АШIАКВА ЙРЫДЫНХАЛИТI

Черкесск город «АдзыгIвбжьа ЙачIва» культура-тшпсщара парк апны «Росгвардия» КЧР-ла а-УнашвахъцIарта «Безопасный город» ахьызта фестиваль акIвнаршатI. Ауи ангIахъыртIуаз йгIачважватI «Росгвардия» КЧР-ла а-УнашвахъцIарта знапIыцIу йзаместитель ЧОМАЕВ Эдуард, ахабзахчара рхъвква рветеранква Лагъь КIавкIазла рыжвлара организация КЧР-ла ахъвшара апредседатель КУЗНЕЦОВ Сергей, ДОСААФ КЧР-ла аквта адиректор ЖЕЛНАКОВ Андрей, «Боевое братство» жвлара организация КЧР-ла ахъвшара апредседатель АФАУЫН ИсхIакъ. – УахьчIва хIайззара йгIахIрайгваз чкIвыныргIа «Росгвардия» КЧР-ла а-УнашвахъцIарта акъвырльыкъвхагIвчва йгIадрысабапуа абджьарква, айсра техника, акинологква алаква рыцта йшынхауа швдырбуштI, акъральгIвчва абджьар ахвгIара, анкъвгара, ахчара йшадрыхвитуа швархIвуаштI, ахабзахчара органква сквшщарда йрылаз аветеранква гIашвынйуштI, – йхIватI Чомаев Эдуард. Афестиваль йдрайгваз апхьагIвчва Калашников автомат шамцIырхуа, йшамцIарцIахуа ддырбатI, йгIаладыргылыз атехника йрымаджьащахъвата йапшытI. – ХIсабиква р-Абашта бзи йырбауата, ауи йазцIабыргта ргIадзныргылра хIазхъвыцуата апхьартаква рпны айсра-патриот нхараква щардата йакIвхIыршитI. УахьчIва афестивальгьи чкIвыныргIа акъвырльыкъвхара йачвымшвауата ргIадзныргылра, ахабзахчара органква рпны анхара хъацIарата йапщылу гIаргвынгIвуата рщаквгылра йацхърагIауа уыспI, – йгIаликIгIатI Кузнецов Сергей. ОМОН амедицина хъвшара афельдшер хвырта задзаз йапхъахауа медицина цхърагIара шидрадзауа, ауи ласыта дшатдрыпауа асабиква йдйырбатI. «Росгвардия» КЧР-ла а-УнашвахъцIарта акинологква йрыцыз алаква агIвжвага пкъыгIваква шгIарауа гIадырбатI. Афестиваль ацIыхъва йаннадза акъральгIвчва абджьар ахвгIара, агIарысабапра, ахчара йазрыхвитуа ахабзаква, ари ауысла мыгIвхъгара нзыршауа джьауап шидыркIуа зну ашвъабыгъьква йгIайззаз йрыларшатI.