ЙЫРЗАЦАПШУ АБАРГВЫРАКВА ГЬМАЧIЫМ

Къарча-Черкес апны ащхархIагIвчва р-Ассоциация асквш 1994 агIан йгIандыршатI, йагIвсыз асквш агIан ауи гIадыршIыцхтI, аунашвахъцIара орган быжьгIвы йрызхъарцIатI. УахьчIвала Ассоциация хIреспублика ащхархIагIвчва йрыуата 140-гIв алапI. – АщхархIагIвчва уахьчIва йызшIашвауа абаргвыраква гьмачIым, – йхIватI Къарча-Черкес ащхархIагIвчва р-Ассоциация аунашвачпара йалу УЗДЕНОВ Али. – Ауат йрыуапI ареспублика апны ащхархIарала ветеринар ъачIвагIагIвкIгьи дъахIымам, йахъшахъыцIуаш ащхаква ъахIзымхъауа. АпшцIыщтралагьи хIгIапситI, йцкьам ацхагьи ймачIымкIва хIашIашвитI.Йара ауаса ащхаква чмазагIвхарыквын, рызгIва ъащаквхIыргылуаш лаборатория гьхIымам, ауи ахъазла Краснодар йгьи Ставрополь крайква тшырзынахIырхитI. Совет заман агIан архъйара власть орган йаланакIуата ащхархIарала хъвшара нхун, уахьчIва акыт млыкврхIарала ареспублика Министерства апны ауи анархарала ъачIвагIагIвкIгьи дгьаъам. Узденов Али дызквгIашIасыз абаргвыраква, ауат гIанымшахра ахъазла авласть органква йшрыцынхуш йазынархаз семинар «Мой бизнес» квта апны йакIвшатI . Ауи йалан ветеринарияла КЧР а-Унашвачпарта знапIыцIу Лисовиченко Виталий, хIреспублика аветеринар лаборатория аунашвачпагIв Узденов Альберт, Чачан йгьи Ингвыщ республикаква рщхархIагIвчва р-Ассоциацияква ргIащтийыгIвчва, Белоруссия апны Белсад щхархIара институт алаборатория адиректор Рахматулин Дмитрий, Китай апны ахъвшвква гIацIызщтуа акъральыгIва корпорация агIащтийыгIв Чжан Яньдэ, хIреспублика ащхархIагIвчва. Къарча-Черкес апны ащхархIагIвчва руыс тазщахIауа аквымшвараква арахьарат аштаква рпынгьи йаъапI. Ауат дрыквгIашIастI Чачан Республика ащхархIагIвчва р-Ассоциация аунашвачпагIв йзаместитель, сквш 30 айхIа цIуата ацха йадынхалуа Базаев Леча. – ХI-Ассоциация 500-гIв алапI, – йхIватI ауи. – ХIреспублика апны ащха йазарархауа йрыуапI агIайыраква хъвшвы анрыквырчвуш хабар ъагIахIдымрадзауа. Ари ауыс ащхархIагIвчви адгьыл йадынхалуи анымгIалуата йырчпа гьауашым. Ага йгвасразтынгьи, уахьчIвала йцкьам цха зтиуа хабзала джьауап йуыркIырныс лшара гьаъам. ХIреспублика апны ацха ацкьара, агьама зырхъвыхуа быжьгIвы хIымапI, ауат рбзирала йпшцIырщтуа ацха апны йцкьам мачIхатI. АуагIа ацха аъазагIварала йырдыруа рыцIа йщардахапхьадзагьи, йырхвгIарныс ртахъыпI. Ауаса ауагIа йцкьу ацха аъаща рдырра ахIатырла хIрыдынхалра атахъыпI. ХI-Ассоциация ащха згIваквагьи йрабакIитI. Ауи ахъазла хIахчала Краснодар апны лаборант дахIрыпхьатI. Китай йгIатыцIыз Чжан Яньдэ асеминар йалаз ащхархIарала анархара шIыцква йрыхайыргIвазатI. – Ага йгвасразтынгьи, швыштаква рпны йахъазымкIва адуней шабгула ащха квпшыраква йрылдзгIитI, ахимия пкъыгIваквала йанрыдынхалра амщтахь йпситI, ашIашIкIгIара згIваква гIарахвитI, – йхIватI ауи. – Аэкология пхаста гIашIахIкIра ахIатырла тшадхIкIылра атахъыпI. Асеминар йгIадгылыз ащхархIарала ахабза йаларцIаз апсахраква, хIреспублика апны хъатачIв лаборатория гIаныршара,ауаъа йынхуш йгьи ащхархIагIвчва рарыпхьара, датшагьи ргвы ззыбжу ауысква йрыквчважватI. Узденов Али йшихIвазла, сынчIва ащхархIагIвчва рыхIазыррала акурсква гIахъыртIуаштI, ауи ауысла арыпхьарали наукали КЧР а-Министерства апны лицензия гIарырттI. ГIвымызкIи бжакIила акурсква йырхъысырквын, ащхамартанква дыргылырныс йырцхърагIуштI, сквшыкI йырхъпшылуамцара анхара йахадыргIвазуштI. Ажва аламкIва, ащхархIагIвчва райззара йалаз дзачIвызлакIгьи сабапракI гIаликIгIатI. – Белоруссия апны Белсад щхархIара институт алаборатория адиректор Рахматулин Дмитрий, Китай йгIатыцIыз Чжан Яньдэ хIрабадыртI, ауат йхIыхъвуш щарда гIахIархIвтI, – йгIаликIгIатI Рязань область, Рыбное город апны зоотехникщхархIара институт йгIалгаз, сквшщарда цIуата ащхархIара йапщылу Меремкъвыль Джьумальадин. – СгвгIанаграла ащхархIагIвчва р-Ассоциация йалшуш гьмачIым.