ДЫРРА ЗМУ ДГЬЫДЗУАШЫМ

«Сара сэкономистхуштI, сюристхуштI, синженерхуштI, сайъазагIвхуштI»-хІва щардала асабиква йырхIвауата йугIалитI. ДзачIвызлакIгьи гвтаракI йымапI. АгIвычIвгIвыс ймурад йырхъйарныс дащтата рыцIа йгвы зквкIу аъачIвагIа гIалихитI. ЛъачIвагIа тамамта йгIалылхта йылпхьадзитI Лагъь-КIавкIаз къральыгIва академия апны инженер-программистта йапхьауа БРАНТОВА Бэлла Бислан йпхIа. Ауи йшылхІвауала, йыгьзакIым ъачІвагІа зигIвата гвыла йылпсахыз, апхъапхъа дайъазагIвхарныс, уацІыхъван дарыпхьагIвхарныс, аполиция данхагIвхарныс лтахъын. Ауаса динженер-программистхушта йщаквлыргылтI. Бэлла Псыжв дгІатыцІуамца Черкесск йаныргIалу й-11-хауа апхьарта дгІайуан. Ауи апхьара сахIатква зымгIвалагьи адахIвраква дырзынадзун. Дызлалуаз йапшым анкъвакъвраква рпны лдырра шцIолу гIалырбун. Й-11-хауа акласс дангIалга Лагъь-КIавкIаз къральыгIва академия «программная инженерия» хъвшара дыцIалтI. Апхьарта апны информатикала хIазрыпхьуз, апхьара сахIатква рагIан здырраква хIыцагIвызшуз Галина Алексей йпхIа лакIвпI ауи апредмет бзи йысзырбаз, – лхIвитI апхIвыспа. – Аинженер-программист компьютер ъану анхартаква дынхарныс йылшитI. Бэлла академия, ареспублика йырхъазымкIва, Россияла йакIвшауа анкъвакъвраквагьи дрылалитI, лдырраква гIалырбитI. Анаука конференцияква рыхъазла гIвыра щарда лрыхIазыритI. Астудент йапшым айззараква радгалагIвчва цхърагIара дылрадзитI. Ауи заманкI акультура йазынарху асекторгьи дапредседательын, астудент совет апредседатель дизаместительын, акурортквала йгьи чкIвыныргIа рполитикала КЧР а-Министерства аволонтерква дрылан. Ужвы Бэлла «Алашара» жвлара адкIылара рволонтер гвып дапщылапI. УъачIвагIала дырра бзи уаура ахъазла ансимшы арыпхьагIвчва шIыцракI гIаршIукIгIара атахъыпI. Ауат уыззырбжьауа, йуыцагIвыршауа адырраква ракIвпI уадыргIвана анхара апны йгIаурысабапхуа. – ХIара асайтква рлыхра, йапшым апрограммаквала анхара, акомпьютери апроцессори ралаща, датшагьи щарда хIырзырбжьитI. АъачIвагIа джьащахъвадзапI, сара здырраква хIаракIу арыпхьагIвчва садрыпхьарныс гIасдахIвтI, – лхIвитI Бэлла ларыпхьагIвчва дырзыразта. АпхIвыспа дызцапхьауа агвып 25-гIв йнадзитI, ауат зымгIвагьи абагвынгIвыри ацацхърагIари рызбжьата йапхьитI. Бэлла лъачIвагIа ангIалылх, лтгIачва йлыцыркIтI. Лан Брантова (МалхІваз) Жанна йгьи лаба Бислан рсабиква рхІаль пшдзата, абзазара апны магІын ду зму ацІасква рдыруата йгІадзынгылырныс ацІыхъва йштагылу лхІвитІ. АпхIвыспа бзидздзата дапхьитI, лгIатгараквала лани лаби лыргвыргъьитI. Дырра хIаракIы лымата академия дангIалгара лъачIвагIала нхара шлауаш кьангьаш гьазлымам.