АЗАМАН ЙГIАХЬЫМШВАУА ЙЫНХИТI

Асаби йара йацкIыс йтшдыру хуыскI дырзибжьарныс йылшуштI: швхIаусыгIвадъа дхъыччарныс, йзаман злайгуш гIайауырныс йгьи йтахъы- ра  багъьата  дазгылырныс.    Пауло   Коэльо.
Красна  Восток  кыт  йтагылу  Кълыч  Рауф  йыхьыз  нкъвызгауа  аквтанай  апхьарта  йаныргIалу  «Одуванчик»  сабигIзарта  санца  цIапха  амата  йгIацIцIтI.  СгIазбата  йгIайыз  алыргагIвы  Аджьбакь  Асйа  агвашв  лтIыта  сангварал,  зынла  йцкьаз  апшцIа,  ахъвмарыртаква  сыла  йгIацIашватI.  АлахIвара  пшдза  салата  асабигIзарта  снашылын,  абльынква  йыркIыдыз  анапIлачпараква  сгвыргъьара  йаздырхIауа  асабигIзарта  аунашвачпагIв  Чква  Ирина  лкабинет  снашылтI.
АСАБИГIЗАРТА      АТУРЫХ Архив  швъаква  йшгIархIвауала,  Красна  Восток  кыт  алагъьла  йапхъахауата  асабигIзарта  асквш  1954  агIан  йгIахъыртIытI,  йзыгIвназ  тдзыжвкI  акIвын.  УацIыхъван  йара  ауи  апшцIа  йтагылаз  апычIв  апхьартата  апны  йагвындыргIвытI.Йапхъахуз  асабигIзарта  унашва  ахъылцIун  Маилова  (Къамби)  Хани  Идрис  йпхIа,  уацIыхъван  Хачирова  Софйа  Уасман  йпхIа.  СквшквакI  анахъыцI  алагъьла  гIвбата  йаквгылата  сабигIзарта  ду  руыхватI.  Ауаъа  унашвачпагIвта  дынхатI  Макъвауа  Таисия  Самсон  йпхIа.  Асабиква  зымгIва  гIвнашвун,  «Красновосточна»  совхоз  алапш  йацIата,  ахвыцква  йыртахъу  нахъауа  йгIадзынгылуан.   «Красновосточна»  совхоз  аналпIла  асабигIзартагьи  хъыргIвахтI.  Сквшщарда  акыт  апны  сабигIзарта  гьнымхахтI.  Анчви  абачви  баргвырата  йызшIашвауа  гIарпхьадзауата  асквш  2008  декабрь  агIан  Кълыч  Рауф  йыхьыз  нкъвызгауа  акыт  аквтанай  апхьарта  йапхъахауа  аэтаж  апны  ахвыцква  рыхъазла  «Одуванчик»  сабигIзарта  гIахъыртIытI.  АсабигIзарта  жвасквша  унашва  ахъылцIатI  Шармат  (Аджьбакь)  Людмила  Тама  йпхIа.  Ауи  йагIамкIва  адуней  анылхIваджь,  лтара  ддыргылтI   ЧКВА  (Джьмакъвыл)  Ирина  Къральби    йпхIа.  
АУНАШВАЧПАГIВ      ЛЧIВЫРХЪАКВА Чква  Ирина  Къральби  йпхIа  Красна  Восток  кыт  дйытI,  араъа  дгIадзынгылтI.  Адырра  йаздзышуата  апхьарта  йыцIалыз  йапхъахауа  ларыпхьагIв  Чагва  Тамара  ХIасамби  йпхIа  лбзирала  дзыгIвуа,  дзапхьауа  тшылбжьара  йахъазымкIва,  дгIакIвзыршауа  апсабара  апшдзарагьи  лылалхIварныс  лылшатI.  АпычIв  классква  рымщтахьла  атгIачва  заманкIла  акыт  йтнагатI.  ЙангIахъынхIвых,  акыт  аквтанай  апхьарта  апны  йагIбахауа  –  йжвабахауа    аклассква    дапхьахтI. –  Скласс  унашвачпагIв,  урышв  бызшвали  литературали  сарыпхьагIв  ГIап  Рафаиль  Данил  йпа  йбзирала  агIвгIвчва,  ауысагIвчва  бергьыльква  ргIвыраква  сдунейпшыща  швабыжта  йауацIырхтI,  –  лхIвитI  Ирина  лапхьара  сквшква  гIалгвалашвахуата.  –  ХъартшхъваракIгьи  аламкIва  йсхIвапIта,  апхьарта  апны  садгалагIв бзита  сырпхьадзун.  АхIвсса  йырхъазымкIва,  ачкIвынчвагьи  «рцIапха»  гIасауан,  бзита  йапхьара  йахъазымкIва,  йапшым  ауысква  рырхъйара  апынгьи  гвышхвара  рыласцIун.  Йжвабахауа  акласс  саныцIаз  арыпхьагIвкI  дчмазагIвхазарквын  йа  уыскIла  дахънагазарквын,  апхьара  сахIатква  акIвсыршун. Ага  арыпхьагIв  ъачIвагIа  рыцIа  дхънахуазтынгьи,  Ирина акыт  аквтанай  апхьарта  дангIалга  Пятигорск  йтагылу  атехникум  товароведта  ъачIвагIа  дапхьарныс  дыцIалтI.  Ауи атехникум  диплом  къапщыла  дгIалган,  Кисловодск  апны  лынхара  джвыквылцIатI.  –  Тшпсщара  мшыта  сани  саби  рпны  сангIай,  акыт  аквтанай  апхьарта  йадиректорыз  Шармат  Кьащиф  
ПIатIа  йпа  дгIасынйан,  «Бара  арыпхьагIв  хатI  былапI,  йатахъу  дырра  бымапI,  бадгалагIв  бзипI,  вожатата  баласыргуштI,  арыпхьарагьи  ацынкъвбгапI»,  –  гIасайхIвтI.  Абарауаса,  апхьарта  адиректор  йыргвышхварала  асквш  1995  агIан  вожатата  сынхара  джвыквсцIатI,   –   лхIвитI   Ирина. Ауи  заочната  Къарча-Черкес  къральыгIва  университет  афилология  факультет  асквш  2002  агIан  дахIврала  дгIалгатI,  урышв  бызшвали  литературали  лкытлагIвчва  рсабиква  алрыпхьауа  далагатI.  АрыпхьагIв  гвымчIва  13  сквша  руацIа  йхвбахауа  акласс  
йгIашIарышвта  йжвабахауа  аклассдза  йалрыпхьаз  асабиква  лдырраква  рылттI.  Асквш  2017  ноябрь  агIан  ауи  асабигIзарта  даунашвачпагIвхатI.  Ирина  ларгьи  даныпI,  пхIакIи  пакIи  гIадзынлыргылтI.  ЛпхIа  Милена  Пятигорск  атехникум  дгIалган,  лъачIвагIала  дынхитI.  Лпа  Ансар  Волгоград  йтагылу  Россия  МВД    Академия    йапхъахауа    акурс    дыцIапI.
АСАБИКВА      ЙГIВБАХАУА      РУНАГIВА Чква  Ирина  йшгIасалхIвызла,  асабигIзарта  йгIацIанакIитI  квадрат  метрта  470,  сабита  йгIайитI  50-гIвы,  йрыдынхалуа  18-гIв  йнадзитI.  Асабиква  гIвгвыпкIта  йагIвшапI:  3-сквша  йырту  йгIашIарышвта  5-сквша  йнамдзас  йайцIбачву  агвып  йрыланакIитI,  5-сквша  йгIашIарышвта    6–7  сквшадза  –  йахIбачву    агвып. –  Сара  апхьарта  йасрыпхьуз  ачкIвынчви  ахIвсси  йраухIвуа  гIаргвынгIвуан,  –  лхIвитI.  –  Араъа  йгIайуа  асабиква  йраухIвуа  гIаргвнымгIвуа,  йшчIвуш,  йшхъвмаруаш  рымдыруа  йгIайитI.  АсабигIзарта  йгIайуа  ахвыцква  джьащахъвапI,  упшкари,  угвапари  рылар
хIвитI.  ХIаргьи,  ауат  йрыдынхалуа,  мурад  хъадата  йхIыму  закIыпI:  асабиква  тамамта  йчважвауа,  йхъвыцуа  йыгIбжьара,  айшва  йшадзхъачIвуш,  амхIачIва,  авилка  шыркIуаш,  асабигIзарта  апны  йкьахвуа,  ргвы    йалахIауа    рымш    шнардасуаш. АсабигIзарта  аунашвачпагIв  йшгIасалхIвызла,  тгIачвата  йадкIылу  анхагIвчва  дасу  йборч  йнардзата  йырхъйитI,  ргватра  асабиква  йырзынадырхитI,  йрызсакъитI.  АбжьагIвчва  Быда  Стелла  йгьи  Огвыз  Инна  йазалху  дырра  рымапI,  руыс  йазъазапI,  асабиква  йырзаргванпI.  Ауат  цхърагIагIв  бзита  йрымапI  агIзагIв  айцIбачва  Хъабльахь  Тамара  йгьи  ХIапIатI  Сима.  Асабиква  цкьата  йынкъвыргитI,  рхъвмарырта,  йъачвуа,  тшъапсырщауа  апещква  рпны  йакIвым  гьубушым.  АджвджвагIвы  Нагай  Зурйат,  ацкьара  йазгылу  Аджьбакь  Асйа,  аджвджвахьаква  йырхъпшылуа  КIьыча  Альта  рынхара  швабыжта  йазыразпI.  Ауат  ахъыгъвцIыгъвква  йаназаману  йырпсахитI,  дара  ргIариква  йрапшдзата  араъа  йгIардуа  асабиква  йырхьпшитI.  Асабиква  ргвы  зызгIайуаш  рызкъ  къуат  рыздрыхIазыритI  сквш  30  райхIа  мацIаугIвыта  апхьарта  йынхауа  КIьыча  Анфиса  йгьи  ауи  лцхърагIагIв  Къамби   Татьяна. –  Апхъала  афачIвква  зымгIва  хIара  йгIагIгуан,  –  лхIвитI  асабигIзарта  аунашвачпагIв.  –  Ужвы  йаназаману  арайонла  йгIаргитI.  Щамакъжьы,  уасажьы,  квтIужь,  пслачва,  хшы,  швыр  гьрыгхум.  МшигIадза  
асаби  йчара  сом  130  аквшвитI.  Анчви  абачви  мзигIадза  йыршвауа  асом  зыкь  йауата  процент  50  асабиква  рчара  йаквхIрыдзитI,  анахьани  апроцент  50-гьи  асабигIзарта  атахъыраква  йырзынахIырхитI.  Асабиква  щыбжьан  йанхIырчара  амщтахь  йхIрычвитI,   йангIагылхра   агваны   йдрыхъвмаритI. АсабигIзарта  анхара  шащтацуш  йащтапI  азавхоз  Хъабльахь  Светлана,  абухгалтер  Аджьбакь  Диана,  ашвъаква  агвынзыргIвуа  Къардан  Светлана,  физкультура  дызрычпауа  ХIамыкъва  Марат,  музыка  йазызбжьауа  Къамби  ФатIима,    рызгIвадара  йахъпшылуа    Гвагв    ФатIима. АсабигIзарта  абжьагIвчва  афедеральна  джыпха  йаквыргIапста  асквш  ауацIала  йызланхуш  ахачIвы  щаквдыргылитI.  Ауаъа  йгIарбапI  мзигIадза,  мшигIадза  уыста  йырчпара  атахъу  зымгIва.  Агвып  ахIбачва  йрыланакIуа  апхьарта  бзита  йаздрыхIазырра  ахъазла  апрограмма  рыцIа  йдрымчитI.  СынчIва  пычIвта  апхьарта  йыцIалыз  йрыуата  12-гIв  асабигIзарта  йыцIырщттI.  
–  Асабиква,  ашва  рхIвитI,  йгIахIвитI,  йлыху  апрограмма  йгIаквхта  асабигIзарта  йъадзаъу  азаман  апроцент  60  –  урышвла,  йгIанхауа  абаза  бызшвала  хIрачважвитI,  –  лхIвитI  асабигIзарта  аунашвачпагIв.  –  АгIваша  йгьи  апщаша  мшква  шабгу  асабиква  абазала  хIрачважвитI,  хIцIасква,  хIхабзаква  шпшдзу  рахIхIвитI,  абаза  хIарыфква,  алокI  чкIвынква  дхIырдыритI,  хIуагIахъа  ртурых  йгватшныта  йаздзыргIвитI.  Акытла  гвыргъьахъв  йа  датша  уыскI  адыргалуазтын, асабиква зламылуа гьаъам. Абаза  фашаква  ршвыта  ауатыкв  йгIаталта,  абазала  уыса  йангIапхьара,  ашва  анырхIвауа  зымгIвагьи  йджьарщитI.  Абаза  бызшвали  литературали  арыпхьагIв  йдиплом  зму  Быда  Стелла  аурышв  уыса  чкIвынква  абазала  йаталкIитIта  асабиква  йдлырдыритI.  АгIапын  абаза  тацанадылра  «акIвхIыршарныс»  тшазхIрыхIазырын,  азгIва  хIапнакъьатI,  асабигIзарта  заманкIдза  йахIыркIытI.  Анчва  йгьи  абачва  абазата  рсабиква  урышв  бызшвала  йанчважвауа  гвасра  дута  йспхьадзитI.  Быда  Стелла  бжьагIвыта  дъанхауа  ахIбачва  ргвып  хIаннашыл,  «Швымш  бзита!»  ансхIва,  асабиква  тшгIащтIырхын,  йацшIакIта,  «РахIагьи  йбзита!»-хIва    апещ    гIатдрыхIвачвгIатI. Йапшым арчIаджьраква, аныргIалраква рагIан  асабиква  ззыбжу  ахъвмаргаквала,  датша  йыртахъула  цхърагIара  ду  гIаддрадзитI  ан-абачва,  акыт  администрация, ахIаракьатчпагIвчва. Асабиква зквчIвауа  арымдзаква,  ахъвмарырта  йыгIвнагылу  апсауатлаква,  амачваква  зымгIва  ан-абачва  йырхвгIатI,  АлахI  дырзыразхатI.  Акыт  администрация ахъада  ХвытI  Игорь  цIыпх  малината  10  килограммкI  рызгIайгтI,  йгIадыршын,  агъыкI  шабгаз  асабиква  йыддрыфтI.  Ашвыр  цIлаква  йрыдынхалуа  Джьут  Айнар  – музыка  квта,  ХвытIргIа  рычкIвынчва  –  телевизор  асабиква  йрызгIаргтI.  Кисловодск  йбзазауа  къарча  чкIвынкI  агвашв  асабигIзарта  апшцIа  йшанымгIалуаз  ахабар  анйагIа,  шIыцта  йдирычпан  йгIадирыгхтI.  КъарчачкIвын  район  администрация  тшанырзынадырхара  «момо»   гьырхIвум.  –  АшIашIкIгIара  гIашIакIрала  асабигIзарта  апны  асанитар  хабзаква  зымгIва  хIырхъйитI,  –  лхIвитI  Чква  Ирина.  –  Асабиква  ахIауа  йылата  йхIрыхъвмаритI.  АхIауа  зрыцкьауа  ргIапсгакI  арайонла,  гIвбагьи  Эгьзакь  Мусса  йцхърагIарала  йгIахIадзан,  асабиква  ъахъвмаруа,  йъачауа,  йъачвуа  йхIыргылтI.  
АСАБИГIЗАРТА        АБЖАРАКВА  АсабигIзарта  аунашвачпагIв  лкабинет  сыгIвначIвата  хIъадзайчважвуз  йагIвщщаз  абльынква  сгIвылакI  рыквшватI.  Апхьарта  асквш  1965  январь  йгIахъыртIытI.  ШIыцта  йларцIаз  апластик  агIхъышвкI  ракIвмызтын,  арахьарат  пшыхь  гIаркIылситI.  Спортзал  гьрымам,  асабиква  йдучвам  ахъвмарырта  апны  тшгьырзауацIыхуам.  Йара  ауаса  актова  зал  гьрымам,  асабиква  гвыргъьахъвыкI  анакIвдыршауа  апещква  йрыгIвну  апсауатлаква  гIаджвылыргитIта,  йаналгара  йнаргылхитI.  АсабигIзарта  анхагIвчва  дзы  пха  ъарымам    йгIалцIла    швабыжта    йгIапситI. –  Акыт  гьхвыцым,  3-н  зыкьыгIв  айхIа  бзазитI,  –  лхIвитI  Чква  Ирина.  –  АлахI  йбзирала  сабита  йгIадзынгылуа  ансисквша  йрылахIитI.  АсабигIзарта  згIариква  гIаздра  зтахъу  анчва  йгьи  абачва  щардагIвыпI,  захIвара  щтIугьи  гьмачIым,  ауаса  ари  айхIа  гьыгIвнашвушым.  АсабигIзарта  апхьарта  йъапщылугьи  баргвыра  щарда  гIаннаршитI.  Акыт  администрация  ахъада  ХвытI  Игорьи  хIхаквлагIв,  ахIаракьатчпагIв  Эгьзакь  Мусси  сабигIзарта  шIыц  ацIыхъва  йтагылапI.  Ауи  гIахIдахIвуазтын  нхара  йтыцIуа  анабачва  гвыргIваракIгьи  рымамкIва  рсабиква  асабигIзарта    йгIардырныс    лшара    рауаштI.