Актуально Открылся Северо-Кавказский молодежный форум «Машук – 2021» Актуально 24 представителя Народного фронта получили руководящие посты в комитетах и комиссиях нового состава Госдумы РФ Актуально Баян - душа народа СКФО 9 из 10 дагестанских городов получили паспорта готовности к зиме СКФО Банки не хотят давать кредиты курортным муниципалитетам Кавминвод​

АТЕАТР ЛБЗАЗАРАХАТI

29.03.2019 201
АТЕАТР ЛБЗАЗАРАХАТI
Атеатр йгIахъвмарквауа актерква щымта рынхарта йцата хъвлапны рунагIва йгIадгылхитIхIва ауыла рынхара мшы гьалгум. Ауат уахъгьи тшынгьи йынхитI ухIварыгьи йгьымцхушым, йашIамсуата ргьагьара йаъу рщагащаква дырхъвыхитI, турасыкI заджвы йшгIайылырхуаш, абзазара йазаргванта йшгIахъвмаруаш йазхъвыцитI, рпны уыскI анырхауагьи зтурасыла йгIахъвмаруаш йажваква ддырдыритI. Апшырта зал учIвата аргылчIвква уанырпшуа майрата йгIардахIвуазшва йубитI, ауаса актерква дасу йажва йхIвара ахъазла йгIапсарата йаду гIазгвынгIвуа заджвмаджвпI. УахьчIва сгIазквчважвара стахъу Абаза къральыгIва театр актерта сквшпхьадзара йынхауа АлбыргIан кыт абзазагIв ШАРМАТ Луиза Хангьари йпхIа лакIвпI. Луиза асквш 1984, август а 27 адуней дгIаквылтI, лчкIвынхъа зпсабара пшдзу ЙынджьыгьчкIвын кыт йталгатI. Апхьарта асквш 2000 дгIалгатI. Луиза лапхъахьыла йылъачIвагIахушыз ласы йыгьлызгIалымхтI, лани лаби лара йъалтахъыз апхьара дауырщтра гьрымуазтI. – Актер ъачIвагIа саквзыргвышхваз хIыгвла КIарма Амин рыцхIа йакIвпI, – йгIалгвалашвахитI Шармат Луиза. – Абаза театр агIаныршара апхъала актерта Нальчик хIадрыпхьарныс хIадыркIылуан. Архъвыхраква бзита йскIыта снарахвырквын хвыдъа сшадрыпхьушыз ахабар Амин йангIасайхIв, саргьи сайхIвапсан садгылтI. ХIпынгьи хIкыт йауата чкIвынчваквакIгьи агвып йшалаз анырдыр ауи апшта йыгьсхъымгвыргIвахтI. Архъвыхраква зымгIва бзита йскIытI, сынасып йгIанакIын снарахвтI. ЛагъьКIавкIаз къральыгIва акультури азъазари ринститут пщысквша сапхьан, асквш 2006 сгIалгатI. Йара ауи асквш сынхара джвыквсцIан, ауищтарагьи Абаза къральыгIва театр сынхитI. Жвахсквша асцена угIахъвмарырныс гьмачIым. Луиза лынхара хвы злаквылцIауа апшыгIвчва рыгвнадзарала акIвпI. ЙгIалпшуа ауагIа ргвы хацкIла дзадсылызтын йа гвыргъьаракI рылалцIазтын, лмурад гIалдахIвта, бзита дгIахъвмарта йылпхьадзитI. Абаза театр дынхауищтара Луиза багата, кIважвата, лачкIвынта, лыгта датшагьи турас щардала дгIахъвмархьатI. «ХъацIа турасыла сангIахъвмаргьи аъапI», – дхъыччауа йгIалгвалашвахитI Шармат Луиза. Ауат асквшква руацIа аргылчIв пхатшаквагьи апьеса чкIвынквагьи щарда дрылан. – Асквш 2006 агIан Абаза театр саналагагIвацаз кIьанджь театргьи хIыман. Ауаъа «Колобок», «Квася и квампания», «Теремок», «Рукавички» локIква рыщатала ргылчIв щарда урышв бызшвалагьи хIыбызшвалагьи йхIыргылуан. Акъарча, ачеркес кытква рпны урышв бызшвала хIгIахъвмаруан, абаза кытква хIыбызшвала йдхIырбун. Асабиква йрымаджьащахъвадзата йапшуан. Апхынла Теберда алагерьква хIцун. ЙъакIвызлакIгьи пхата йгIахIпылуан, йразыта хIгIардасхуан. РыцIа йпхатшата йхIыргылтI Жан Батист Мольер йпьесаква «Смешные жеманницы», «Лекарь поневоле», Дагвжвей МухIадин – «Джьынарыпхьара», урышв бызшвала – «За двумя зайцами». Щыбзыхва Лариса йанлыргIалхыз аспектакль апоэмала «Гващагъагъ»апны фыр хъадата сгIахъвмартI. ГIвысквшипхьадза Майкъвап апны «Кавказский меловой круг» зхьзу фестиваль акIвшалитI. Ауаъа йгIадгылитI Ставрополь, Къабард-Балкъар, Осетия, Апсны, КъарчаЧеркес, йара Адыгея ртеатрква. Москва йгIатыцIлауа акомиссия атеатрква ргIахъвмарща дырхъвыхитI. Асквш 2011 агIан «Гващагъагъ» гIахIырбатI. Акомиссия хIынхара швабыжта йыргвапхатI, актер шIаква бзита хIъазыгIахъвмарыз джьарщатI. СынчIва апрель агIан ауаъа йгIахIырбарныс КIьыщмахва Умар йанйыргIалхыз «Ашвуа паштыхIыгIва» спектакль адыгIгалитI, – лхIвитI Шармат Луиза. Асквш ауацIа йдыргылуа ракIвымкIвагьи ансисквша Абаза театр анхагIвчва апхьартаква рыхъазла Асквш шIыц йазынархата Ахьта Дади АсхьырчIвачIви злу апычIв классква рапхьагIвчва рыхъазла агвыргъьахъвква урышв бызшвалагьи абаза бызшвалагьи йадыргалитI. Ауат рпынгьи Луиза йапшым атурасквала бзидздзата дгIахъвмаритI, луыс джьауапкIра лымата дадгылитI. Луиза Хангьари йпхIа лынхара хвы аквырцIауата арыпхьарали культурали Абаза район аунашвахъцIартагьи, Къарча Черкес культурала а-Министерствагьи ртшхъвага щарда гIалквнадыргатI. Ансисквша Россия а-Президент Путин Владимир гватра ззалхра атахъу нархаракI гIалихитI. СынчIва ауи Россия ауацIала атеатр йаСквшта йщаквйыргылтI. Луиза адахIвраква лщардата ари асквш лщтийырныс, ачIахIра грамотаква йрыцта ачIахIра хьызквагьи гIалквнадыргарныс хIлайхIвахIвитI. 
201 просмотров


Комментарии

Написать
Комментарии >
Умар Текеев, начальник службы радиовещания ГТРК Карачаево-Черкесия, заместитель председателя регионального отделения общественной организации "Союз журналистов России"
Карамурзин Рамазан Леонович председатель Ассоциациии крестьянско-фермерских хозяйств Карачаевского района, Глава КФХ



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный