Къэрал нагъыщэ ин

НАКЪЫГЪЭМ (майм) и 23-м Урысей Федерацэм и Президент Путин Владимир Кремлым деж къэрал нагъыщэ лъагэхэр яхуигъэфэщащ Урысейм и цIыху цIэрыIуэхэм. Къэрал нагъыщэ инкIэ: орденкIэ, медалкIэ, щIыхьыцIэ лъагэхэмкIэ къыхагъэща цIыху 30-м яхэхуащ летчик-космонавтхэр, щIэныгъэм, егъэджэныгъэм, узыншагъэр хъумэным я лэжьакIуэхэр, спортым пыщIахэр, артист цIэрыIуэхэр, промышленностымрэ мэкъумэш хъызмэтымрэ епха гуащIэрылажьэхэр. Мы махуэм зи щIыхьыр къыхагъэщахэм ящыщщ адыгэ лъэпкъым и къуэ щыпкъэ, и цIыху щэджащэ, Москва дэт Финанс университетым и ректор Есчындар Мухьэдин Абдурэхьмэн и къуэр. Путин Владимир и унафэкIэ, ди лъэпкъэгъум къыхуагъэфэщащ е 3-нэ нагъыщэ зиIэ «За заслуги перед Отечеством» Орденыр. Шэчыншэу, Есындар Мухьэдин апхуэдэ пщIэ лъагэр къилъэщащ и гуащIэдэкI лэжьыгъэ купщIафIэм, абыкIэ къызэщIиубыдэ къэухь иным, ищхьэ егъэджэныгъэм и къэрал системэр егъэфIэкIуэным, Урысейм и экономикэм зегъэужьыным хэлъхьэныгъэ хуэзыщIыну IэщIагъэлI нэхъусахэр гъэхьэзырыным хуигъэтIылъ гуащIэм и щIыхькIэ. Ди лъэпкъыр зэрыгушхуэ цIыху щэджащэм къыхуагъэфэща щIыхь лъапIэр хуэмахуэну, узыншэу и гуащIэр къэралым и зыужьыныгъэм хуигъэтIылъыну дохъуэхъу