АШIЫПIА ПОЧТА АСКВШЫШВ

Афедеральна почта къвырльыкъвхарта КЧРла а-Унашвачпарта агIаджвыквцIарала уыс бзита йакIвдыршауа гьмачIым. Ансисквша амачвацIацIагIв йы-Мш адыргалитI, Россияла йакIвшауа амачвацIацIара амчыбыжь ауацIа абзазагIвчва йрынйитI, рыцIа йпудта агазеткви ажурналкви гIацIыргIвгIарныс лшара рыртитI. СынчIва ауат ауыс бзиква йгIарылалтI «Дерево добра» гвчIагIвра акциягьи. Ауи апкъ йтата апочта йнашылуа йа а-Унашвачпарта асайт гIазрысабапуа айсра аветеранква, атыл анхагIвчва, ажвчIвква йгьи асаби тыдзква рыхъазла агазеткви ажурналкви гIацIыргIвгIитI. Асквш 2020 агIан Къарча-Черкес ашта апны йапхъахауа апочта хъвшараква гIаншищтара сквшы 100 цIытI. Ари агIаншара атурых йгIалахара ахIатырла афедеральна почта къвырльыкъвхарта КЧР-ла а-Унашвачпарта агIаджвыквцIарала апочта асквшы 100 йазынарху конверт гIацIырщттI. Аконверт Черкесск йтагылу аквта почта ъаныргIалу атдзы асурат аншвалтI. Ари апочта хъвшара апны йакIвшаз анйара йалан афедеральна почта къвырльыкъвхарта КЧР-ла а-УнашвахъцIарта знапIыцIу ЛАЙПАНОВ Ахмат, ауи йзаместитель БЕСЛЕНЕЕВА Аида, Къарча-Черкес Республика АуагIа Айззара (а-Парламент) акомитет апредседатель ГАНШИН Алексей, ареспублика газетква рредакторква, агород абзазагIвчва. – Асквш 1920, декабрь а 17 ажвлара йгьи акъральыгIва уыснкъвгагIв Алиев Умар йакIвйыршаз ареволюция комитет алачIвара апны хIыштала почта связь агIахътIрала щаквыргылра нарахвтI. Ауи аюбилей атурых йшгIалагIжьуаш хIазхъвыцуата йазалху конверт гIацIдхIрыщттI, – йхIватI Лайпанов Ахмат. Ауи асасчва аюбилей йазалху аконвертква апочта мхIвыр аквырцIарныс йрайгватI йгьи аконвертква согIата йрылайшахтI. КЧР а-Парламент адепутатква рыхьызла апочта анхагIвчва драйхIвахIвтI Ганшин Алексей. Ауи хIкъральла коронавирус тшанауацIнахуа азаман агIан апочта анхагIвчва рхъвдаквцIараква рыцIагьи йшщардахаз гIаликIгIатI, нхарала адахIвракви згIвадари шырзитахъу йхIватI. Ацынхара ахъазла апочта йапщылу зымгIва йшырзыразу гIалыркIгIатI ареспублика газетква рредактор хъадаква. – Апочта анхагIвчви аредакциякви йацхIырхъйауа ауыс абзирала хIреспублика абзазагIвчва йапшым абызшваквала йгIацIцIуа агазетква радзитI, хIышта йыншауа ахабарква рдыритI, – лхIватI «Абазашта» газет аредактор хъада КЪВЫЛ Фардауыс. Ауи «Дерево добра» акция йацылкIуата газетта 36 мачвы ацIарцIара ахъазла Черкесск почтамт аъачIвагIагIв БЕССОНОВА Ольга ашвъакви ахчи лылттI. АгвчIагIвра акция йацыркIуата анйара йалаз щардагIвы асоциальна нхартаква рыхъазла агазетква гIацIыргIвгIатI.