АСКВШ ШIЫЦ АСОГIАКВА

 Къарча-Черкес а-Хъада ТЕМРЕЗОВ Рашид йгьи КЧР АуагІа Айззара (а-Парламент) а-Председатель, «Единая Россия» партия
ашІыпІа хъвшара аунашвачпагІв
ИВАНОВ Александр ргІаджвыквцІарала Асквш шІыц агвыргъьахъв
йадахІвуата зхъахІара мачІу тгІачвата 1000 афачІв пкъыгІваква
рзалырхтІ. «#МЫВМЕСТЕ» россия
мгІвайсра йаланакІуа «Единая
Россия» аволонтер штаб апхъагылагІвчва арайонква йгІархъыкІвшумца афачІвква атгІачваква йырнапІыцІадыршватІ.
 ЗызгІвадара лшараква ахъарысу йгьи аны-абадъа йгІанхаз сабита 170-гІв ргвтараква ашвъабгъьы йаныта Къарча-Черкес
а-Правительства Тдзы йдыргылыз
а-Ёлка йашІакІнырхІатІ. Ауат асабиква «Надежда» республика реабилитация Квта, Черкесск асаби
Тдзы, МосковскІа поселок йаъу
«Забота» республика саби Тдзыинтернат йаныргІалу йрыуапІ. Асабиква рахІвараква дырхъйатІ КЧР
а-Правительства анхагІвчва, адепутатква, арайонкви агородкви
рхъадаква.
ХІреспублика аунашвачпагІв ТЕМРЕЗОВ Рашид хгІвысабичва рахІвараква хъвдаквцIарата йнайахвын, декабрь а 28 агIан ауат
дрынйатІ. Ауи йсогІаквала йыргвыргъьатІ Черкесск йауу Милена,
ЭркенхІалкъ йгІатыцІыз Сафия
йгьи Преградна станица абзазагІвчва СаловргІа. Айщчва чкІвынква САЛОВРГIА Георгий, Тимофей, Михаил йгьи Семен Преградна станица асаби азъазара апхьарта йцитІ. Ауат бзи йырбауа аккордеон йгІатырщтуа амакъымква
хІреспублика а-Хъада даздрыдзыргІвра ртахъын.
– Ауат ачкІвынчва съарабадырыз йгьи сыздрыдзыргІвыз амакъымква гвщтІыхра гІасыларцІатІ.
Швабыжта йщаквкІу, бжьаща
пшдза зму, анхара йачІву йгьи
джьауапкІра злу чкІвынчвапІ ауат.
ЙалкІгІата ран, раба, рахща хвыц
гвапата йшырзаъу сгвапхатІ, –
йгІаликІгІатІ Темрезов Рашид.
ТгІачва ду йгІарылцІыз КАРАСОВА Сафия лгвтарагьи гІалдахІвтІ.
Ауи агІсквшапІ дызту, ауаса КЧР
йгьи СКФО руацІала шахматла анкъвакъвраква рпны йызнымкІва
дапхъагылагІвхатІ. АпхІвыспачкІвын
хІреспублика а-Хъада шахмат дйыцасырныс щарда цІуата йылтахъын, ауи ъалылшаз лгвы гІащтІнахтІ.
Быжьсквша йырту Милена Теберда заповедник йбзазауа абна
псауышвхІаква дырпшырныс дыргатІ. Азаповедник аунашвачпагІв
Динаев Алик Милена ландугьи
длыцта агІамдараква рзадигалтІ.
«Асквш 2020 апны асоциальна
тыдзква йаныргІалу, анчви абачви
рхъпшылрадъа йгІанхаз асабиква,
бзазара аъаща баргвы йташваз
атгІачваква зымгІва цхърагІара
дхІрадзарныс хІылхІыршатІ. Ауи
ахъазла йхІыцызкІыз авласть органква рунашвачпагІвчва, адепутатква, «Единая Россия политика
партия ашІыпІа хъвшара, абизнес
йалу, ажвлара адкІылараква, аволонтерква сразыра ажваква рзынасырхитІ. ЗымгІвагьи згІвадара,
бзирата йаъу рзыстахъпІ. Йхъаду –
хІсабиква насып рымазтI, бзибарала йкІвыршазтІ» – йгІвытІ й-Инстаграм напа апны Темрезов Рашид.
 Къарча-Черкес Алхра Комиссия
анхагІвчвагьи акция йацыркІтІ.
Ауат Черкесск город йтагылу Индустриальна-технология колледж
апны зызгІвадара лшараква ахъарысу апхьагІвчвата 45-гІвы афачІв
пкъыгІваква рзадыргалтІ.
Асквш шІыц асогІаква радзатІ
Къарча-Черкес аковид-госпитальква йынхауа амедицина ъачІвагІагІвчва рсабиквагьи. Йшалу
ахъагІаралыцІкви ашвыркви согІата йыззырчпаз 500-гІв йнадзитІ.
 РФ Ащтанкъвцара комитет
КЧР-ла аунашвахъцІарта анхагІвчва ареспублика коррекционна апхьарта-интернат йаъан. Ауаъа йапхьауа асаби 67-гІв йрыздрыхІазырыз Асквш шІыц асогІаква рзыргатІ. Заджвипхьадза згІвадара багъьа, апхьарала адахІвраква йгьи
асквш шIыц апны бзазара джьащахъва шырзыртахъу рархІвуата
ажва пхаква рзынадырхатІ, цхърагІара йазыбжахузтын, ауи шддрадзушла йдыргвыгъатІ.
 ХІабаз гипс завод аунашвачпагІвчвагьи «Мы вместе» россия
акцияла йакІвшаз «Новый год в
каждый дом» гвчІагІвра нхара йалалтI, Асквш шІыц агвыргъьахъв
йаквшвауата зызгІвадара лшараква ахъарысу сабита 50-гІв ахъагІара согІаквала йдыргвыргъьатІ.
 Россияла йакIвшаз «#Мы вместе» акция апкъ йтата «УнагIвипхьадза Асквш шIыц» гIаджвыквцIара магIын ду азырбатI
Уарп щхъа-рбайара комбинат аунашвачпагIвчвагьи.
Анхарта ахьызла зхъахIара
мачIу, саби зщарду йгьи йтынчым
атгIачваква йрыуу сабита 50-гIвы
раъара асогIаква рзырчпатI.
 Йара ауаса акция йацнакIтI
«Кавказцемент» акционер жвлара. Ауи анхагIвчва МосковскIа поселок йаныргIалу «Забота» Тдзыинтернат йбзазауа сабита 50-гIвы
райхIа рыхъазла асогIаква адыргалтI. Асабиква йрыртыз ахъвмаргаква, ахъагIараква швабыжта йрайгвыргъьатI.
 Акция йацызкIыз йрыуапI. Теберда къральыгIва псабара биосфера заповедникгьи. Ауи анхагIвчва абзазара баргвыраква
йрынйаз атгIачваква фачIвыла
йырцхърагIатI.
Къарча-Черкес апны «#МЫВМЕСТЕ» акция йацызкІыз ауагІаква,
акоммерция йалам аорганизацияква, Россия АуагІахъа фронт, «Единая Россия» партия, ахІаракьатчпагІвчва, авласть органква йгьи
йапшым акъральыгІва къвырльыкъвхартаква рынхагІвчва асабиква
Асквш шІыц асогІаквала йдыргвыргъьарныс тшадыркІылын, ауи
рчпарныс рылшатІ. «Новый год в
каждый дом» зхьзу акция РФ
а-Президент Путин Владимири
аволонтеркви декабрь а 5 агІан
йакІвшаз ранйара апны Иванова
область йауу Смирнов Владимир
йгІаджвыквцІарахатІ. АдгалагІвчва йшщаквдыргылыз апшта
Асквш шІыц асогІаква айъазагІвчва рсабиква, асаби тыдзкви аинтернаткви йбзазауа, ачымазагІвтараква йщтІу йгьи бзазара аъаща баргвы йташваз асабиква йддрадзатІ.
 Асквш 2021 гIаталуата, Россия
аштаква зымгIва рпынгьи апшта,
Къарча-Черкеслагьи «Асквш шIыцла, аветеран!» акция джвыквырцIатI.
ХIреспублика апны ветеранта
84-гIвы Къарча-Черкес Республика а-Хъада Темрезов Рашид, «Единая Россия» партия йалу, агород
округкви амуниципальна районкви радминистрацияква рхъадаква рыхьызла ахIвахIвраква радзатI.
АхIвахIвра сальамшвъаква афачIвквагьи рыцпI. Ари акция «Аветеранква райгвыгIвра» Россия проект апкъ йтата йакIвшатI.