АУАГIА ЦIАСКВА РЫЩАЙДЗА ЪАГIАДЖВЫКВЫЛУА

«Алашара» абаза-абхаз уагІахъа ртшауацІыхра йацкІрала адуней адкІылара а-Президент ЭГЬЗАКЬ Мусса йцхърагІарала хІуагІахъа турых йапщылу ужвыгьи книга шІыцкІ гIацIцIтI. «Святая Суть Абазара – философия жизни абазин» зхьзу акнига зкъальам йгІацІцІыз КЧР ауагІа руысагІв ЩЫБЗЫХВА Лариса Къвырманби йпхІа лакІвпІ. Щарда цІитІ Лариса «Абазара» ажва хІуагІахъа руацІала йбыжьгарныс, ауи йгІацІанакІуа ауагІа йрылалгарныс мурадта йылкІищтара. Ауи ахъазла рхъвыхра нхара ду акІвлыршатІ, наука-художества квпшыра алтуата абазаква ръадаб, ргвбайара, раъаща зрыбагъьауа гІвыра гІанлыршатІ. Акнига апхъажва азызгІвыз академик, афилология наукаква рдоктор, КЧР агІвгІвчва р-Союз йапредседательыз Бекьыз Лейла араса йгІалылкІгІатІ: «Книга «Святая Суть Абаза» – это серьезное лингво-философское исследование такого плана и уровня, в котором мы увидели поэта-новатора Ларису Шебзухову в качестве серьезного ученого… Перед нами абазинский философ нового поколения! Абазины проложили очень достойный путь в истории. Очень достойно живут они и в настоящее время в КарачаевоЧеркесии и многих странах мира, и отношение к ним складывается благодаря тем качествам, которые формируют их духовную суть – Абазара. Настоящая книга – ценный вклад Ларисы Шебзуховой в отечественную культурологию, она послужит стимулом для возрождения абазинского народа…». «Абазаква ракІвмызтын адуней ауацІала сквш 7-н зыкь рыурала зыхьыз зымпсахыз датша уагІахъакІгьи гьаъам. ХІуагІахъа абаза-хІва йанрыхьыззара, ргвбайари ралащи гІахъызтІуа агвынгІвырагьи йара ауаса йбыжьгара атахъыпІ – Абазара», – йгІалылкІгІитІ автор лкнига апны. Щыбзыхва Лариса лкнига йалалыз агІвыраква йрыуапІ наука щата зылтыз «Слышать прошлое», «Абаза мы! Абазины!», «К вопросу об абазо-адыгских отношениях», «Абазара – ядро духо в н о -н р а в с т в е н н о й жизни абазин», «Особенности мировосприятия народа Абаза», «Мир родного языка» датшагьи. Акнига йаланакІтІ абазаква рцІас бзиква, рбзазаща афилософия гІахъызтІуа агІвыракви асураткви, автор здунейпшыщала йылзаргвану ауагІаква, абаза ажва йазынарху лхъвыцраква датшагьи апхьагІв йымаджьащахъвазлуш, йдырраква гІазыршІыцхуаш щарда. «Художественное осмысление национальной сути абазин» хъвы зладылгалыз ауысаква зымгІва абазаква хъвыцрата йрызлыму гІахъыртIитІ: «ЙхІымару абазара», «Абазашта», «Абаза нартква», «ЙуызшазтІ, суагІахъа!», «Люби язык, чтоб сердцем мог светить» ауасамцара. Лариса йауацІыхта дгІарыквчважвитІ Анчва лара йылзалихыз амгІва дыквызжьыз лаби лани. Абашта айсра Ду йгIалсыз, Совет Ар аофицер, алетчик-истребитель Бала Къвырманби Хвыц йпа йынцIра шабгаз Къвбина кыт асабиква история, география, астрономия йайрыпхьатI. Лариса йшылхIвахуала, дхвыцынгьи йлымаджьащахъваз аурышв йгьи агIвыма гIамдагIвчва йырпщылу атурыхква дрыхазыргIвазуз лаба йакIвпI аэтнография, хIуагIахъа ртурых дазыназырхаз. Урышв бызшвали литературали йарыпхьагIвыз Бала (Темыр) Дина Бильаль йпхIа дчеркесызтIхIва, лгIариква гIазлыцIыз абаза уагIахъа рыбызшва ацкIыс хвы зму шаъам гIаргвынгIвуа йылбжьатI. АршIыйагIв пхата дгIалгвалашвахитI рунагIва абаза бызшва гIвнызымщтуаз ланду Мамырагьи. Лариса акнига лаби лани йшырзыналырхауа йапхъахауа анапа йанылцIатI. Декабрь ацIыхъва а-Печать а-Тдзы апны йакIвшаз Щыбзыхва Лариса лкнига апрезентация апынгьи йшгIалылкIгIазла, абазарата йлылу ъагIаджвыквлыз дъагIадзынгылыз аунагIва апны акIвпI. – Сара щардала сазхъвыцуан: адгьаква – адыгьагIара рхIвитI, абхазква – апсыуара. Щта, хIара хIхъатачIвыра зрыбагъьауа ачIвыйа? Ауасамца «Абазара» ажва гIасаутI. Арахьарат ауагIахъаква йрыуата ауи хвду аквызцIаз аъапI, хIуагIахъа йрыуата йзымуа тшызчпазгьи рылапI. Сквшщарда сгвы йтата йынкъвызгаз схъвыцра абзазара йъасзалажьыз гвтынчра гIасыланацIитI, ауи ауагIагьи йрылазгара стахъыпI, – йгIалылкIгIатI Лариса апрезентация апны дгIачважвауата. Щыбзыхва Лариса лкнига хIуагIахъа ртурых йазкIкIрата йгьи надзара хIагIа шаму рхIвауата йгIачважватI апрезентация акIвзыршаз КЧР-ла гIатгара зму ажурналист ЧкIала Георгий, Черкесскла «Алашара» ахъвшара аунашвачпагIв Мыква Мурат, Лариса уахьчIвала Абаза къральыгIва драма театр апны йлыцынхауа Ныр Мурадин. Ари анйара йалаз зымгIва акнига согIата йрырттI. Ауи атираж экземпляр 1000 йнадзитI, акытква радминистрацияква, апхьартаква, абиблиотекаква йырзалырхуаштI, азыгIальаматра азызбауа йырнапIыцIадыршвуштI. Щыбзыхва Лариса лгвтара гIалдахIвырныс лылзыршата акнига гIацIщтра ахча азалызхыз Россияла йбергьльу ажвлара уыснкъвгагIв, амеценат, КЧР АуагIа Айззара (а-Парламент) апредседатель йзаместитель, абхаз-абаза уагIахъа рдуней конгресс ЙхIаракIу асовет апредседатель Эгьзакь Мусса ХIабальа йпа дшизыразу лхIватI