АЦХЪРАГIАРАКВА ЙРЫЛАХIИТI

«Единая Россия» партия а-УагIахъа программа анархараква йрыуапI йхIаракIу апхьартаква, аъачIвагIа гIацIгартаква рпны зуыс йазъазу аъачIвагIагIвчва йнахъауата йадкIылра, арыпхьара нхартаква рымлыкв щата рыбагъьара, анхартатыгIвчва ззыбжу асоциальна ъачIвагIаквала арыпхьара нхараква агъьчIвра датшагьи. Арат ахачIвква хIреспубликала абзазара йшаларжьуа йъалачважваз «Единая Россия» партия КЧР-ла ахъвшара ашIыпIа Исполком алачIвара йалан наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель ГАНШИН Алексей, КЧР АуагIа Айззара (а-Парламент) адепутат КЪАРДАН ФатIима, арыпхьарали наукали КЧР аминистр лзаместитель БЕКИЖЕВА ФатIима, арыпхьагIвчва ръачIвагIадырра йалархIарала КЧР аинститут адиректор ГУРИН Александр, Къарча-Черкес къральыгIва университет аректор УЗДЕНОВ Таусолтан, «Апхьарта шIыц» «Единая Россия» апроект КЧР-ла акоординатор, КЧР АуагIа Айззара (а-Парламент) адепутат ЧЕРНЯЕВА Татьяна, Черкесск йтагылу аъачIвагIа гIацIгартаква, астудент адкIылараква ргIащтийыгIвчва. АлачIвара апны Черняева Татьяна йшгIалылкIгIазла, йагIвсыз асквш апрель агIан Россия а-Президент Путин Владимир РФ а-Федерация а-Совет йазцауа йтшазынархара апны чкIвыныргIа арыпхьара ъачIвагIаква йырзырбжьауата абюджет тыпква йрыладырхIарныс хачIвы йыргылтI. – ХI-Президент Путин Владимир арыпхьагIвчва шIаква ъадрыхIазыруа йхIаракIу апхьартаква капитальна рчIаджьра драдзара, йатахъу апхьагала йадыргалра ахъазла ужвыгьи сом жвамиллиардкI шгIауырщтуаш йхIватI. «Апхьарта шIыц» проект апкъ йтата апхъахьыла агIвысквша руацIа йхIаракIу апхьартаква раъаща агъьырчIвра, абюджет тыпква гIандыршара атахъыпI, – йгIалылкIгIатI Черняева Татьяна. ЙхIаракIу акъральыгIва апхьартаква арыпхьагIвчва, айъазагIвчва, атранспорт йгьи акультура нхартаква рыхъазла аъачIвагIагIвчва дрыхIазыруата йлырхуа апроектква абзазара йызлаларжьуаш агрантква гIадрысабапырныс йахвитпI. «Единая Россия» партия агIаджвыквцIарала йлырхыз астудент ацгIвнабзазартаква капитальна рчIаджьра драдзарала апроект апкъ йтата асквшква 2022– 2024 руацIа афедеральна бюджет сом цмиллиардкI гIаунащтуаштI. Узденов Таусолтан йшихIвазла, унашва зхъицIауа ауниверситет ацгIвнабзазарта йгьи астудентква ъадрыпхьауа объекткI капитальна рчIаджьра ддрадзарныс апрограмма йаларцIатI. Аректор ари ауысла апроектква анлырхуа йзынйауа абаргвыраквагьи гIаликIгIатI. – ЙхIаракIу акъральыгIва арыпхьара нхартаква йырзынарху апрограммаква гIахIрысабапра ахъазла апроектсмета швъаква хIрыхIазырра атахъыпI. Ауат йрыквыдзуа ахча ауниверситет абюджет апны йыгьгIарбам, ари ауысла йгIахIцхърагIуш хIизыпшгIара атахъхитI, – йхIватI Узденов Таусолтан. Афедеральна квта апны ауниверситетква йгIадырбауа апроектква анлырхуа ашвъаква рагвныргIвра йаквыдзуа азбжа гIарыртырквын, ауысква рыцIа йласхуштI. Айззара йалаз Узденов Таусолтан йгIаликIгIаз абаргвыра афедеральна квта апны йгIархIварныс ажванахъа гIаргтI. АлачIвара йалаз йшырхIвазла, апхьартаква йгьи ауниверситетква рпны арыпхьагIвчва гьнахъум, уахьчIва анхартатыгIвчва ззыбжу асоциальна ъачIвагIаква тшырзызбжьауа мачIпI. Ауат ари анархарала ауысква агъьызчIвуаш амальква гIа дрысабапырнысла йагвынгIвытI.