АШIЫЦРАКВА ЙЫРЗЫЧIВЫРХЪАУА АЪАЧIВАГIАГIВ

Абазаква хIмачIгIвызтынгьи, зыхьыз пшдзата йырхIвауа, зъачIвагIала гIатгара змата йынхауа агIвычIвгIвысква хIщардапI. Ауат дрыуапI уахьчIва швзабасырдыруаш ЛАЧВЫШ Аслан Исльам йпа. АчкIвын ъадаб-намыс йыквта, ахIбачва хвы рыквцIара ззырхIвауа йдыруата дгIадзынгылтI. Ауи Черкесск дбзазазтынгьи йсабихъагьи, йчкIвынхъагьи Гвым кыт апны йакІвшатI. Аслан йани йаби апхын тшпсщара мызква рагIан ансисквша ауаъа дырщтиуан. АчкIвын ауат асквшква пхата йгIайгвалашвахитI. – ХIцIайта угIалагата ауатра шынкъвугуш, арахв ушахьпшуаш хIазырбжьатI. Сара схъа аладухитI ахIбачва срылата, ауат гIасылабжьауа съагIадзынгылыз. ЙгIалскIгIара стахъыпI акыт апны абзазара абызшва ардыррала йшгIасыхъваз. Йапхъахауата апхын мызква хIанырга абызшва дукI йыгьгIасгвнымгІвуазтI. Дади нани абаза бызшвала йгIахIачважвумца, хымызкIла хвитта хIзалачважвауа, йгIахIархIвуа зымгIва гIахIгвынгIвуа хIцатI. Сащи сари Черкесск апхьара хIангIайх ауи аъара ласыта абызшва ъахIхIырдырыз хIани хIаби швабыжта йджьарщатI, – йгIайгвалашвахитI ужвы Аслан. Аслан апхьара сквшква рагIан аспортгьи тшадикIылтI, абакIрала, боксла агIатгараква йыман. Асквш 2002 агIан аквтанай апхьарта дангIалга йъачIвагIала аспорт тшадикIылра ймурадын, ауаса йаба йкьангьашрала амедицина гIалихтI. АчкIвын йаба йажваква дрыздзыргIвытI. Йжвизхауа акласс дангIалга архъвыхраква дахIврала дырхъысын, Саратов къральыгIва медицина академия дыцIалтI. Ауи ари аъачIвагIа гIацІгарта апны дыррата йгIайыртуаз йымамачIта йхъа дадынхалуан, ауи ахъазла лшарата йауаз закIгьи гьагIвйымщтуазтI, азцIгIара кIара йымазтын сквшщарда йынхауа айъазагІвчва тшырзынайырхун. Асквш 2008 агIан Москва нхара дцатI. АшIыцраква йрызгIашыкъыз ачкIвын араъа абзазара зынла даланахIватI, дызланагаз агвып ласы дрангIалтI. Аслан йапхъахауата йчпаз аркъьара хІатла зынгьи йгьихъаштылхуам. – Йапхъахауата ауи апш ркъьара ъагIасызхъарцIаз гвышхвара гIасыланацIатI, ауаса джьауапкІрата йапщылугьи гІасгвынгІвуан. Сгвы срыбагъьан, ауыс садгылтI. ЙхIызгIаргыз ачкIвын йшIахъа ауи аъара хвырта щарда аманта, уапшырныс ушвун. Ага ауаса йаъазтынгьи, аркъьара дахIврала йакIвшатI. АчкIвын йшIахъа ауаса йцахуашта йгьхъайымцIузтI, ачымазагIвтара даныцIцIхуаз швабыжта дразхатІ, – йгIайгвалашвахитІ Аслан. Ауи йшихIвауала, нхарала йахъазымкIва дызлу агвыплагьи йгIайдахIвтI. Агвып йапшым ауагIахъаквала йалапI, ракъыль аквшвауата, ацацхърагIара рызбжьата йацынхитI. – ХІхъвшара ахъада хIгвып адикIылуата заджвипхьадза хІъачIвагIадырра, швапхата йхІырхIахьаз гватра азйымапI. ХIгвып апны азазаъащаква рыцIагьи йбзийызларныс ахIатырла хIунашвачпагIв атшпсщара мшква запыт хIадикIылитI, апсабара гІамдараква, йапшым аларпшраква хІаццалитI. Арат йрапшу анйараква анбжьагIвыгIара рыцIагьи йшдрыбагъьауа ажва гьалам, – йгIаликIгIитI айъазагIв шIа. Лачвыш Аслан стоматологияли ашІахъа хирургияли анаука-рхъвыхра квта институт (ЦНИИС) дынхауищтара быжьсквша цIитI. Ауи азаман ауацIа аъачIвагIагIв шIыцра щарда йдыртI, йапшым аркъьара къвышраква дрыщцатI, ачкІвын «Cmart Clinikc» уыжвгIанчIви медицина клиника апынгьи дахIврала дынхитI. – Ууыс уазъазазлара ахъазла ухъа уадынхалра, йанакІвызлакIгьи ашІыцраква уырзычIвырхъара атахъыпI, – йхIвитI аъачIвагIагIв шIа. Аслан асквш 2012 агІан ординатура апны апхьара дахIврала йакIвйыршатI. Ауаса ауи ауыла дгIашIасра гьигвыгъам. АчкIвын Швеция, Италия, Германия йакIвшауа анйараква, аконференцияква дцалитI. ЙшгIаликIгIауала, ауат сабапра ду рылапI. Лачвыш Аслан анхара заман щарда йыквнахуазтынгьи дгIазлыцIыз йуагIахъа, йцри шта зынгьи йгьихъаштылуам. Ауи лшаракІ шйауа, йсабихъа ъатайгаз Гвым кытла дгвжважвитІ, ауи бзиракI шазихуш дащтапІ. Араса йаща йгьи йыгIвзачва йыцта акыт уанталуа «Гвым-локт швгІайгва!»- хІва йызну ардырга гъвы гIадыршIыцхтI. Аслан датшагьи мурад пшдза щарда йгвы йтапI. ЙзыхIтахъпI ауи ауат зымгIва гIайдахIвырныс, абзазара йзалажьырныс.