ХIЦIАСКВА РЦIОЛАРА МОСКВА АПНЫ ЙГIАДЫРБАТI

Театр – хIбзазара гIазырбауа азъазара квпшырапI. Ауи гIаншищтара щарда цIитI йгьи псахра щарда гIалалтI, ауаса атехнологияква апхъагылара аныркIуа хIзаман агIангьи атеатр бзи йызбауа апшыгIвчва рпхьадзара гьмачIым. Ауат ателебарагьи Интернетгьи «псы зхъу» атеатр агыларта зынгьи йырзымкIуашта йырпхьадзитI. ХIкъраль апны зыхьыз адунейла йгаз театр щарда аъапI. Къарча-Черкес Республика апынгьи уагIахъипхьадза дара ркъральыгIва театрква рымапI. Асквш 2001 агIан КЧР а-Президент йунашвала хIреспублика апны «Абаза къральыгIва драма театр» гIандыршатI. Ауи унашва ахъызцIарныс йыззхъарцIаз, швапха байа зырхIаз акультура анхагIвы КIЬЫЩМАХВА Умар Йараджьыб йпа атеатр ащаквгылри атшауацIыхри къару щарда алайцIатI. КIьыщмахва Умар йадикIылыз агвып рыргылчIвква апшыгIвчва йыргвапхун. Асквш 2020 декабрь агIан Абаза къральыгIва драма театр аунашвачпагIв йхъвдаквцIараква лырхъйарныс КУРШЕВА (Шай) Марина Расим йпхIа ддыргылтI. Марина ауи апхъала Абаза район апны йгIаныршу «Центр культуры и досуга» даунашвачпагIвта дынхатI. Швапха байа зырхIаз йгьи зхъвдаквцIараква джьауапкIрала йрыдгылуа аъачIвагIагIв йгIалызхъарцIаз аъанатIа шIыц гвалагIваласра щарда гIалыланацIитI. Ауи лынхара шIыц далагищтара заман щарда мцIызтынгьи, агвып Москва апны рыхьыз дыргарныс йахадзахьатI. Къарча-Черкес гIаншищтара йахъыцIуаш асквшышв йадахIвуата йтыцIыз асквш 2020 декабрь агIан Абаза къральыгIва драма театр Москва йгIахъвмарырныс йцатI. Ауат йдрыхIазырыз аспектакль гIазхъыху абхаз гIвгIвы Лакербай Михаил йновелла «Асас» хIкъраль абзазагIвчва йахагIвазам дгьаъамзапI. МагIын цIола зму ановеллала аспектакль асквш 1996-ква рагIан «Йынджьыгь» уагIа театр апны йдыргылхьан. Ауи азаман агIан режиссерта йадынхалыз Быджь Амир аспектакль апшыгIвчва гвалагIваласра щарда шгIарыланацIаз гIаликIгIатI. УахьчIвала «Асас» пьеса бзазара шIыц азтхыз арежиссер шIа Агача Эльдар йара йпшыща апшыгIвчва йрыцагIвишатI. – Лакербай Михаил йновелла «Асас» швабыжта ухъа утанархъвыцитI. Ауи КIавкIаз абзазагIвчва зымгIва аднакIылуата хIхабзакви хIцIаскви апхъагылара шыркIуа йагIарбагапI. Афыр хъада Ханашв йхъатачIв хьыгIа найрыскIьата, йпазаджвыкI дызщыз, йцхърагIара йазыбжата тшгIайзыназырхаз асас дшкъайчIвахыз, асас йрайгвара ацIас магIныта йазырбуз Москва апшыгIвчва ахахIыргIвазарныс хIмурадхатI, – йгIалылкIгIитI Куршева Марина. Агвып Москва йандрайгва атеатр анхагIвчва айкьангьашын, йрымаз азаман мачIызтынгьи, «Асас» спектакль дыргылырныс йаквдырпштI. Агача Эльдар апьеса дадынхалхтI, адекорацияква, рфашаква йацацхърагIауамцара йдрыхIазыртI. Культурала РФ а-Министерства, культурала Къарча-Черкес а-Министерства рацкIрала Къарча-Черкес гIаншищтара йцIуа асквшы 100 йадахIвуата Москва йаныргIалу «Театр Луны» асцена апны йапхъахауата Абаза къральыгIва драма театр гIахъвмартI. Ауи амш азал йыгIвначIваз зымгIвагьи аргылчIв гвалагIваласра ду гIарыланацIатI. – Москва йбзазауа хIхаквлагIвчвагьи абхазквагьи йхIыцыркIуата аргылчIв йапшырныс йнайтI. Азал уагIала йырчвын. Йапхъахауата Москва асцена йгIахъвмарыз хIхъа ду йхIдырбатI. Ауат аспектакль аналга напIасра ауырала зымгIвагьи йшыргвапхаз гIадырбатI. ЙгIахъвмарыз актерква хIцIасква рцIолара, кIавкIаз уагIахъа ргвы абагъьара гIахъыртIырныс рылшатI, – лхIвитI атеатр аунашвачпагIв Куршева Марина. Атеатр анхагIвчва ръачIвагIа азъазарата йазрыму гIалыркIгIауата РФ а-Федерация а-Совет акомитет а-ЧIахIра грамота, РФ асенатор Къазанокъва Кърым йразыра сальамшвъа, «Театр Луны» «Москва театр аунашвачпагIв Митченков Олег йразыра сальамшвъа гIарквнадыргатI. Москва апны хIтеатр анхагIвчва йшгIарпылызла, ауат йшдрайгвазла йразыта йгIайхтI. Ауи зымгIвагьи ргвышхвагата йырзалтI. – УахьчIвала Абаза драма театр апны нхара щарда акIвыршара атахъыпI. ХIтеатр актерква зымгIва ръачIвагIа йазъазапI, рныбыжьлагьи йгьапшым, ахIбачвагьи айцIбачвагьи хIымапI. Ауи швабыжта хIайгвыргъьитI. Ужвы «Асас» спектакль акытква рпны йгIахIырбарныс хIгвыгъапI. Асквш ауацIа датша къральква рпны хIгIа х ъвмарырнысгьи хIхачIвква йрылапI. СынчIва Абаза къральыгIва театр сквшы 20 ахъыцIуаштI. Ауи артлапIарагьи тшазхIрыхIазыруаштI. ЙчпачIву щардапI. АхIбачва йхIызгIаныржьыз хIтынхаква гIахIхчауа, ауат тшауацIдхIрыхуа, хIкультура зымгIвагьи йдхIырбарныс хIмурадпI. ХIынхара апны швапха байа зырхIаз, швапха гIазхъыхIхуа хIахIбачва пшдзаквагьи цхърагIари кьангьашри гIахIдрадзитI. ХIабаркIызтын, хIылшараквагьи щардазлуштI, – йылрыбагъьитI Куршева Марина. Абаза уагIахъа ркультура тшауацIнарыхра уыс хъадата зпахь йзыргылуа, зуыс йазъазу Абаза къральыгIва театр анхагIвчва рмурад пшдзаква шгIардахIвуаш зымгIвагьи йазхъахIцIитI.