьла, зхIатларала йалыхыз аспортсменква рпны Абхазия ахьызла тшгIазырбаз абакIыгIвчва медальта йырквнадыргаз рыцIа йщардапI. Къарча-Черкес йтыцIыз абакIыгIвчвагьи ргIарбараква гьымгвымхахатI. «Абаза» хвитта абакIрала аклуб (КВБ) ахьызла йабакIыз Тобыль Алан йапхъахауа агыларта йкIытI йгьи йагъьу абакIгIвыта дгIалыркIгIатI. Ауи анкъвакъвра асогIа хъада – Эгьзакь Мусса й-Кубок йквнадыргатI. Шогьан Резуан афинал апны дзабакIуаз дйайгIайзарквын, апхъагылара йкIуашын, ауаса йъайылымшаз ахъазла йгIвбахауа агыларта асогIа йквнадыргатI. Анкъвакъвра агIарбараквала йхпахауа агылартаква зкIыз Уаз Дали, Хъакъвпщ Шамиль, Быджь Шамиль йгьи Ныр Амир джьаз медаль рквнадыргатI. – Анкъвакъвра апны бзита тшгIадырбушта хIзайгвыгъуз КIвакIва Амиран Абхазия хIанцуз мгIва хIыквта дчмазагIвхатI. Шогьан Ибрагимгьи зны дабакIытI йгьи дайгIайтI. Ауаса йгIвбахуз анйара апны дшабакIуаз йнапIы шIчIван, анкъвакъвра дгIалцIра атахъхатI, – йхIватI «Абаза» КВБ апрезидент Чква Расул. Черкесск йауу Бежан Роберт кIьыл 100-дза зхIатлару абакIыгIвчва руацIала рыцIа дымчхъахатI. Ауи йапхъахауа агыларта асогIаква гIайырттI. Йара ауаса, рыцIа йхIатлу абакIыгIвчва рпны йгIвбахауа агыларта йкIытI Джьгватан Зауыр. Ауи жвыхвсквша ракIвпI дызту, Нижневартовск дауапI. Зауыр Гудаута йыцгIайыз йаба Вадим йакIвпI дызбжьауа. – ХIара хIабазапI, ари анкъвакъвра акIвшушта ахабар анхIагIа хIайщчва хIрызгIайтI. Эгьзакь Мусса йыхьызла йакIвдыршалауа атурнир абакIыгIвчва шIаква рыхъазла магIын ду зму анкъвакъврапI, – йхIвитI Джьгватан Вадим. Абхазия йахъазымкIва, Россия, СНГ акъральква рпынгьи ари анкъвакъвра дута йаквчважвара, хвы азырбара ахъазла Эгьзакь Мусса аспортсмен шIаква радкIылра къару ду шалайцIауа гIайхIватI Апсны апны хвитта абакIрала абжьагIв хъада Бения Джарназ. – Абхазия апны Эгьзакь Мусса йбзирала 600-гIв хвитта абакIра тшазырбжьитI, ауат йрыдынхалуа абжьагIвчва 35-гIв йнадзитI. Аспорт объектква зымгIва йатахъула йадгалапI, – йхIватI Бения Джарназ. Абхазия апны Эгьзакь Мусса йыхьызла хвитта абакIрала й-8-хауа адуней анкъвакъвра шакIвшазла зымгIвагьи разхатI. ЧкIвыныргIа шабакIуаз йахъпшылуаз аорбитрква зымгIвагьи рхачIвква бзита йдырхъйатI. Атурнир апны йагъьу орбитрта дгIалыркIгIатI Цвейба Адам. Абхаз спортсмен Пилия Данил «За лучшую технику» согIа йквнадыргатI. «АБАЗА» КУЛЬТУРАСПОРТ ФЕСТИВАЛЬ «Абаза» фестиваль апкъ йтата акультура айззараква, агIарбараква, агвыргъьахъвква СогIвым город апны йакIвшатI. Ацынхара, ащтаныкъвара пшдза зызбжьу ВААК анхагIвчва, аволонтерква, хIреспублика йтыцIта Апсны йцаз «Алашара» адкIылара йалу афестиваль йцIыхъвахуз амш гвыргъьахъв пшдзата йакIвшара ахъазла ркъару йгьамайгьдзатI. Абхазия къральыгIва драмтеатр адзхъа сквшщарда зхъыцIуа абаза уагIахъа йгIарыквчважвауа асуратква, АлбыргIан аквтанай апхьарта йгIаныршу аэтнография музей апны йхъырхыз асуратква ргIарбара акIвшатI. КъарчаЧеркес абаза кытква рпны йгIаныршу апхIвыс советква йдрыхIазырыз абаза рызкъква ргIарбарагьи джьащахъван. – Араъа йапхъахауата йсшIашваз абаза рызкъква сгвапхатI. АхIальыуи акъальтами швабыжта йхъагIапI. ХIпны абаста йшпху айшва йгIахвындыргылитI, абазаква хьшвашвата йырфитI. Абхазкви абазакви йырмацIаулауа рызкъквакI уызгIашIыпхьадзуштI, ауаса йызлаквымшвауа рыцIа йщардапI. СогIвым город апны абаза рызкъы сшIашвушта зынгьи сгвы йыгьгIанамгтI. Ари йапшу айззараква апхъахьылагьи йакIвыршалара атахъыта йспхьадзитI, – йгIалылкIгIатI ажурналист Наала Кове. Абхаз Республика а-Президент Хаджимба Рауль йгьи а-Правительства анхагIвчва агвыргъьахъв йалан. Ауат абаза рызкъквагьи ршIашватI, афестиваль анхъыргIвахуаз йакIвшаз агвыргъьахъв концертгьи йапшытI. Аконцерт аналагуз ВААК ЙхIаракIу асовет апредседатель Эгьзакь Мусса йгIайззаз тшырзынайырхатI. – ХIара Абхазия апхъаламгIвайсра, хIайщчва ркультура йрыцхIкIырныс хIборчта йхIпхьадзитI. Къарча-Черкес йгьи Абхазия гIвагвана ауыра рызбжьазтынгьи, ауи хIабабари хIащтаныкъвари йазарархара гьатахъым. ХIапхъахьылагьи хIащтаныкъвара рыцIагьи йбагъьахуштI, щардала хIабазырбуш ауысква адыгIгаллуштI. Швари хIари хIацзакIызтын, йхIзымчпуш гьаъам. ХIадкIылата хIзацынхарквын, азаджв азаджв хвы йыквхIцIарквын, хIбзазарагьи пшдзахуштI, хIтурыхгьи хIкультурагьи хIзыхчуштI. Швари хIари хIхъа щтIыхта апхъала хIшзычIвырхъауа арат амшква йацакIвхIыршаз афестиваль йгIанарбатI, – йхIватI Эгьзакь Мусса. Агвыргъьахъв концерт апны йгIахIвытI, ашва рхIватI КЧР акъральыгIва гIахIвра Театр, «Ахьышвтра» ансамбль, «Абазги» гвып, «Абаза» гIахIвра ансамбль, ЛагIвычв СултIан, Тания Сания. Ауаъа «Йынджьыгь» уагIа театр йгьи КЧР акъральыгIва гIахIвра Театр атаца ахIбачва данрыквнардылуа апхъанчIви хабза пшдзата йгIадырбатI. Абхазия ауагIа рартист Гунба Людмила йгьи Абхаз Республикала гIатгара зму артистква Зухба Зухра, Конджария Рустан йацырхIваз «ЙтыбгIапI адуней» ашвала аконцерт алгатI. Ауи амщтахьгьи ауагIа ласы йгьамцIымцIхтI – ауат гIахIвытI, къвабыз йасуаз ашва рыцырхIватI, рыла дырпшытI. Агвыргъьахъв адгалагIвчва йшыртахъыз апшта афестиваль кьахвта йакIвшатI. Ауи абхаз-абаза чкIвыныргIа йрыуата щардагIвы абанардыртI. Апхъала йабамбасыз аршIыйагIвчва гвыпква ауаъа йанйатI, ашва рхIватI, йацгIахIвытI. Агвыргъьахъв адгалагIвчва йшщаквдыргылызла, «Абаза» культураспорт фестиваль Абхазия апынгьи ансисквша йакIвдыршалуштI. ЙШАЦЫНХУШЛА ЙАГВЫНГIВЫТI СогIвым город апны КЧР АуагIа Айззара (а-Парламент) а-Председатель йзаместитель Эгьзакь Мусса йгьи Абхаз Республика АуагIа Айззара (а-Парламент) а-Председатель Кварчия Валерий анйатI. Кварчия Валерий Эгьзакь Мусса КЧР АуагIа Айззара (а-Парламент) а-Председатель дъайзаместительхазла дйайхIвахIвтI. Ауи агIвреспубликакI рпарламентква рацынхара йазынархата ангIалра мачвы ацIарцIарныс щаквзыргылыз йара Экьзакь Муссагьи дшрылу гIаликIгIатI. – Уара ВААК ЙхIаракIу асоветгьи уапредседательпI, Къарча-Черкес апны ахабзалыхра властьгьи уалапI. А-Парламент апны уъанатIа шIыц хIацынхара рыцIагьи йшарыбагъьуш йазхъасцIитI, – йхIватI Кварчия Валерий. Эгьзакь Мусса йшихIвазла, Абхазия йгьи Къарча-Черкес рпарламентква рацынхарала ахачIвква сабапра гIаргуата йшлырхуаш йазынхуштI. – ХIара хIызлачважвуш ауысква, йацлыхIхуаш апрограммаква зымгIва хIырхъйуштI, агIвреспубликакI ртшауацIыхра хIазынхуштI, – йгIаликIгIатI Эгьзакь Мусса. Кварчия Валерий йгьи Эгьзакь Мусса датшагьи агIвреспубликакI рацынхара агъьызчIвуаш амальквагьи йрыквчважватI.